Month: February 2026

Fevralın 16-da Qobu qəsəbəsində fəaliyyət göstərən 1 saylı tam orta məktəbdə təhsil alan IX sinif şagirdləri arasında yaranan münaqişə nəticəsində tərəflərdən biri digərinə bədən xəsarəti yetirib.

Təhsil ocağından “Azərbaycan müəllimi”nə daxil olan məlumata əsasən, xəsarət almış məktəbliyə əvvəlcə təhsil müəssisəsində ilkin tibbi yardım göstərilib, ardınca o, xəstəxanaya çatdırılıb. Həkimlər tərəfindən müayinə olunan yeniyetməyə ambulator müalicə təyin edilərək evə buraxılıb:

“Baş vermiş hadisə məktəb rəhbərliyi tərəfindən dərhal nəzarətə alınıb və aidiyyəti qurumlar məlumatlandırılıb. Hazırda faktla əlaqədar müvafiq araşdırma işləri davam etdirilir”.

Bakıdan Belqrada birbaşa uçuşlar başlayır.

Demokrat.az-ın əldə etdiyi məlumata görə ilk uçuş may ayının 3-də baş tutacaq. Biletlərin qiyməti tək gediş üçün 136 avro (günün məzənnəsinə uyğun 274 manat) olacaq. Uçuşu “Air Serbia” hava yolları həyata keçirəcək.

Qeyd edək ki, Serbiya Prezidenti Aleksandar Vuçiç Azərbaycan Prezidenti İlham Əliyevin iştirakı ilə iki ölkə arasında Strateji Tərəfdaşlıq Şurasının 1-ci iclasında bu barədə anons etmişdi.

Siyəzən Rayon İcra Hakimiyyətinin başçısı Novruz Novruzov bu yaxınlarda işə qəbul etdiyi köməkçisinin fəaliyyətinə xitam verib.

Median.Az-ın İqtisadiyyat.az-a istinadla verdiyi məlumata görə, Novruz Novruzov məsələ ilə əlaqədar müvafiq əmr imzalayıb.

İmzalanmış sənədə uyğun olaraq, Balabəy Balabəyov icra başçısının köməkçisi postundan kənarlaşdırılıb.

Verilən məlumata əsasən, onun işdən azad edilməsi dövlət qulluğunda çalışma yaşının son həddinə çatması ilə bağlıdır. Belə ki, bu günlərdə 65 yaşı tamam olan məmur təqaüdə yola salınıb.

Qeyd edək ki, B.Balabəyov uzun illər Siyəzən RİH-də fəaliyyət göstərib. O, əvvəllər İcra Hakimiyyətinin İctimai-siyasi və humanitar məsələlər şöbəsində müdir müavini (dini qurumlarla iş üzrə təşkilatçı) qismində çalışıb. Ötən ay aparılan struktur islahatları nəticəsində əvvəlki ştatı ixtisar edildiyi üçün icra başçısının köməkçisi təyin olunmuşdu.

Fövqəladə Hallar Nazirliyinin (FHN) Dövlət Yanğın Nəzarəti Xidməti (DYNX) səlahiyyətləri daxilində ölkə ərazisində yanğın təhlükəsizliyinin təmin olunması məqsədi ilə zəruri tədbirlərin görülməsini davam etdirir.

Bu barədə FHN məlumat yayıb:

“Bu çərçivədə DYNX tərəfindən Bakı şəhəri, Binəqədi rayonu, Əlişir Nəvai küçəsi 33 ünvanında yerləşən “Yuxa” restoranında keçirilən yoxlama zamanı yanğın təhlükəsizliyi sahəsində çoxsaylı nöqsanların mövcud olduğu, həmin nöqsanların insan həyatı və ya sağlamlığına, ətraf mühitə və dövlətin əmlak maraqlarına birbaşa təhlükə yaratdığı müəyyən edilib.

Belə ki:

– Obyektdə ilkin yanğınxəbərverici siqnalizasiya qurğusu tam quraşdırılmayıb, mövcud olan qurğu isə nasazdır;

– Elektrik təsərrüfatına profilaktik baxış keçirilməyib və müvafiq akt tərtib edilməyib;

– Odsöndürən balonlarla tam təmin olunmayıb;

– Bəzi daxili divarları yanar materiallarla üzlənilib;

– Mətbəxdə quraşdırılmış tüstü bacasının təmizlənməsi barədə akt təqdim edilməyib;

– Yanğın zamanı insanların təxliyə olunması üçün köçürmə planı tərtib olunmayıb;

– Təxliyə yolunu göstərən nişanlar mövcud deyil;

– Obyektin daşınmaz əmlakının icbarı sığorta şəhadətnaməsi və layihə sənədləri təqdim edilməyib.

Beləliklə, mövcud vəziyyət onu göstərir ki, restoranın istismarının davam etdirilməsi nəticəsində orada hər an baş verə biləcək yanğın qısa müddətdə genişlənərək faciəni qaçılmaz edəcək.

Qeyd olunanları nəzərə alaraq, yanğın təhlükəsizliyi norma və qaydalarının tələblərinin kobud pozulması faktları aşkar edilmiş “Yuxa” restoranının fəaliyyətinin dayandırılması barədə qərar qəbul olunub və onun bir nüsxəsi obyektin nümayəndəsinə verilib.