Median.Az

Month: February 2026

  • Narkotikin təsiri altında avtomobil idarə edən sürücü həbs olundu – Video

    Nəsimi Rayon Polis İdarəsi Dövlət Yol Polisi Şöbəsinin əməkdaşları tərəfindən hərəkətin təhlükəsizliyinin təmini məqsədi ilə profilaktik tədbirlər davam etdirilir.

    Sonuncu tədbir zamanı rayon ərazisində “Chevrolet” markalı nəqliyyat vasitəsini idarə edən sürücü Ceyhun Qurbanov ictimai asayişi pozaraq digər hərəkət iştirakçılarının həyatına təhlükə yaratdığına və polisin qanuni tələbinə əməl etmədiyinə görə saxlanılıb.

    Yoxlama zamanı sürücünün hərəkətləri şübhə doğurduğundan onun tibbi müayinədən keçməsi təmin olunub. Müayinə zamanı C.Qurbanovun narkotik vasitələrin təsiri altında olduğu müəyyən edilib. Sürücü barəsində inzibati protokol tərtib edilərək qərar verilməsi üçün məhkəməyə göndərilib. Məhkəmənin qərarı ilə C.Qurbanov nəqliyyat vasitələrini idarə etmək hüququ 1 il müddətinə məhdudlaşdırılmaqla 20 gün müddətinə inzibati qaydada həbs olunub.

  • В официальных аккаунтах Ильхама Алиева в соцсетях опубликованы кадры с визита в Абу-Даби (Видео)

    В официальных аккаунтах Президента Азербайджана Ильхама Алиева в социальных сетях опубликованы кадры с его рабочего визита в Абу-Даби.

    Median.Az представляет данные кадры:

  • İlham Əliyevin sosial şəbəkə hesablarında Əbu-Dabi səfərindən görüntülər paylaşılıb – Video

    Prezident İlham Əliyevin rəsmi sosial şəbəkə hesablarında Əbu-Dabiyə səfərindən görüntülər paylaşılıb.

    Median.Az həmin paylaşımı təqdim edir:

  • Sabah Mingəçevir və Bərdədə qaz olmayacaq

    Sabah Mingəçevir şəhərinin və Bərdə rayonunun bəzi ərazilərinin qaz təchizatında fasilə yaranacaq.

    Bu barədə Azərbaycan Dövlət Neft Şirkətinin “Azəriqaz” İstehsalat Birliyindən məlumat verilib.

    Bildirilib ki, Mingəçevirdə yerləşən Toxuculuq və A. Puşkin küçələrində fərdi yaşayış evlərinin qaz təchizatının şəbəkəyə qoşulması ilə əlaqədar saat 10:00-dan ərazinin qaz təminatının işlər yekunlaşanadək daxildən dayandırılması planlaşdırılıb. Qaz təzhizatının dayanması ilə əlaqədar ümumilikdə 380 abonentin qaz təchizatında fasilə yaranacaq.

    Bundan başqa, Bərdə rayonunun ölçü qovşağından qidalanan M.Ə.Sabir küçəsində qeyri yaşayış obyektinin qaz xəttinin şəbəkəyə qoşulması ilə əlaqədar saat 10:00-dan işlər yekunlaşanadək qaz təchizatının daxildən dayandırılması planlaşdırılır. Qaz təchizatının dayanması ilə əlaqədar İ.Qayıbov , Nüşabə, Vaqif, Koroğlu, H.Aslanov, Sabir və Gəncə küçələrində cəmi 2 284 abonentin qaz təchizatında fasilələr yaranacaq.

  • Boynuna asdığı patrona görə cəzalandırıldı: “Məni qoruyacağını düşünmüşdüm”

    Naxçıvanda boyunbağına tapança patronu taxıb boynundan asan qadın cəzalandırılıb. 

    Qaynarinfo-nun məlumatına görə, 1993-cü il təvəllüdlü G.T.-nin Cinayət Məcəlləsinin 228.1-ci maddəsi ilə təqsirləndirilməsinə dair cinayət işinə məhkəmədə baxılıb.

    Məlum olub ki, G.T. Naxçıvan Hava Limanından Türkiyənin İstanbul şəhərinə getmək istəyərkən çantasında boyunbağına taxılmış tapança patronu aşkarlanıb. Qadın ifadəsində bildirib ki, patronu hamilə olduğu vaxt qorxduğu üçün “kurşun kolye” kimi götürüb. Onun sözlərinə görə, bu cür əşyalar Türkiyədə açıq satışda olduğundan, hər hansı hüquqi problem yarada biləcəyini düşünməyib.

    G.T. patronu 2 il əvvəl İstanbulda 30 lirəyə aldığını, boynundan asdığını, lakin sonradan ağırlıq etdiyi üçün çantasına qoyduğunu deyib:

    “Belə hadisə olacağını bilsəydim, atardım. Azyaşlı övladım var və ona özüm baxıram. Sadəcə məni qoruyacağına inandığım üçün saxlamışdım”.

    Təqsirləndirilən şəxs əməlindən peşman olduğunu bildirib.

    Məhkəmənin hökmü ilə G.T. Cinayət Məcəlləsinin 228.1-ci maddəsi ilə təqsirli bilinib və 2 il müddətinə azadlığın məhdudlaşdırılması cəzasına məhkum edilib. O, cəza müddətində elektron nəzarət qolbağı daşıyacaq.

  • Bakıda kişi narkotik almaq üçün pul verməyən anasını döyüb

    Bakının Xətai rayonunda 54 yaşlı kişi ona narkotik almaq üçün pul verməyən anasına şiddət göstərib.

    Median.Az “Teleqraf”a istinadən xəbər verir ki, hadisə 2024-cü il iyulun 27-də Zirə qəsəbəsində baş verib.

    1972-ci il təvəllüdlü Sahib yaşadığı evdə anası Fatimə ilə (adlar şərti verilib) ona pul verməkdən imtina etməsi səbəbi ilə mübahisə edib. Mübahisə zamanı 54 yaşlı oğul anasını döyüb. Yaşlı qadını divanın üstünə atıb, başını divara çırpıb. Boğazından yapışaraq əli ilə baş və sifət nahiyələrinə zərbələr vurub.

    Sahib Xəzər Rayon Polis İdarəsi Narkotiklərlə Mübarizə Bölməsinin əməkdaşları tərəfindən saxlanılıb. Ondan külli miqdarda narkotik vasitə aşkar olunub.

    İstintaq orqanı tərəfindən Sahibin barəsində Cinayət Məcəlləsinin 128 (qəsdən sağlamlığa zərərvurma) və 234.4.3-cü (külli miqdarda narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) maddələri ilə ittiham elan edilib.

    İş üzrə ifadə verən Sahib ittiham üzrə özünü təqsirli bilməyib. İfadəsində göstərib ki, heç kəslə ədavəti, düşmənçiliyi yoxdur:

    “Heç bir ruhi-əsəb dispanserində qeydiyyatda deyiləm. Psixoloji durumum normaldır. Uzun müddətdir narkotik vasitələrdən istifadə edirəm, aludəçiyəm. Yaşadığım ünvandan aşkar olunmuş narkotik vasitə mənə məxsus deyil. Baxışda iştirak edən anam da yalandan bildirib ki, guya evdən aşkar olunmuş narkotik vasitə mənə məxsusdur”.

    Təqsirləndirilən şəxs qeyd edib ki, iyulun 27-də saat 22:30-da yaşadığı evdə olub:

    “Anamla aramızda mübahisə baş verdi. Əsəbiləşərək anamın qollarından tutaraq onu qonaq otağında olan divanın üzərinə atdım. Anam qonşuluqda yaşayan dayımgilə getdi. Mən də arxasınca getdim ki, barışıb onu yaşadığımız evə gətirim.

    Tüfeyli həyat tərzi keçirdiyim üçün anamın məndən zəhləsi gedir. Hadisə günü anamdan pul tələb etməmişəm. Həmin zaman çox əsəbi olmuşam, baş verənləri xatırlamıram”.

    İş üzrə zərərçəkmiş Fatimənin sözlərinə görə, oğlu Sahib dəfələrə məhkum olunub:

    “Narkotik vasitələrin istifadəçisidir. Hadisə günü saat 22:30-da Sahiblə evdəydik, məndən pul istədi, pulumun olmadığını dedim. O, israrla pul istəyirdi. Mən də pulumun olmadığını söyləyirdim. Sonra məni öldürəcəyi ilə hədələdi. Aramızda mübahisə baş verdi. Əli ilə sinəmdən itələdi, yerə yıxıldım. Sonra əli ilə yaxamdan tutaraq qaldırdı, divanın üstünə atdı. Başım divara dəydi. Boğazımdan tutaraq boğmağa başladı. Gözümə, qulağıma şillə vurdu. Ondan məni buraxmasını istədim. Halım pisləşdi. Özümdə güc toplayaraq onun aşağı nahiyəsinə təpiklə vurdum və əlindən çıxaraq qardaşımgilə getdim”.

    Bakı Ağır Cinayətlər Məhkəməsinin hökmü ilə Sahib 6 il 6 ay müddətinə azadlıqdan məhrum edilib. Onun cəzasını ciddi rejimli cəzaçəkmə müəssisəsində çəkməsi müəyyən edilib.

    Hökmdən təqsirləndirilən şəxs apellyasiya şikayəti verib. O, təyin edilmiş cəzadan narazı olduğunu bildirib və ona köməklik göstərilməsini xahiş edib.

    Təqsirləndirilən şəxs Cinayət Məcəlləsinin 234.4.3-cü maddəsi ilə bəraət istəyib. Qeyd edib ki, Cinayət Məcəlləsinin 128-ci maddəsi ilə özünü təqsirli bilir. O, anası ilə barışmadığını, ancaq bu maddə ilə ona aşağı həddə cəza təyin olunmasını xahiş edib.

    Bakı Apellyasiya Məhkəməsinin qərarı ilə şikayət təmin edilməyib.

  • Qurban Qurbanov “Neftçi”nin imtinasından danışdı

    “Qarabağ”ın bş məşqçisi Qurban Qurbanov Misli Premyer Liqasının XXI turunda “Neftçi” ilə oyunun təxirə salınmamasında hansı problem görmədiyini söyləyib. Mütəxəssis bu barədə mətbuat konfransında açıqlama verib.

    O, sosial şəbəkələrdə məsələnin müzakirə olunmasına toxunub:

    “Sosial şəbəkələrdə yoxam. Amma hər hadisəyə normal yanaşıram. Bu, kimisə haqlı və ya haqsız çıxarılası mövzu deyil. Peşəkar Futbol Liqasına (PFL) “Neftçi” ilə qarşılaşmanın təxirə salınması ilə bağlı müraciət etmişik. Həmin vaxt rəqib “Neftçi” və digər kollektiv də ola bilərdi. Hansısa fikir bildirmək istəmirəm. Biz niyə müraciət etdik? Çünki PFL-də belə reqlament var. Amma təxirə salınmadı. Burada ciddi problem görmürəm. Onların da öz proqramları və hazırlıq prosesləri var. Bunu başa düşürəm. Daha əvvəl təxirə salınan və ya vaxtı dəyişdirilən matçlar olub. Bu dəfə olmadı deyə kimdənsə küsmək fikrimiz yoxdur. Daha dərindən düşünürək oyunlara hazırlaşmalıyıq.

    Q.Qurbanov Azərbaycan Kubokunun 1/4 final mərhələsinin ilk oyununda səfərdə “Şamaxı”ya uduzduqları (1:2) oyuna da toxunub:

    “İlk növbədə azarkeşlərə təşəkkür edirəm. Belə hava şəraitində bizləri tək qoymadılar. Kubokda ilk matçımız idi. Bizim üçün ciddi nəticə oldu. Cavab qarşılaşmasına daha ciddi hazırlaşmalıyıq. Rəqibi təbrik edirəm. Layiqli qələbə qazandılar”.

    Qeyd edək ki, “Neftçi” klubu “Qarabağ”la çempionat görüşünün təxirə salınmasını istəməyib.//Report

  • “Qurtuluş” Reabilitasiya Mərkəzinin rəhbərinin şikayəti təmin edilmədi

    “Qurtuluş” Reabilitasiya Mərkəzinin rəhbəri Ceyhun Salmanov barəsində seçilmiş həbs qətimkan tədbirindən verilən apellyasiya şikayəti üzrə məhkəmə prosesi keçirilib.

    Median.Az APA-ya istinadən xəbər verir ki, Sumqayıt Apellyasiya Məhkəməsində şikayətə baxılıb və qərar qəbul edilib.

    Qərara əsasən, şikayət təmin edilməyib.

    Qeyd edək ki, “Qurtuluş” Reabilitasiya Mərkəzi MMC-nin Sumqayıt şəhəri ərazisində yerləşən müəssisəsində baş verən qanunsuzluqlarla bağlı daxil olmuş vətəndaş müraciətləri əsasında Sumqayıt şəhər prokurorluğunda araşdırma aparılıb.

    Faktla bağlı “Qurtuluş” Reabilitasiya Mərkəzinin rəhbəri Ceyhun Salmanov, mərkəzin əməkdaşları – Natiq Əliyev və Elşad Məhərrəmov saxlanılıb. Məhkəmənin qərarı ilə onların hər biri barəsində 2 ay 10 gün müddətə həbs qətimkan tədbiri seçilib.

    Onlar Cinayət Məcəlləsinin 127-ci (qəsdən sağlamlığa az ağır zərər vurma), 133-cü (əzab vermə), 144-cü (adam oğurluğu), 145-ci (qanunsuz azadlıqdan məhrum etmə) maddələri üzrə ittiham edilir.

  • İlham Əliyev: “Azərbaycan-Türkiyə münasibətlərinin əsasında duran sarsılmaz qardaşlıq çətin məqamda real mahiyyətini nümayiş etdirib”

    “Bu fəlakət Türkiyə üçün ciddi humanitar sınaq oldu. Bir gecədə minlərlə insan həyatını itirdi, bir çox şəhər və yaşayış məntəqələri dağıntıya məruz qaldı. Həmin günlərdə Azərbaycan xalqı baş verənləri dərin ağrı hissi ilə izləyərək qardaş Türkiyənin kədərini öz kədəri kimi qəbul etdi, onun dərdinə şərik çıxdı”.

    Median.Az AZƏRTAC-a istinadən xəbər verir ki, bu sözlər Azərbaycan Prezidenti İlham Əliyevin Türkiyə Prezidenti Rəcəb Tayyib Ərdoğana qardaş ölkəni dərindən sarsıdan zəlzələdən üç il ötməsi ilə əlaqədar ünvanladığı məktubda yer alıb.

    Dövlətimizin başçısı qeyd edib ki, Azərbaycan-Türkiyə münasibətlərinin əsasında duran sarsılmaz qardaşlıq məhz belə çətin məqamda öz real mahiyyətini nümayiş etdirib. Faciənin ilk anlarından etibarən Azərbaycan dövləti və cəmiyyəti birlik və həmrəylik prinsiplərinə sadiq qalaraq Türkiyənin yanında olub, dəstək və yardım əlini uzadıb.

  • Prezident: “Qardaş ölkənin bərpa səylərinə Azərbaycanın dəstəyi dostluq münasibətlərimizin əyani ifadəsidir”

    “Qardaşlıq borcumuzun təzahürü olaraq Azərbaycan Kahramanmaraş vilayətində aparılan yenidənqurma və bərpa işlərinə töhfə vermiş, burada “Azərbaycan” məhəlləsinin salınmasında yaxından iştirak etmişdir. Qardaş ölkənin bərpa və quruculuq səylərinə Azərbaycanın dəstəyi dostluq və müttəfiqlik münasibətlərimizin əyani ifadəsidir”.

    Median.Az AZƏRTAC-a istinadən xəbər verir ki, bu sözlər Azərbaycan Prezidenti İlham Əliyevin Türkiyə Prezidenti Rəcəb Tayyib Ərdoğana qardaş ölkəni dərindən sarsıdan zəlzələdən üç il ötməsi ilə əlaqədar ünvanladığı məktubda yer alıb.

    Dövlətimizin başçısı əmin olduğunu bildirib ki, “Bir millət iki dövlət” fəlsəfəsinə əsaslanan Azərbaycan-Türkiyə güclü birliyi və strateji müttəfiqliyi bundan sonra da xalqlarımızın firavanlığına töhfə verməklə yanaşı, regional sabitliyin, təhlükəsizliyin və davamlı inkişafın təmin olunmasına xidmət edəcək.