Month: May 2026

Bayram mövsümü ərəfəsində sürücülər üçün xərclərə qənaət etməyin effektiv üsulları açıqlanıb.

Mütəxəssislərin fikrincə, sürətə edilən kiçik dəyişiklik yanacaq sərfiyyatında ciddi fərq yarada bilər. Belə ki, optimal sürət rejiminə riayət etməklə yanacaq xərclərini 15 faizə qədər azaltmaq mümkündür.

Qarşıdan gələn bayram günləri ilə əlaqədar yollarda nəqliyyat vasitələrinin sayının kəskin artacağı gözlənilir. Bu fonda yanacaq qiymətlərinin yüksəlməsi sürücüləri daha qənaətcil idarəetmə üsullarına yönəldir. Statistik məlumatlara görə, son aylarda “yanacaq qənaəti” ilə bağlı axtarışların əhəmiyyətli dərəcədə artması da bunu təsdiqləyir.
Avtomobil mütəxəssisləri bildirirlər ki, daxiliyanma mühərrikləri üçün ən səmərəli sürət təxminən 90–100 km/saat intervalında hesab olunur. Sürətin bundan yuxarı qaldırılması, xüsusilə 110–120 km/saat və daha artıq olduqda, aerodinamik müqaviməti artırır və mühərrikin daha çox enerji sərf etməsinə səbəb olur. Nəticədə yanacaq sərfiyyatı əhəmiyyətli dərəcədə yüksəlir.

Araşdırmalar göstərir ki, sürətdə təxminən 15–20 km/saat artım yanacaq sərfiyyatını 10–15 faizədək yüksəldə bilər. Halbuki daha sabit və optimal sürətlə hərəkət etmək səyahət müddətinə ciddi təsir etmədən qənaət etməyə imkan yaradır. Məsələn, uzun məsafələrdə bu fərq vaxt baxımından cəmi bir neçə dəqiqə təşkil etsə də, yanacaq sərfiyyatında hiss olunan üstünlük təmin edir.

Mütəxəssislər xüsusilə magistral yollarda sabit sürəti qorumaq üçün kruiz-kontrol sistemindən istifadəni tövsiyə edirlər. Bu, həm sürücünün yorğunluğunu azaldır, həm də yanacaq sərfiyyatını optimallaşdırır.

Qeyd olunur ki, qlobal enerji bazarındakı dəyişikliklər sürücülərin davranışına da təsir edir. Yanacaq xərclərini azaltmaq istəyənlərin sayı artdıqca, alternativ nəqliyyat vasitələrinə, xüsusilə elektrik avtomobillərinə maraq da yüksəlir.

Ekspertlərin qənaətinə görə, düzgün sürət seçimi və stabil idarəetmə tərzi sadə görünsə də, uzunmüddətli perspektivdə sürücülər üçün həm iqtisadi, həm də ekoloji baxımdan əhəmiyyətli üstünlüklər yaradır.
//avtosfer.az

2026-cı ilin yanvar-mart aylarında turizm məqsədilə xarici ölkələrə səfər edən işsiz Azərbaycan vətəndaşlarının sayı azalıb.

Cari ilin ilk 3 ayında xaricə səfər edən işsiz şəxslərin sayı 887 nəfər təşkil edib. Bu göstərici ötən ilin eyni dövrü ilə müqayisədə 27 nəfər və ya 2,95% azdır. Belə ki, 2025-ci ilin yanvar-mart aylarında bu kateqoriya üzrə xaricə səfər edənlərin sayı 914 nəfər olub.

İşsiz Azərbaycan vətəndaşlarının ən çox səfər etdiyi ölkələr arasında Gürcüstan və Rusiya ilk sıralarda yer alıb:

Gürcüstan – 404 nəfər

Rusiya Federasiyası – 173 nəfər

Çin – 56 nəfər

Birləşmiş Ərəb Əmirlikləri – 30 nəfər

Moldova – 25 nəfər

Özbəkistan – 23 nəfər

Belarus – 17 nəfər

Polşa – 17 nəfər

İran – 14 nəfər

Avstriya – 10 nəfər

Hindistan – 7 nəfər

İsrail – 3 nəfər

Niderland – 1 nəfər

Mayın 7-də gözlənilən hava proqnozu açıqlanıb.

Milli Hidrometeorologiya Xidmətindən verilən xəbərə görə, Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.

Şimal-qərb küləyi gündüz cənub-şərq küləyi ilə əvəz olunacaq.

Havanın temperaturu gecə 11-14° isti, gündüz 18-23° isti olacaq. Atmosfer təzyiqi 763 mm civə sütunu təşkil edəcək. Nisbi rütubət 65-75% olacaq.

Azərbaycanın rayonlarında bəzi yerlərdə arabir yağıntılı olacağı gözlənilir. Ayrı-ayrı yerlərdə intensiv olacağı, şimşək çaxacağı, dolu düşəcəyi, dağlıq ərazilərdə qar yağacağı ehtimalı var. Ayrı-ayrı yerlərdə arabir duman. Qərb küləyi bəzi yerlərdə arabir güclənəcək.

Havanın temperaturu gecə 10-14° isti, gündüz 18-23° isti, dağlarda gecə 2-7° isti, gündüz 7-12°, bəzi yerlərdə 16° isti olacaq.

Ağcabədi rayonunun Hacıbədəlli kəndində fəaliyyət göstərən, Məmmədov Yusif Mərdan oğluna məxsus baytarlıq aptekində yoxlama keçirilib.

Bu barədə Azərbaycan Qida Təhlükəsizliyi Agentliyi məlumat yayıb.

Bildirilib ki, aptekdə yararlılıq müddəti bitmiş baytarlıq preparatlarının satışa çıxarıldığı və digər bir sıra nöqsanlar aşkarlanıb.

Faktla bağlı sahibkar barəsində inzibati protokol tərtib olunub, icrası məcburi göstərişlər verilib. Yararlılıq müddəti bitmiş baytarlıq preparatları satışdan kənarlaşdırılıb və məhdudlaşdırıcı tədbirlərin tətbiqi barədə qərar qəbul edilib.

Gündəlik həyatın bir çox sahəsində rast gəlinən QR kodlar, təklif etdiyi sürətli əməliyyat imkanları ilə yanaşı, müxtəlif kiber riskləri də özü ilə gətirir. Restoran menyularından rəqəmsal ödəniş nöqtələrinə qədər geniş yayılan bu texnologiya kibercinayətkarlar üçün yeni hücum kanalı yaradır.

ESET kibertəhlükəsizlik şirkətinin mütəxəssisləri istifadəçilərin bu vizual kodları skan edərkən qarşılaşa biləcəyi məxfilik riskləri barədə məlumat veriblər. “Quick Response” (sürətli cavab) ifadəsinin qısaltması olan QR sistemləri əslində ikiölçülü barkod növü kimi fəaliyyət göstərir.

QR kodlar ənənəvi barkodlarla müqayisədə daha çox məlumat saxlama qabiliyyətinə malikdir. Zədələnsələr belə oxuna bilməsi və istənilən bucaqdan skan edilə bilməsi onları logistika və maliyyə kimi sahələrdə geniş istifadə edilən texnologiyaya çevirib. Lakin bu çeviklik zərərli şəxslərin təhlükəli keçidləri fiziki və rəqəmsal mühitlərə yerləşdirməsini də asanlaşdırır.

Kibertəhlükəsizlik mütəxəssisləri bildirirlər ki, etibarsız mənbələrdən gələn QR kodlar “Qrishing” adlı fişinq (kimlik oğurluğu) üsuluna çevrilib. Bu üsulda istifadəçilər saxta bank səhifələrinə və ya alış-veriş platformalarına yönləndirilərək giriş məlumatlarını özləri təqdim edirlər. Bəzi kodlar isə skan edilən anda telefonda gizli şəkildə SMS göndərilməsi, zəng edilməsi və ya məkan məlumatlarının paylaşılması kimi icazəsiz əməliyyatları işə sala bilər. Xüsusilə ictimai yerlərdə ödəniş nöqtələrinə yapışdırılan saxta QR stikerləri vətəndaşların ödənişlərinin birbaşa hücumçuların hesabına yönləndirilməsinə səbəb ola bilir.

Məlumat təhlükəsizliyini qorumaq üçün sadə, lakin effektiv tədbirlər mövcuddur. Mütəxəssislər naməlum mənbələrdən gələn afişa və ya sosial şəbəkə paylaşımlarındakı kodların yoxlanılmadan skan edilməməsini tövsiyə edirlər. Cihazlarda güncəllənmiş təhlükəsizlik proqramlarının olması və iki faktorlu autentifikasiya sistemlərinin aktivləşdirilməsi mümkün məlumat sızmalarının qarşısını alır. Bundan əlavə, məkan icazələrinin məhdudlaşdırılması şəxsi məlumatların üçüncü tərəflərin əlinə keçmə riskini azaldan vacib addımlardan biridir. Texnologiyanın sürətli inkişafı yalnız düzgün təhlükəsizlik tədbirləri ilə birlikdə istifadə olunduqda riskdən daha çox fayda verir.
//valyuta.az

“Suraxanı Oil Operation Company S.A.” şirkətinin ərazisində hasarlama işi aparan şəxs cinayət məsuliyyətinə cəlb edilib.

Qaynarinfo xəbər verir ki, həmin şəxsə Cinayət Məcəlləsinin 188.1-ci maddəsi ilə ittiham elan edilib.

Cinayət işinə Suraxanı Rayon Məhkəməsində hakim Ünsüyyət Mirzəyevanın sədrliyi ilə baxılıb.

Məhkəmin hökmü ilə müttəhim 1 il müddətinə azadlığın məhdudlaşdırılıması cəzasına məhkum edilib.