Month: May 2026

“Bəzi hallarda insanlar yuxudan oyandıqdan sonra gümrahlıq deyil, əksinə, yorğunluq və süstlük hiss edirlər”.

Kardioloq və yuxu üzrə ekspert Natalya Zolotaryova “İzvestiya” nəşrinə müsahibəsində bu problemin səbəblərindən danışıb.

Ekspertin fikrincə, bu vəziyyət insanın yuxu fazalarından və oyandığı andan birbaşa asılıdır. O bildirib ki, gündüz yuxusunun müddəti 20-30 dəqiqəni keçdikdə beyin dərin faza mərhələsinə daxil olur. Nəticədə oyanma prosesi “yuxu ətaləti” adlandırılan halsızlıq və enerji itkisi ilə müşayiət olunur. Bundan başqa, saat 15:00-dan gec yatmaq bioloji ritmlərin pozulmasına, gecə yuxusunun keyfiyyətinin aşağı düşməsinə və xroniki yorğunluğa səbəb ola bilər.

Mütəxəssis, həmçinin vurğulayır ki, metabolik pozuntular və fərdi sağlamlıq xüsusiyyətləri günorta istirahətinin faydasını heçə endirə bilər. Səs-küy və güclü işıq kimi narahat şərait isə yuxunun yalnız səthi olmasına gətirib çıxarır.

N.Zolotaryovanın sözlərinə görə, günorta saatlarında ən ideal yuxu müddəti 20-30 dəqiqədir. Kəskin yuxusuzluq hallarında 90 dəqiqə (bir tam yuxu dövrü) yatmaq olar, lakin bu, gecə yuxusuna mənfi təsir göstərə bilər. Həkim gündüz istirahəti üçün ən uyğun vaxtın saat 13:00-15:00 arası olduğunu qeyd edir.

Ekspert maraqlı bir üsul olan “qəhvə yuxusu”ndan da bəhs edib. Yatmazdan dərhal əvvəl qəhvə içmək insanın daha gümrah oyanmasına kömək edir. Çünki kofein təxminən 20-30 dəqiqədən sonra qana qarışaraq təsirini göstərməyə başlayır ki, bu da məhz oyanma vaxtına təsadüf edir.
//oxu.az

Bank əməkdaşı Roma Papasının telefon zənginə şübhə ilə yanaşaraq dəstəyi onun üzünə asıb.

Bu qeyri-adi hadisə barədə “The New York Times” qəzeti məlumat yayıb.

2025-ci ilin ortalarında baş vermiş insidenti pontifikin yaxın dostu, keşiş Tom Makkarti mətbuata açıqlayıb. Hadisə Papa XIV Leonun seçilməsindən təxminən iki ay sonra baş verib. Belə ki, pontifik bank hesabındakı əlaqə detallarını yeniləmək qərarına gəlib.

Telefon danışığı zamanı Papa özünü dünyəvi adı – Robert Prevo kimi təqdim edib və bütün yoxlama suallarına doğru cavab verib. Lakin bank əməkdaşı onun ünvanını və telefon nömrəsini məsafədən dəyişməkdən imtina edərək, müştəriyə şəxsən filiala yaxınlaşmağı tövsiyə edib. Papanın bunun qeyri-mümkün olduğunu bildirməsi də nəticəni dəyişməyib.

Sonda pontifik “Mənim Roma Papası Leo olduğumu bildirsəm, nəsə dəyişəcək?” deyə soruşub. Bu sözlərdən dərhal sonra bank işçisi zəngin zarafat olduğunu düşünərək dəstəyi asıb.

ABŞ-nin “OpenAI” şirkəti yeni əsas çatbot modeli olan “GPT-5.5 Instant”ı təqdim edib.

Bu barədə məlumat “OpenAI”nin rəsmi saytında yayımlanan press-relizdə yer alıb.

Məlumata görə, “GPT-5.5 Instant” artıq “ChatGPT”nin pulsuz istifadəçiləri üçün standart modelə çevriləcək və cari ilin mart ayında təqdim edilmiş “GPT-5.3 Instant” versiyasını əvəz edəcək. Əvvəlki versiya ödənişli abunəçilər üçün daha üç ay seçim variantı kimi aktiv qalacaq.

Şirkət qeyd edir ki, yeni model daha ağıllı, anlaşılan və fərdiləşdirilmiş cavablar təqdim edir. Daxili sınaqların nəticələrinə əsasən, tibb, hüquq və maliyyə sahələri üzrə yanlış məlumatların sayı 52.5%, ümumi qeyri-dəqiqliklər isə 37.3% azalıb.

Texniki göstəricilərdə də ciddi artım müşahidə olunur. Belə ki, model “AIME 2025” riyaziyyat testində 81.2 bal toplayıb (əvvəlki modeldə bu göstərici 65.4 idi). “MMMU-Pro” çoxmodallı düşünmə testində isə nəticə yüksələrək 69.2 baldan 76 bala çatıb.

“OpenAI”, həmçinin bildirib ki, yenilənmədən sonra “ChatGPT” bütün modellər üzrə istinad mənbələrini göstərəcək. Bu da istifadəçilərə cavabların hansı məlumatlara əsaslandığını daha aydın şəkildə anlamağa imkan verəcək.