Category: Cəmiyyət

Bakıda qadın müştəri restoranda döyülüb.

Median.Az Lent.az-a istinadən xəbər verir ki, hadisə Nərimanov rayonu, Azadlıq prospektində yerləşən restoranlardan birində qeydə alınıb. İttiham aktında qeyd olunan yekun protokola görə, səhərə yaxın saat 5 radələrində zərərçəkən şəxs Gülsüm (şərti adla) sərxoş halda restoranda digər qadın müştəriləri narahat edib. Buna görə də obyektin icarədarı Musa İslamov (ad və soyad şərtidir) yaxınlaşaraq ondan hesabı ödəyib restoranı tərk etməsini tələb edib. Lakin Gülsüm həm buna etiraz edib, həm də Musanı söyüb. Əsəbiləşən Musa Gülsümün sifətinə zərbə vurub. Nəticədə qızın burun sümüyü qırılıb və bir sıra digər xəsarətlər yetirib.

Faktla bağlı Musa İslamova qarşı cinayət işi açılıb.

Təqsirləndirilən şəxs ifadəsində bildirib ki, restoranı doğma bacısı ilə birgə işlədir. Zərərçəkən qadının sözlərinə görə isə taekvando idman növü ilə məşğul olub. Lakin hadisə zamanı 6 nəfər onun üzərinə gəldiyi üçün gücü çatmayıb. Gülsüm həmçinin kuryer işlədiyini və hadisə nəticəsində ona 6500 manat ziyan dəydiyini də deyib.

İfadə verən qadın şahidlər Gülsümün sərxoş halda musiqi qoşub oynayarkən onlara sataşdığını, masasında əyləşərkən isə dayanmadan üzlərinə baxdığını deyiblər. Müştərilər narahat olduqları üçün restoran icarədarlarına müraciət edərək Gülsümün obyektdən çıxarılmasını istəyiblər. Hadisə də məhz bu zəmində baş verib.

Məhkəmənin qərarı ilə Musa İslamov barəsində 8 ay azadlıqdan məhrumetmə cəzası təyin edilib. Lakin onun haqqında amnistiya aktı tətbiq olunub və o, məsuliyyətdən azad olunub.

40 günlük müharibə ərzində İsrail və ABŞ-nin İran infrastrukturuna vurduğu zərər 270 milyard dollar olaraq qiymətləndirilir.

Median.Az “Azad İran” “Telegram” kanalına istinadən xəbər verir ki, bunu İran hökumətinin sözçüsü Fatimə Mühacirani deyib.

O, zərərin miqyasının daha geniş olması ehtimalına işarə edib: “Birbaşa və dolayı zərərləri də əhatə edən bu rəqəm ilkin qiymətləndirmə hesab olunur və tam deyil”.

Azərbaycan Respublikasında yol hərəkəti qaydalarının pozulmasına görə tətbiq edilən inzibati cərimələrin vaxtında ödənilməməsi sürücülər üçün əlavə hüquqi nəticələr yarada bilər. Xüsusilə, uzun müddət ödənilməyən inzibati cərimələrin sürücülük hüquqlarına təsir edib-etməyəcəyi tez-tez müzakirə olunan məsələlərdəndir.

Bəs, inzibati cəriməni ödəməyən sürücülərin sürücülük hüququ məhdudlaşdırıla bilərmi?

Median.Az-ın məlumatına görə, mövzu ilə bağlı konkret.az-a açıqlama verən vəkil Tural Həsənli bildirib ki, belə hallar qanunvericilikdə nəzərdə tutulub və konkret müddətlər çərçivəsində tədbirlər görülür.

“Müvafiq qərar qüvvəyə minir. Əgər 3 ay ərzində cərimə ödənilməzsə və bunun üçün qanuni əsas olmazsa, tədbir görülür. Həmin şəxsə qarşı əlavə qərar qəbul edilir. Onun nəqliyyat vasitəsini idarə etmək hüququ məhdudlaşdırılır. Eyni zamanda cərimənin ödənilməsi üçün iş məcburi icraya göndərilir. Məcburi icraya yönəldilmiş inzibati tənbeh tətbiq etmə haqqında qərar könüllü icra üçün qanunla müəyyən edilmiş vaxtda borclu tərəfindən üzrsüz səbəbdən icra edilmədikdə, müvafiq icra hakimiyyəti orqanı “İcra haqqında” Azərbaycan Respublikasının Qanununda nəzərdə tutulmuş məcburi icra tədbirləri görür”.

Vəkil vurğulayıb ki, belə halların qarşısını almaq üçün sürücülər cərimələri vaxtında ödəməli və məsuliyyətdən yayınmamalıdırlar.

Ağrıkəsicilərdən istifadə artıq çox insan üçün gündəlik vərdişə çevrilib. Azacıq ağrı hiss edən kimi həkimə yox, aptekə üz tuturuq. Yəni, ağrının səbəbini öyrənmədən nəticəni aradan qaldırmağa çalışırıq.

Halbuki həkim rəyi olmadan hər hansı bir dərmanın, xüsusilə də ağrıkəsicinin qəbulu ciddi risklərə yol açır.

Median.Az xəbər verir ki, mövzu ilə bağlı Bizim.Media-ya danışan Tibb üzrə fəlsəfə doktoru Abbas Bağırov deyir ki, ağrıkəsicilərdən davamlı şəkildə istifadə olunması ilk növbədə mədə-bağırsaq sisteminin selikli qişalarına mənfi təsir göstərir:

“Belə ki, mədədə turşunun miqdarı artır. Mədənin turşular konsentrasiyası artan kimi mədənin divarları zərər görməyə başlayır. Daha sonra mədənin divarlarında yaralar əmələ gəlir və mədə-bağırsaq prosesinin fəaliyyətində müəyyən pozuntular yaranır.

Digər tərəfdən qanyaranma prosesində ciddi fəsadlar ortaya çıxır. Eyni zamanda ağrıkəsicilərin uzun müddət davamlı qəbulu metobolik məhsulların parçalanması nəticəsində oynaqlarda, böyrək və qaraciyərdə toplanaraq bu sistemin də fəaliyyətini zədələmiş olur”.

Azərbaycanın rayonlarında mayın 3-ü gündüzdən 4-ü gündüzədək hava şəraitinin bəzi yerlərdə arabir yağıntılı olacağı gözlənilir.

Bu barədə Milli Hidrometeorologiya Xidməti məlumat yayıb.

Məlumata görə, ayrı-ayrı yerlərdə yağıntının qısamüddətli intensivləşəcəyi, şimşək çaxacağı, dolu düşəcəyi ehtimalı var.

Çaylarda sululuğun artacağı, bəzi dağ çaylarından qısamüddətli daşqın və sel keçəcəyi ehtimal olunur.

“Airblue” aviaşirkəti Bakı-Lahor marşrutu üzrə uçuşlara başlayır.

Bu barədə Heydər Əliyev Beynəlxalq Aeroportunun mətbuat xidməti məlumat yayıb.

Qeyd olunub ki, Heydər Əliyev Beynəlxalq Aeroportu Bakı-Lahor marşrutu üzrə “Airblue” aviareyslərinin fəaliyyətə başlaması ilə beynəlxalq tərəfdaşlıq şəbəkəsini genişləndirir. Pakistanın aparıcı aşağıbüdcəli (low-cost) aviaşirkətlərindən biri olan “Airblue”nun Bakı bazarına daxil olması Azərbaycanla Cənubi Asiya arasında hava əlaqələrinin inkişafında mühüm mərhələ kimi qiymətləndirilir.

Məlumata görə, yeni marşrut üzrə uçuşlar həftədə iki dəfə – çərşənbə axşamı və bazar günləri həyata keçiriləcək. Bu, sərnişinlər üçün daha çevik planlaşdırma imkanları yaratmaqla yanaşı, Bakı ilə Lahor arasında səyahəti daha əlçatan və rahat edir.

Qeyd edək ki, Bakı-Lahor istiqaməti artıq “Azərbaycan Hava Yolları” (AZAL) və “Pakistan International Airlines” (PIA) tərəfindən də icra olunur. “Airblue” aviaşirkətinin bu marşruta qoşulması bazarda rəqabəti gücləndirir, ümumi sərnişin tutumunu artırır və artan tələbatın qarşılanmasına xidmət edir.

Heydər Əliyev Beynəlxalq Aeroportu beynəlxalq marşrut şəbəkəsini genişləndirməklə Azərbaycanın regional aviasiya mərkəzi (hab) kimi mövqeyini daha da möhkəmləndirməyə davam edir.

Abşeronda kişi arvadını döyüb.

Hadisə Saray qəsəbəsində qeydə alınıb.

İttiham aktına görə, 32 yaşlı Mirzə Bağırov (ad və soyad şərtidir) yaşadıqları evdə 26 yaşlı arvadı Səkinənin (şərti adla) başına yumruqla zərbə vurub və əlləri ilə itələyib. Nəticədə zərərçəkən xəsarət alıb. Hadisəyə səbəb isə bir müddət əvvəl Səkinənin qızılları ehtiyatsızlıqdan itirməsi olub. Mirzə həmin hadisəni xatırladaraq arvadına irad bildirib və bu zəmində cütlük arasında mübahisə yaranıb. Mübahisə nəticəsində Mirzə arvadını döyərək xəsarət yetirib.

Faktla bağlı Mirzə Bağırov saxlanılıb və barəsində cinayət işi açılıb.

Təqsirləndirilən və zərərçəkən şəxslər bir-biri ilə barışdıqlarını bildiriblər. Zərərçəkən qadın ərinə qarşı şikayət və tələbinin olmadığını deyib. Bu səbəbdən onlar məhkəmədən cinayət işinə xitam verilməsini istəyiblər.

Məhkəmənin qərarı ilə cinayət təqibinə xitam verilib və Mirzə Bağırov məsuliyyətdən azad edilib.
//lent.az

Süni intellekt artıq təkcə iş və təhsil sahəsində deyil, insanların davranışını analiz etmək üçün də geniş istifadə olunur. Mütəxəssislərin fikrincə, düzgün sorğu qurulduğu halda ChatGPT qısa müddətdə insanın xarakteri, motivasiyası və zəif tərəfləri haqqında ümumi təsəvvür yarada bilir.

Lent.az xarici mediaya istinadla xəbər verir ki, aparılan eksperimentlər zamanı süni intellektə yalnız qısa davranış təsviri təqdim edildikdə belə, o, kifayət qədər dərin psixoloji portret formalaşdıra bilib. Bunun üçün istifadəçilər xüsusi hazırlanmış sorğulardan istifadə ediblər.

Mütəxəssislər qeyd edirlər ki, süni intellektdən istifadə edərək insanın davranışını təhlil etmək üçün müxtəlif yanaşmalar mövcuddur. Məsələn, insanın gündəlik vərdişləri və hərəkətləri əsasında onun xarakter xüsusiyyətlərini və motivasiyalarını analiz etmək mümkündür. Eyni zamanda böyük beşlik modeli əsasında açıqfikirlilik, məsuliyyətlilik, ekstraversiya, mehribanlıq və emosional sabitlik kimi əsas xüsusiyyətlər qiymətləndirilə bilər.

Bundan əlavə, süni intellekt insanın güclü və zəif tərəflərini müəyyənləşdirə, qərarvermə və düşünmə tərzini analiz edə, sosial mühitdə dostluq, konflikt və kollektiv münasibətlərdə davranışını proqnozlaşdıra bilir. Emosional xüsusiyyətlərin və gizli qalan xarakter cəhətlərinin üzə çıxarılması da bu analizin bir hissəsi hesab olunur.

Eyni zamanda, süni intellekt vasitəsilə insanın hansı arxetipə, məsələn, lider, strateq və ya üsyankar tipə aid olduğu müəyyən edilə bilər. Münasibətlər və iş mühitində potensial risklər və müsbət keyfiyyətlər də qiymətləndirilir, müxtəlif situasiyalarda davranış modeli qurulur.

Eksperimentin nəticələrinə əsasən, süni intellekt yalnız xarakter təsviri verməklə kifayətlənmir, həm də insanın daxili motivlərini, qorxularını və davranış modellərini izah edə bilir.

Bərdə Rayon İcra Hakimiyyəti başçısı aparatının Memarlıq və tikinti şöbəsinin sabiq müdiri – baş memar Toğrul Şadlinskiyə hökm oxunub.

Qaynarinfo-nun məlumatına görə, 1987-ci il təvəllüdlü Toğrul Şadlinskiyə Azərbaycan Respublikası Cinayət Məcəlləsinin 178.2.2, 178.2.3 və 178.2.4-cü maddələri ilə cinayət işi açılıb.

Məlum olub ki, Toğrul Şadlinski Bərdə Rayon İcra Hakimiyyəti başçısı Vidadi İsayevin əmri ilə aparıcı məsləhətçi vəzifəsindən azad olunaraq, 2023-cü ilə qədər Memarlıq və tikinti şöbəsinin müdiri – baş memar vəzifəsində işlədiyi dövrdə bir sıra qanun pozuntularına yol verib. Belə ki, o, vəzifədə olduğu müddətdə İcra Hakimiyyətinin inzibati binasında yerləşən xidməti otağında R.O. adlı şəxsi Bərdədə DOST Mərkəzinə işə düzəldəcəyini vəd edərək 10 000 manat pul alıb və dələduzluq edib.

Bundan başqa, Toğrul Şadlinski öz qulluq mövqeyindən təkrar istifadə edərək sahibkar Cavid Şükürova məxsus Əliyanlı kəndində yerləşən 0,15 hektar kənd təsərrüfatı təyinatlı torpaq sahəsinin təyinatını dəyişdirərək qeyri-yaşayış sahəsi kimi çıxarış alınmasına köməklik göstərəcəyini bildirib və bu yolla 12 500 manat pul ələ keçirib.

Məhkəmədə ifadə verən Toğrul Şadlinski əməlindən peşman olduğunu bildirib. O, hazırda Şamaxıda fəaliyyət göstərən şirkətlərdən birinin filialında sahə mühəndisi işlədiyini və aylıq 2500 manat əmək haqqı aldığını deyib. Təqsirləndirilən şəxs həmçinin zərərçəkmişlərə dəymiş ziyanı hər ay hissə-hissə ödədiyini qeyd edib və bir daha qanunsuz əməl törətməyəcəyinə söz verib. O, məhkəmədən ona qarşı rəhmli olunmasını xahiş edib.

Məhkəmənin hökmü ilə Toğrul Şadlinskiyə 1 il 6 ay müddətinə dövlət, yerli özünüidarəetmə orqanlarında və kommersiya təşkilatlarında maddi məsul və rəhbər vəzifə tutmaq hüququndan məhrum edilməklə, 2 il 11 ay 26 gün müddətinə azadlığın məhdudlaşdırılması cəzası təyin olunub. Cəza müddətindən onun 2 gün həbsdə saxlanıldığı vaxt çıxılıb.

Hökmə əsasən, təqsirləndirilən şəxsin üzərinə bir sıra məhdudiyyətlər qoyulub: hər gün saat 23:00-dan 06:00-dək yaşayış yerini tərk etməmək, elektron nəzarət vasitəsi daşımaq və onun işlək vəziyyətdə saxlanılmasını təmin etmək, Bərdə rayonunun inzibati ərazisini tərk etməmək, məhkəmənin icazəsi olmadan yaşayış yerini dəyişməmək, iş yerini dəyişdiyi halda nəzarət orqanını əvvəlcədən məlumatlandırmaq, kütləvi tədbirlər təşkil etməmək və belə tədbirlərdə iştirak etməmək.

Qeyd edək ki, iki il əvvəl Toğrul Şadlinskinin yaxın qohumu, Bərdə Məşğulluq Mərkəzinin sabiq direktoru Bilman Şadlinski barəsində də Cinayət Məcəlləsinin 179.2.1, 179.2.3, 179.2.4 və 308.1-ci maddələri ilə cinayət işi açılmış və hökm çıxarılmışdı.

Həmçinin onun qohumlarından Fəxrəddin Şadlinski Bərdə Gigiyena və Epidemiologiya Mərkəzinin direktoru, Fəqət Şadlinski isə YAP Bərdə rayon təşkilatının sədridir. Digər yaxınları da rayonda müxtəlif vəzifələrdə çalışıblar.

“Repetitor yanına getmək kifayət deyil, eyni zamanda davamlı məktəbə gedib dərsləri yaxşı oxumaq lazımdır”.

Bu sözləri Bizim.Media-ya açıqlamasında 9-cu sinif şagirdlərinin buraxılış imtahanında maksimum bal toplayan Yevlax şəhər 5 saylı tam orta məktəbin şagirdi Səma Dünyamin qızı Hətəmli söyləyib.

O, birinci sinfə gedəndən dərslərini yaxşı oxuduğunu qeyd edib:

“Mən birinci sinifdə oxuyan vaxtdan dərslərimi yaxşı oxumağa başladım. Doqquzuncu sinifdən etibarən repetitor yanına getdim. Bir çox uşaqlar düşünür ki, yalnız repetitor yanına getməklə yüksək nəticə əldə etmək mümkündür. Amma mən belə düşünmürəm. Məncə, repetitor sadəcə istiqamət göstərən bir dəstəkdir.

Əgər şagird məktəbdə dərslərini diqqətlə oxumasa, müəllimlərini dinləməsə və özü çalışmasa, yüksək nəticə qazanmaq çətin olar. Uğurun əsas sirri insanın öz zəhməti, məsuliyyəti və davamlı çalışmasıdır.

Mən də uğur qazanmaq üçün həm məktəb dərslərimə ciddi yanaşdım, həm də repetitor məşğələlərindən düzgün faydalanmağa çalışdım. Ən böyük arzum prokuror olmaqdır. Arzuma çatmaq üçün ailəm, doğmalarım daima mənə dəstək olurlar”.

O, nəticəsini gördüyü uğurun sirlərindən də danışıb:

“Uğurun sirri hər kəs üçün fərqlidir. Hər insan uğura gedən yolda müxtəlif çətinliklərdən və fərqli mərhələlərdən keçir. Amma ən mühüm məsələ insanın qarşısına məqsəd qoyması və o məqsədə çatmaq üçün əzm, iradə və inamla çalışmasıdır.

Aşağı nəticə əldə etdikdə məyus olmaq yox, əksinə bundan motivasiya almaq daha vacibdir. İnsan zəif olduğu mövzular üzərində daha çox işləməli, özünü inkişaf etdirmək üçün daim çalışmalıdır. Çünki uğur təsadüfən qazanmır — uğur davamlı zəhmətin, səbrin və intizamın nəticəsidir.

Uğur qazanmaq istəyən insan mütəmadi şəkildə çalışmalı, vaxtını düzgün dəyərləndirməli və oxuduğu dərslərin keyfiyyətinə xüsusi önəm verməlidir. Ən əsası isə insan özünə inanmalıdır. İnam və zəhmət bir araya gəldikdə, qarşıya qoyulan məqsədlərə çatmaq mümkündür.”

Səma builki imtahan suallarının onun üçün çox çətin olmadığını, bundan öncə daha ağır testlər işlədiyini də vurğulayıb.