Category: Siyasət

ABŞ-ın Avropa Komandanlığının tərəfdaşlıq, təhlükəsizlik sahəsində əməkdaşlıq və kütləvi qırğın silahlarına qarşı mübarizə üzrə direktor müavini general-mayor Kris Makkininin rəhbərlik etdiyi nümayəndə heyəti Ermənistanda səfərdədir.
 
Bu barədə ABŞ-ın Ermənistandakı səfirliyi məlumat yayıb.
 
Bildirilib ki, nümayəndə heyətinin səfərinin məqsədi 8 avqustda Ağ Evdə keçirilmiş sammitdə əldə olunan razılaşmaların dəstəklənməsidir.
 
Kris Makkini 30 noyabr – 3 dekabr tarixlərində Bakıda səfərdə olub. Səfər çərçivəsində general-mayor Makkini Müdafiə Nazirliyində və Fövqəladə Hallar Nazirliyində görüşlər keçirib.

Ermənistan Milli Assambleyasının sədri Alen Simonyanın yaxın gələcəkdə Ermənistan-Azərbaycan sərhədinin daha bir hissəsinin delimitasiya olunacağı fikrindədir.

Median.Az-ın “Armenpress”ə istinadən xəbərinə görə, o, bu açıqlamanı Beynəlxalq İnsan Hüquqları Gününə həsr olunmuş tədbir çərçivəsində keçirilən brifinqdə verib.

“Deməliyəm ki, bəzi məsələlərdə biz tələsirik, bəzi məsələlərdə Azərbaycan tərəfi tələsir, amma proses davam edir və mən düşünürəm ki, yaxın gələcəkdə biz sərhədin hansısa hissəsini delimitasiya edəcəyik”, – deyə Simonyan bildirib.

O, məhz hansı hissədən söhbət getdiyini deməyib.

Müddətlərə gəldikdə, spiker prosesin gələn ilin birinci rübündə baş tuta biləcəyini ehtimal edib.

Qeyd edək ki, 2024-cü ilin iyun ayında Ermənistan və Azərbaycan delimitasiyanın birinci mərhələsinin başa çatdığını elan ediblər. Birinci mərhələdə Tavuş sektorunda sərhədin 12.6 kilometrlik hissəsi delimitasiya olunub. 2025-ci ilin yanvar ayında Ermənistan və Azərbaycan delimitasiya komissiyaları delimitasiyanın şimal hissədən, Ermənistan Respublikası, Azərbaycan Respublikası və Gürcüstan sərhədlərinin kəsişdiyi nöqtədən, daha sonra cənub istiqamətində, şimaldan cənuba, Ermənistan Respublikası və Azərbaycan Respublikasının İran İslam Respublikası ilə sərhədlərinə qədər davam etdirilməsi barədə razılığa gəliblər.

Ermənistanın baş naziri Nikol Paşinyan tərəflərin 8 avqustda Vaşinqtonda razılıq əldə edildiyi və Ermənistan və ABŞ-nin üzərində birgə işlədiyi TRIPP marşrutunun keçəcəyi hissələrdə delimitasiya işlərini apara biləcələrini istisna etməyib.

Azərbaycanın Almaniyadakı səfiri Nəsimi Ağayev Ermənistanın baş naziri Nikol Paşinyanın Berlinə səfəri çərçivəsində onu erməni dilində salamlayıb.

Bu barədə Ermənistan mətbuatı məlumat yayıb.

Paşinyana ermənicə: “Almaniyaya xoş gəldiniz”, – deyən azərbaycanlı səfir daha sonra ingiliscə danışığa keçib.

Səfirin sözlərinə görə, regionda bir neçə il əvvəl təsəvvür edilməsi çətin olan böyük dəyişikliklər olub:

“Bu, münasibətlərimizdə əldə etdiyimiz ən sabit və dinc dövrdür. Biz övladlarımıza və nəvələrimizə bu ağrılı və uzun sürən münaqişəni miras qoymadıq. Ümid edirəm ki, onlar həmişə sülh şəraitində yaşayacaqlar. Əlbəttə ki, Azərbaycan sülh gündəliyinin təşəbbüskarı olub”.

O, Vaşinqton razılaşmalarının tam şəkildə yerinə yetiriləcəyinə ümid etdiyini də bildirib. Bu razılaşmaya Azərbaycanın əsas hissəsi və Naxçıvan bölgəsi arasında maneəsiz gediş-gəlişi təmin edəcək “Tramp marşrutu” (TRIPP) daxildir.

Ağayev son maneəni də xatırladıb: Ermənistan konstitusiyasına dəyişiklik edilməsi.

“Ümid edirik ki, bu da öz həllini tapacaq ki, biz sülh müqaviləsini rəsmən imzalaya bilək”, – deyə Ağayev bildirib.

Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva rəsmi “Instagram” hesabında Heydər Əliyev Mərkəzində keçirilən “İslam dünyasında süni intellekt indeksinin təqdimatı” adlı beynəlxalq konfransdan paylaşım edib.

Median.Az həmin paylaşımı təqdim edir:

Milli Məclisin növbəti plenar iclası başlayıb.

Parlamentdə növbəti ilin büdcə zərfi müzakirə edilir.

İclasda Baş nazir Əli Əsədov da iştirak edir.
//oxu.az

Dekabrın 8-də Heydər Əliyev Fondunun vitse-prezidenti Leyla Əliyeva və Həmdan Bin Rəşid Əl Maktum Fondunun ali sədri Şeyx Rəşid bin Həmdan bin Rəşid Əl Maktum arasında görüş keçirilib.

Median.Az AZƏRTAC-a istinadən xəbər verir ki, Bakıda keçirilən “İslam dünyasında süni intellekt indeksinin təqdimatı” konfransında iştirakdan məmnunluğunu bildirən Şeyx Rəşid bin Həmdan bin Rəşid Əl Maktum süni intellekt üzrə tədbirlərin, bu sahədə əməkdaşlığın genişləndirilməsinin əhəmiyyətini vurğulayıb, təhsil və sosial sahədə icra edilən proqram və layihələrin önəmindən danışıb.

Heydər Əliyev Fondunun vitse-prezidenti Leyla Əliyeva hər iki qurum arasında əməkdaşlıq perspektivlərinin vacibliyini diqqətə çatdırıb.

Şeyx Rəşid bin Həmdan bin Rəşid Əl Maktum Heydər Əliyev Fondunun İslam dünyasında və digər ölkələrdə təhsil, sosial dəstək layihələri üzrə “Həmdan-ICESCO” mükafatına layiq görülməsi münasibətilə bir daha təbriklərini çatdırıb.

Leyla Əliyeva Heydər Əliyev Fondunun fəaliyyəti dövründə təhsil və sosial sahələrə hər zaman önəm verdiyini qeyd edib, Fondun “Həmdan-ICESCO” mükafatı ilə təltif olunmasına görə minnətdarlığını ifadə edib.