Month: July 2020

Gecə saatlarında Bərdə və Zaqatalada yanğın qeydə alınıb.

Bununla bağlı Fövqəladə Hallar Nazirliyindən məlumat verilib.

Bildirilib ki, Bərdə rayonunun Gərənə kəndində ümumi sahəsi 48 kvadrat metr olan birmərtəbəli dördotaqlı, Zaqatala rayonunun isə Çobankol kəndində ümumi sahəsi 156 kvadrat metr olan kürsülü birmərtəbəli beşotaqlı evin yanar konstruksiyaları yanıb.

Yaxınlıqdakı tikililər yanğından mühafizə olunub. Yanğın söndürülüb.

Ağstafa sakini özünə xəsarət yetirib.

APA-nın məlumatına görə, hadisə rayonun Qaçaq Kərəm kəndində qeydə alınıb.

Kənd sakini, 1991-ci il təvəllüdlü Aslan Vəliyev qolunun və bədəninin kəsilmiş yarası ilə xəstəxanaya yerləşdirilib. Ona zəruri tibbi yardım göstərilib, yaraları tikilib. Vəziyyətinin normal olduğu bildirilir.

Hadisənin hansı səbəbdən törədildiyi məlum deyil.

Faktla bağlı araşdırma aparılır.

Bakıda vətəndaşa qarşı küçədə quldurluq edilib.

Trend-in məlumatına görə, paytaxtın Sabunçu rayonu, Sabunçu qəsəbəsində naməlum şəxs Bakı şəhər sakini T. Zeynalovu bıçaqla hədələyərək, 500 manat pulunu quldurluq yolu ilə talayıb.

Sabunçu Rayon Polis İdarəsinin əməkdaşları tərəfindən hadisəni törətməkdə şübhəli bilinən, əvvəllər məhkum olunmuş, 1990-cı il təvəllüdlü Teymur Şahlıyev tutulub.

Faktla bağlı cinayət işi başlanıb.

Bakının məşhur klinikalarından olan “EGE Hospital”ın kardiocərrahiyyə şöbəsində ağlasığmaz hadisə baş verib.

Klinikanın kardiocərrahı Ülvi Mirzoyev 67 yaşlı Əliyəsər Xasməmmədovun səhv əməliyyat nəticəsində ölümü və həkimlik etikasına sığmayan hərəkətlərinə görə ailəsi tərəfindən günahlandırılır.

Medicina.az məhrumun ailə üzvlərinin şikayətini olduğu kimi təqdim edir:

“İyunun 24-də atamızı ürəyində narahatlığı ilə bağlı “EGE Hospital”a – Ülvi Mirzoyevin qəbuluna apardıq. Guya bu həkim adlı-sanlı, stend qoymaq üzrə peşəkar həkim idi. Atamı dərhal Anju (angioqrafiya) etdirən həkim çıxıb dedi ki, 98% damarları tıxanıb, bunu belə qoymaq olmaz. İmkan varsa, elə bu gün stend qoyaq, xəstəni ikinci dəfə incitməyək.

Biz razılaşdıq, sonra həkim dedi ki, atanıza 6 stend qoyulmalıdır, 10 min manat edir. Biz təəccübləndik ki, bir dəfəyə bu qədər stend olarmı? Dedi, hətta 8-ni birdən qoyduğumuz xəstə olub. İnandıq. Pulu gətirdik.

3 gündən sonra atam evə yazıldı, 4-cü gecə onun ürəyi tutdu. Təcili yardım çağırdıq, onlar da təəccübləndilər ki, 6 stendi birdəfəyə niyə qoyublar. Olmaz axı.

Atamı heç yerə aparmadılar. Səhər öz ayağı ilə Ülvinin yanına getdi. Kassada 1500 manat yenidən ödəyib, Ülvi baxıb deyib ki, təcili açıq ürək əməliyyatı lazımdır.

Həkim anama sənədlər gətirib ki, əməliyyata razılıq verməsi ilə bağlı imza atsın. Anam deyib, qoy xəstəni görüm, sonra. İstəyib atamla məsləhətləşsin, ya görsün vəziyyəti necədir.

Həmin an həkim əməliyyatxanaya qayıdıb, 3 dəqiqəyə geri gəlib ki, xəstə öldü.

Deməli, bu vicdansızlar anama sənədə qol çəkdirib, pulu da alıb, ölmüş adamı guya əməliyyat edəcəkdi, sonra da deyəcəkdi, əməliyyatdan çıxmadı.

Xəbər ailəmizə çatanda klinikaya getdik, Ülvi maşınına minib qaçmışdı.

Biz başımızı itirmişdik, hələ meyiti təhvil almamışdıq. Bizə dedilər ki, Ülvi öz cibindən 200 manat verib, atamin meyitini təcili yardımla məscidə – yuyub, kəfənləməyə göndərib. Ordan da tapşırıb ki, rayona apararsız.

Biz bunu eşidəndə dəli olduq. Axı kim icazə verib ki, klinika ailəsinin izni, xəbəri olmadan meyiti harasa göndərsin? Biz Bakıda yaşayırıq. Atamı rayona hara göndərmək istəyib? Ya bu həkimin ağlı qaçıb, ya bizim?

Bu nə vəhşilikdir, bu nə qəddarlıqdır?

Hər kəsə demək istəyirik ki, biz səhv etdik, nə bu klinikaya, nə o cəllad Ülvi kardiocərraha müraciət etməyin. Diqqətli olun, hər əməliyyata razılaşmayın”.

Ailə hazırda dəfn və yas işləri ilə məşğul olduğundan yaxın 1-2 gündə məsələ ilə bağlı prokurorluğa müraciət edəcək. Ailə üzvləri “EGE Hospital”ın rəhbərliyindən açıqlama və maddi təzminat tələb edir.

“Bəhram Bağırzadənin vəziyyətində son günlər müşahidə edilən müsbət dinamika qalmaqdadır”.

Bu barədə Oxu.Az-a Mərkəzi Gömrük Hospitalının rəisinin müalicə işləri üzrə müavini Bəxtiyar Musayev məlumat verib. O bildirib ki, Əməkdar artistin huşu aydındır:

“Əzələ zəifliyi qeyd edilsə də, artıq oturur, fəaldır. Aktiv hərəkətlərə cəhd edir. Bakterial ağırlaşmalar və mədə-bağırsaq sistemində müşahidə edilən durğunluğa qarşı isə müvafiq tədbirlərin aparılması davam etdirilir”.