Month: March 2021

Qonşuları ilə mehriban yaşamaq ənənəsinə heç zaman sahib olmayan ermənilər, heç öz aralarında da sülh içində yaşamağı bacarmırlar. Bu dəfə Xankəndidə yerləşən “Sofiya” adlı ticarət mərkəzində ermənilər arasında kütləvi dava baş verib.

Bu barədə Ermənistan mətbuatı məlumat yayıb.

Hadisə martın 30-da baş verib. Ticarət mərkəzində baş vermiş davada tərəflər bir-birinə bıçaq xəsarətləri yetiriblər. Yaralanan Ermənistanın Ararat vilayət sakini 31 yaşlı A.M, paytaxt İrəvandan gəlmiş 44 yaşlı A.Karapetyan, həmçinin Xankəndi sakini S.Akopyan xəstəxanaya çatdırılıb.

Polisin verdiyi məlumata əsasən dava S.Akopyan və Ararat sakini A.M-in paytaxtdan gəlmə A.Karapetyanla mübahisə yaranması nəticəsində alovlanıb və başqa bir neçə nəfər də kütləvi davaya qoşulub.

Görünən odur ki, davanın paytaxtdan gəlmə erməni ilə əyalətdə yaşayan və İrəvandakıların yağ-bal içində yaşadığını zənn edən Ermənistan vətəndaşı, həmçinin Qarabağda yeni reallıqları qəbul edərək yaşamağa qərar vermiş erməni sakin arasında olması da heç də təsadüfi deyil. Bu xalqın öz içində hər zaman bir-birinə paxıllıq hissinin olması bir yana qalsın, heç İrəvan erməniləri də Ermənistanın əyalətlərində yaşayanları və Qarabağda məskunlaşan erməniləri sevməyiblər.

Bununla bağlı bir çox faktları sadalamaq mümkündür. Hələ Birinci Qarabağ müharibəsindən sonra ermənilərin özlərinin apardıqları çəkilişlərdə Qarabağda yaşayan ermənilərlə Ermənistandakı ermənilər arasındakı ayrı-seçkiliyin mövcudluğunun əks olunduğu, bununla bağlı fikirlərin səsləndirildiyi kadrları tapmaq heç də çətin deyil.

İndi isə paytaxtdakıların Qarabağdakıları, Qarabağdakıların isə İrəvandakı erməniləri bütün bəla və müsibətlərdə təqsirli bildiyi bir şəraitdə aradakı ədavətin bu tip kiçik münaqişələr şəklində özünü büruzə verməsi tamamilə təbii bir prosesdir.

Digər maraqlı bir məqam isə Ermənistan vətəndaşlarının buraya sərbəst daxil olmasıdır. Sözügedən faktda adı hallanan üç nəfərdən ikisi Qarabağa Ermənistandan gəlib. Yəni Azərbaycan ərazisinə sülhməramlıların nəzarət etdiyi dəhliz vasitəsilə daxil olublar. Bu baxımdan onların Qarabağ ərazisində olmasının özü də bir çox mübahisələrə açıq olan sual doğurur.

Azərbaycan Ordusunun hərbi qulluqçusu İlkin Zöhrabov həlak olub.

Bu barədə Oxu.Az-a Müdafiə Nazirliyinin mətbuat xidmətindən bildirilib. Hadisə martın 22-də baş verib.

Faktla bağlı araşdırma aparılır.

Mərhum Masallı rayonu Ərkivan qəsəbəsində dəfn olunub.

Düşənbədə keçirilən “Asiyanın ürəyi – İstanbul prosesi” 9-cu Nazirlər Konfransı çərçivəsində Azərbaycan Xarici İşlər naziri Ceyhun Bayramov Əfqanıstan İslam Respublikasının Prezidenti Məhəmməd Əşrəf Qəni ilə görüşüb.

Bu barədə Azərbaycan XİN-in məlumatında deyilir.

Əfqanistan rəhbəri Azərbaycanı böyük Qələbə münasibətilə təbrik edərək, bu zəfərin beynəlxalq hüququn qalibiyyəti olduğunu vurğulayıb.

Bu xüsusda, cənab Məhəmməd Əşrəf Qəni Azərbaycan Respublikasının Prezidenti cənab İlham Əliyevə xüsusi təbriklərini çatdırıb.

Məhəmməd Əşrəf Qəni Azərbaycanın işğaldan azad edilmiş ərazilərində törədilmiş dağıntıların miqyasından xəbərdar olduğunu və bunun təəssüf doğurduğunu qeyd edib.

Nazir Ceyhun Bayramov Azərbaycanın işğaldan azad edilmiş ərazilərində həyata keçirilən yenidənqurma və bərpa işlərindən bəhs edərək, yaxın gələcəkdə həyatın bu ərazilərə geri qayıdacağını vurğulayıb.

Tərəflər Azərbaycan və Əfqanıstan arasında ikitərəfli münasibətlərin inkişafını məmnunluqla qeyd ediblər.

ASAN xidmətin Əfqanıstanda fəaliyyətə başlaması və gələcəkdə bu xidmətin daha geniş sahələri əhatə etməsi niyyəti, ADA Universitetində gənc əfqan diplomatları üçün təlimlərin davam etdirilməsi, habelə Lapis-Lazuli beynəlxalq nəqliyyat dəhlizinin əhəmiyyəti kimi mövzular ətrafında fikir mübadiləsi aparılıb.

Azərbaycan Respublikası Qida Təhlükəsizliyi Agentliyi Tərtər rayonunun Seydimli kəndində fermada xırdabuynuzlu heyvanların kütləvi tələf olunması ilə bağlı açıqlama verib.

AQTA-dan Oxu.Az-ın sorğusuna cavab olaraq bildirilib ki, agentliyin “1003 – Çağrı Mərkəzi”nə Tərtər rayon, Seydimli kənd sakini Mədətov Ramiz Cavanşir oğluna məxsus təsərrüfatda heyvanların tələf olması ilə bağlı daxil olmuş məlumat əsasında qurumun mütəxəssisləri tərəfindən aidiyyəti qurumların, o cümlədən Kənd Təsərrüfatı Nazirliyi yanında Aqrar Xidmətlər Agentliyinin əməkdaşları ilə birlikdə həmin təsərrüfatda araşdırma aparılıb:

“Araşdırma zamanı heyvanlarda tələfat olduğu müəyyən edilib, kliniki müayinələr aparılıb və tələf olmuş heyvanlardan nümunələr götürülərək müayinə olunması üçün Azərbaycan Qida Təhlükəsizliyi İnstitutunun müvafiq laboratoriyasına təqdim olunub.

Aparılan laborator müayinələrin nəticələrinə əsasən, nümunələrdə fasiolyoz xəstəliyinin (helmint xəstəliyi) törədicisi aşkar edilib. Təsərrüfatda mütəxəssislər tərəfindən müvafiq baytarlıq tədbirləri yerinə yetirilib və təsərrüfatın sağlamlaşdırılması ilə bağlı lazımi işlər həyata keçirilib”.

“Hazırda sözügedən təsərrüfatda xırdabuynuzlu heyvanlar arasında tələfatın qarşısı alınıb.
Agentlik bir daha vətəndaşlara diqqətli olmağı, heyvanlarda rast gəlinən xəstəlik halları barədə dərhal Agentliyin “1003 – Çağrı Mərkəzi”nə məlumat verməyi tövsiyə edir”, – deyə AQTA-dan qeyd edilib.