Month: March 2021

Martın 4-də Milli Məclisin Ailə, qadın və uşaq məsələləri komitəsində “Gender (kişi və qadın) bərabərliyinin təminatları haqqında” qanunun icra vəziyyəti: imkan və çətinliklər” mövzusunda dinləmə keçirilib.

Bu barədə Milli Məclis məlumat yayıb.

Tədbirdə Milli Məclisin deputatları, dövlət qurumlarının və vətəndaş cəmiyyətinin nümayəndələri iştirak ediblər.

Parlamentin komitə sədri Hicran Hüseynova bildirib ki, zaman keçdikcə yeni tələblər və çağırışlar meydana gəlib, mövcud qanunlara yenidən nəzər salmaq və qanunun tətbiqi təcrübəsində yaranmış boşluqları müəyyənləşdirmək zərurətə çevrilib.

“Həmçinin 2020-ci ilin dekabrında Milli Məclisdə ilk dəfə olaraq “Gender (kişi və qadın) bərabərliyinin təminatları haqqında” qanuna dair hesabat dinlənilib. Həmin hesabatda qanunun icra mexanizminin təkmilləşdirilməsinə, sənədə bir sıra əlavə və dəyişiklik edilməsinə ehtiyac olduğu üzə çıxıb”, – deyə H.Hüseynova əlavə edib.

Sonra tədbirdə geniş məruzə edən Ailə, Qadın və Uşaq Problemləri üzrə Dövlət Komitəsinin sədri Bahar Muradova fikirlərini açıqlayıb. O, “Gender (kişi və qadın) bərabərliyinin təminatları haqqında” qanunun icrasında mövcud olan imkan və çətinliklər barədə danışıb.

Qeyd edib ki, günün tələbləri baxımından bu qanunun yenilənməyə ciddi ehtiyacı var.

“Ötən 15 ildə beynəlxalq səviyyədə üzərimizə götürdüyümüz öhdəliklər, Azərbaycanın özünün inkişafından doğan məsələlər, bugünkü həyatımızın diktə etdiyi yeni məqamlar ciddi şəkildə nəzərə alınmalıdır. Zamanın və həyatımızda baş verən inkişafın qarşıya qoyduğu yeni tələblərə və çağırışlara cavab verməliyik. Pandemiya və müharibə dövrü bizə gender bərabərliyi sahəsindəki çətinliklərimizin nədən ibarət olduğunu göstərdi”.

Bahar Muradova vurğulayıb ki, qanunların icrasına məsul olan bütün qurumların fəaliyyətində, tərtib etdikləri bütün hesabatlarda, apardıqları bütün təhlillərdə gender məsələsinə həssas yanaşma nümayiş etdirilməlidir. Bu, dayanıqlı inkişaf məqsədlərində də nəzərdə tutulub.

Sonra dinləmədə təhsil nazirinin müavini Firudin Qurbanovun “Təhsildə gender bərabərliyinin təmin olunması”, daxili işlər nazirinin müavini İsmət Əliyevin “Hüquq-mühafizə müstəvisində gender bərabərliyinin təmini”, əmək və əhalinin sosial müdafiəsi nazirinin müavini Anar Kərimovun “Əmək qanunvericiliyi sahəsində gender bərabərliyinin gələcək təminatları” mövzularında məruzələri dinlənilib. Məruzəçilər sözü gedən qanunla bağlı bir sıra təkliflər irəli sürüblər.

Xalq artisti İlhamə Quliyevanın oğlu Orxan Nadirov Azərbaycandan köçüb.

Bu barədə Lent.az-a İ.Quliyevanın yaxınları xəbər verib.

Bildirilib ki, Orxan bundan sonra Ukraynada yaşayacaq. O, artıq uzun müddətdir oradadır.

Qeyd edək ki, İlhamə Quliyeva 2016-cı il fevralın 25-də tromboemboliyadan vəfat edib. Xalq artistinin ölümündən sonra Orxan vərəsəlik üçün məhkəməyə müraciət etmişdi. Məhkəmə isə İ.Quliyevanın mirasını bacılarına verib.

“Dünyada ənənəvi təhsildən distant təhsilə keçidin insan kapitalına təsiri barədə tədqiqatlar aparılır. İngiltərədə bildirilir ki, yaxın 10 ildə 40 minə yaxın müəllim ixtisar olunacaq və bu, adaptasiya prosesi ilə əlaqədar olacaq”.

Bunu ARB24-ün “İşgüzar səhər” verilişinə açıqlamasında təhsil eksperti və millət vəkili Etibar Əliyev deyib.

“Həm ənənəvi, həm də distant təhsilin tətbiqi, onların bir-birini tamamlaması müəllim bacarıqları ilə bağlı məsələləri gündəmə gətirib. Bu işin əhəmiyyəti isə o oldu ki, pandemiya olmasa belə, mütləq İKT alətlərinin təhsildə mütəmadi tətbiqi zəruridir. Hesab edirəm ki, bundan sonrakı mərhələdə ənənəvi və distant təhsil formaları bir-birini tamamlayaraq daha yaxşı mütəxəssis və şagird hazırlığına öz töhfəsini verəcək”, – deyə o bildirib.

Bir sıra istiqamətlərdə ictimai nəqliyyatın hərəkəti dəyişdiriləcək.

Bu barədə Bakı Nəqliyyat Agentliyindən (BNA) bildirilib.

Bildirilib ki, bu gün aparılan təmir-bərpa işləri ilə əlaqədar olaraq, Xudu Məmmədov küçəsi Vunqtau küçəsinin kəsişməsindən “Həzi Aslanov” metrostansiyası istiqamətində nəqliyyat vasitələrinin hərəkətinə tətbiq edilən məhdudiyyət səbəbindən M1, M2, M6 və 104 nömrəli müntəzəm marşrutların hərəkət sxemləri müvəqqəti dəyişdirilib:

– M2 nömrəli ekspres marşrut “Həzi Aslanov“ metrostansiyası istiqamətində Ukrayna dairəsi – Vunqtau küçəsi – Sadıqcan küçəsi – Xudu Məmmədov küçəsi – Məhəmməd Hadi küçəsi, daha sonra öz sxemi üzrə;

– M1 və M6 nömrəli ekspres marşrutlar “Həzi Aslanov“ metrostansiyası istiqamətində Ukrayna dairəsi – Məhəmməd Hadi küçəsi, daha sonra geriyə dönmə manevri etməklə öz sxemi üzrə;

– 104 nömrəli müntəzəm marşrut “Həzi Aslanov“ metrostansiyası istiqamətində Gəncə prospekti – Vunqtau küçəsi – Ukrayna dairəsi – Məhəmməd Hadi küçəsi, daha sonra geriyə dönmə manevri etməklə öz sxemi üzrə hərəkət edəcək.