Month: March 2021

Azərbaycan Respublikasının müdafiə sənayesi naziri Mədət Quliyev Pakistanın Birləşmiş Qərargah Rəisləri Komitəsi sədri, general Nadim Razanın başçılıq etdiyi nümayəndə heyətini qəbul edib.

Bu barədə Nazirlik məlumat yayıb.

Bildirilib ki, görüşdə Azərbaycan və Pakistan arasında hərbi-texniki sahədə əlaqələrin cari vəziyyəti və gələcək əməkdaşlıq perspektivləri müzakirə edilib.

Daha sonra Mədət Quliyev Azərbaycanın 44 günlük Vətən müharibəsində əldə etdiyi böyük Zəfərdən söz açıb. Pakistanın Azərbaycanın ərazi bütövlüyünün bərpası uğrunda apardığı haqlı mübarizədə daim xalqımızın yanında olduğunu vurğulayan nazir dost ölkənin siyasi, mənəvi dəstəyini və qəti mövqeyini yüksək qiymətləndirib.

Qonaqlar həmçinin Ermənistanın işğalı nəticəsində Azərbaycana vurulmuş maddi və mənəvi zərər barədə məlumatlandırılıblar.

Nümayəndə heyətinin tərkibində yer alan Pakistan İslam Respublikasının ölkəmizdəki fövqəladə və səlahiyyətli səfiri Bilal Yaheen Azərbaycan və Pakistan arasında siyasi və digər sahələrdə, o cümlədən hərbi sahədə əməkdaşlığın inkişafı istiqamətində səylərin birləşdiriləcəyindən və bu əlaqələrin dünyada sülhün bərqərar olunması işinə böyük töhfə verəcəyindən əminliyini bildirib.

Son vaxtlar Bakı şəhərində baş verən intihar hadisələrində maraqlı situasiya üzə çıxır. İntihar edən şəxs özünü binadan atarkən avtomobilin üzərinə düşür və avtomobilə kifayət qədər ciddi ziyan dəyir. Belə olan halda ortaya sual çıxır: İntihar edən şəxs dünyasını dəyişərsə avtomobilə dəymiş ziyan kim tərəfindən ödənilməldir?

Əgər avtomobilin kasko sığortası varsa həmin kasko sığorta çərçivəsində sığorta təminatı alına bilər. Çünki bu dəymiş ziyandır. Əgər avtomobilin kasko sığortası yoxdursa onda dəymiş ziyanı iki variantla almaq mümkün olur.

Birinci variant ondan ibarətdir ki, intihar edənlərin bəziləri çox nadir halda ola bilər ki, onu intihara kimsə sövq eləyib. Qüvvədə olan Cinayət Məcəlləsində özünü öldürmə həddinə çatdırma ilə bağlı müddəa mövcuddur. Həmin cinayətdə kiminsə təqsiri olduğu sübuta yetirilsə, özünü öldürmə həddinə çatdıran adam həm də özünü öldürmə ilə bağlı dəymiş ziyanı da qarşılamalıdır. Nəzəri cəhətdən bu mümkündür. Lakin bu, intihar hadisələrinin demək olar ki, mində birində sübuta yetirilir.

İkinci variant da onda ibarətdir ki, intihar edən şəxs sadəcə öz iradəsi ilə öz həyatına qəsd edib. Belə olan halda nəzəri cəhətdən mümkündür ki, Mülki Məcəlləyə görə onun miras aktivləri qalıbsa (mülkü və ya bankda pulu qalıbsa) həmin miras aktivləri çərçivəsində zərərçəkmiş onun varislərindən maddi ziyanın ödənilməsini tələb etsin. Amma miras aktivləri yoxdursa bu zaman özünə qəsd edən şəxsin ailə üzvlərindən dəymiş ziyanın əvəzinin ödənilməsi tələb edilə bilməz. Yəni məlum olsa ki, intihar edən şəxsin məsələn bankda 50.000 manat pulu və ya evi, maşını var, o zaman zərərçəkmiş şəxs dəymiş ziyanı onun ailəsindən tələb edə bilər.

Yeni Azərbaycan Partiyasının sabah keçiriləcək qurultayına dair maraqlı məlumatlar əldə olunub. Ölkə gündəminin əsas mövzularından olan qurultayla bağlı bütün xəbərlər hazırda informasiya məkanında liderlik edir.

Sfera.az bildirir ki, Musavat.com-un əldə etdiyi məlumata görə, Azərbaycanın müxalif cizgili, yaxud da müstəqil sayılan 4 partiyası sabahkı qurultayda Yeni Azərbaycan Partiyasına qoşulacaq.

– Azərbaycan Demokratik Sahibkarlar Partiyası, sədri Qasım Qasımov,
– Azərbaycan Kəndli Partiyası, sədri Məmməd Məmmədov,
– Azərbaycan Xalq Demokratik Partiyası, sədri Rafiq Turabxan,
– Azərbaycan Yurddaş Partiyası, sədri Gülay Quliyeva.

Partiyaların dördü də qoşulma proseduru üçün özlərinin müvafiq qurultaylarını keçirdiblər.

Sabah Bakıda və Abşeron yarımadasında buludlu hava şəraitinin üstünlük təşkil edəcəyi, bəzi yerlərdə yağış yağacağı, gündüz tədricən kəsiləcəyi gözlənilir.

Ekologiya və Təbii Sərvətlər Nazirliyinin Milli Hidrometeorologiya Xidmətindən verilən məlumata görə, sabah cənub küləyi əsəcək.

Havanın temperaturu Bakıda və Abşeron yarımadasında gecə 4-6, gündüz 6-8 dərəcə isti olacaq. Atmosfer təzyiqi normadan yüksək 768 mm civə sütunundan 764 mm civə sütununa enəcək, nisbi rütubət 70-80 faiz təşkil edəcək.

Azərbaycanın rayonlarında hava şəraitinin arabir yağıntılı olacağı, bəzi yerlərdə qar yağacağı, gündüz tədricən kəsiləcəyi gözlənilir. Bəzi yerlərdə duman olacaq, mülayim qərb küləyi əsəcək.

Havanın temperaturu gecə 2-6, gündüz 8-13 dərəcə isti, dağlarda gecə 2-7 dərəcə şaxta, gündüz 3-8 dərəcə isti olacaq.

Tibbi-meteoroloji proqnoza gəlincə, martın 5-də Abşeron yarımadasında meteoroloji amillərin zəif və mülayim tərəddüdü gözlənilir ki, bu da meteohəssas insanlar üçün əsasən əlverişlidir.

1990-cı illərin əvvəllərində Ağdamda həyat qaynayırdı, amma indi böyük xarabalığa çevrilib.

Bu barədə BBC-nin Ağdamdan hazırladığı reportajda bildirilir.

Süjetdə 1993-cü ildə burada şiddətli döyüşlərin olduğu, 2020-ci ildə isə Azərbaycanın bu ərazini Dağlıq Qarabağda hərbi əməliyyatların dayandırılmasına dair son razılaşmaya əsasən qaytardığı xatırladılır.

Kadrlarda Birinci Qarabağ müharibəsi zamanı ayağından yaralanan, o vaxtdan bəri məcburi köçkünlər üçün yataqxanada yaşayan Natiq Allahyarov təqribən 30 ildən sonra öz yurduna qayıtmasının təəssüratlarını bölüşür.