Month: April 2021

Aprelin 1-dən etibarən Bakı və Sumqayıt şəhərlərində, Abşeron rayonunda rəsmi qeydiyyatda olan əhali icbari tibbi sığortanın Xidmətlər Zərfinə daxil olan 2550 sayda tibbi xidmətdən istifadə edəcək.

Median.Az xəbər verir ki, baku.ws icbari tibbi sığortadan yararlanmaq istəyən vətəndaşların hansı proseduru keçməli olduğunu araşdırıb.

İlk növbədə aprelin 1-dən etibarən təcili və təxirəsalınmaz tibbi yardım istisna olmaqla, vətəndaşlar səhhətində yaranan narahatlıqla bağlı ilk növbədə ailə həkiminə müraciət edilməlidir. İlkin səhiyyə müəssisələrinə poliklinika, Ailə Sağlamlıq Mərkəzi və həkim tibb məntəqələri aiddir.

Daha sonra bu müəssisələrdə çalışan ailə həkimləri xəstəni müalicə və müayinə edirlər. Ehtiyac olduqda diaqnostik müayinələrin aparılması üçün göndəriş vərəqəsi ilə təmin edirlər.

Xidmətlər zərfinə bunlar daxildir:

İlkin səhiyyə xidməti
Təcili və təxirəsalınmaz tibbi yardım xidməti
İxtisaslaşdırılmış ambulator yardım xidməti
Laboratoriya
Fizioterapiya
Stasionar tibbi xidmətlər
Xidmətlər zərfində olan, lakin TƏBİB-in nəzdindəki tibb müəssisəsində göstərilməsi mümkün olmayan tibbi xidmətlər üçün göndəriş vərəqəsi verilir. Bu vərəqənin etibarlılıq müddəti 10 iş günüdür və həmin vərəqə TƏBİB-in nəzdindəki tibb müəssisəsi tərəfindən verilir. İcbari Tibbi Sığorta üzrə Dövlət Agentliyinin müqavilə bağladığı tibb müəssisələrində göndəriş vərəqəsi ilə tibbi xidmət almaq mümkündür.

Bakı, Sumqayıt şəhərləri və Abşeron rayonu ərazisində bu gündən tətbiq olunan icbari tibbi xidmət zamanı vətəndaşların istifadə edə biləcəyi xidmətlərin bir hissəsini təqdim edirik:

Yoluxucu xəstəliklər mənbəyində xəstə ilə təmasda olan şəxslər arasında profilaktik müayinələrin aparılması və/və ya ehtiyac yaranarsa, müvafiq ixtisas həkiminə göndərişlərin verilməsi
Uroloqun müayinəsi USM ilə
Ginekoloqun müayinəsi USM ilə
Göz yaşı kanalının açılması, uşaqlarda
Doğuşa əllə yardım – Normal doğuş
Klassik qeysəriyyə kəsiyi əməliyyatı (qeysəriyyə kəsiyi əməliyyatı və dölün çıxarılması)
Epilepsiya əməliyyatı materialı müayinəsi
Onurğa beyni strukturlarında digər bərpa xarakterli və plastik əməliyyatlar
Qaraciyər koması ilə ağırlaşan A hepatiti
Qaraciyər koması baş vermədən müşayiət olunan delta-amilli (koinfeksiya) kəskin B hepatiti
Boyun şöbəsinin fəqərəarası disklərinin radikulopatiya ilə zədələnməsi
Fəqərə sınığının bərpası (osteosintez)
İnsulindən asılı şəkərli diabet, koma ilə
Yumurtalıqlarda aparılan diaqnostik prosedurlar (diaqnostik laparoskopiya)
Sünnət
Döl və yenidoğulmuşun, ananın alkoqollu içkilərdən istifadə etməsi ilə əlaqədar zədələnmələri
Ürək qapağı protezi ilə bağlı mexaniki mənşəli ağırlaşma
Uşaqlıq, gənclik və presenil katarakta

Qeyd edək ki, “İcbari tibbi sığorta üzrə Xidmətlər Zərfi”nin tam siyahısına BURADAN baxa bilərsiniz.

Gəncədə avtomobil ustası mübahisə zəminində müştərisinə xəsarət yetirib.

“Report”un məlumatına görə, hadisə Gəncə şəhər ərazisində yerləşən avtomobil sexlərinin birində baş verib.

Daşkəsən rayon sakini, 1983-cü il təvəllüdlü Emin İsmayılovla avtomobilini təmir edən usta arasında ödəniləcək vəsaitlə bağlı mübahisə yaranıb.

Bu zaman avtomobil ustası müştərisinə kəsici alətlə xəsarət yetirib. Xəstəxanaya aparılan E.İsmayılovun vəziyyətinin normal olduğu bildirilir.

Faktla bağlı araşdırma aparılır.

Aprelin 2-də gözlənilən hava şəraiti açıqlanıb.

Ekologiya və Təbii Sərvətlər Nazirliyinin Milli Hidrometeorologiya Xidmətinin verdiyi məlumata görə sabah Bakıda və Abşeron yarımadasında havanın dəyişkən buludlu olacağı, əsasən yağmursuz keçəcəyi gözlənilir. Səhər bəzi yerlərdə zəif duman olacaq, cənub-qərb küləyi əsəcək, axşam mülayim şimal-qərb küləyi ilə əvəz olunacaq.

Havanın temperaturu Abşeron yarımadasında gecə 8-10, gündüz 14-19, Bakıda gecə 8-10, gündüz 16-18 dərəcə isti olacaq. Atmosfer təzyiqi 760 mm civə sütunundan 755 mm civə sütununa enəcək, nisbi rütubət gecə 70-80, gündüz 50-55 faiz təşkil edəcək.

Aprelin 2-də Azərbaycanın rayonlarında havanın əsasən yağmursuz keçəcəyi, lakin bəzi dağlıq və dağətəyi rayonlarda şimşək çaxacağı, arabir yağış yağacağı gözlənilir. Dolu düşəcəyi, dağlıq ərazilərdə qar yağacağı ehtimalı var. Ayrı-ayrı yerlərdə duman olacaq, mülayim qərb küləyi əsəcək.

Havanın temperaturu gecə 4-8, gündüz 17-22, dağlarda gecə 0-5 dərəcə isti, yüksək dağlıq ərazilərdə 4 dərəcə şaxta, gündüz 5-10, bəzi yerlərdə 13-16 dərəcə isti olacaq.

Aprelin 2-də Abşeron yarımadasında meteoroloji amillərin mülayim tərəddüdü gözlənilir ki, bu da meteohəssas insanlar üçün əsasən əlverişlidir.

Bakıda dələduz xeyli sayda insanı aldadıb.

Bu barədə Oxu.Az-ın redaksiyasına müraciət ünvanlanıb. Xəzər rayonu, Binə qəsəbəsi yeni yaşayış massivində yaşayan sakinlərdən birinin sözlərinə görə, özünü “Azəriqaz” İstehsalat Birliyinin (İB) nümayəndəsi kimi təqdim edən şəxs onlardan sayğacın dəyişdirilməsi üçün pul alıb:

“Bizdə hazırda mexaniki qaz sayğacıdır. Özünün “Azəriqaz” İB-nin əməkdaşı kimi təqdim edən şəxs hazırkı sayğacları Smart-kart tipli sayğaclarla əvəz edəcəyini deyərək bizdən 100 AZN məbləğində pul alıb. Şəxsin foto və videogörüntüləri var. Biz bu barədə rəsmi olaraq Daxili İşlər Nazirliyinin “102” Zəng Mərkəzinə də müraciət etmişik”.

Məsələ ilə bağlı “Azəriqaz” İB-nin mətbuat xidmətinin rəhbəri Ceyhun Səfərova sorğu ünvanladıq. O, Oxu.Az-ın sorğusuna cavab olaraq bildirib ki, üç gün əvvəl quruma bu barədə bir neçə abonent tərəfindən şikayət daxil olub:

“Abonentlərdən daxil olan şikayət əsasında bizə verilən ad və soyada uyğun olaraq araşdırma aparıldı. Bakı Regional Qazın Satışı Departamenti tərəfindən aparılan araşdırma nəticəsində bizim belə bir işçimizin olmadığı məlum oldu. Abonentləri diqqətli olmağa çağırırıq. Bu kimi dələduzluğa aldanan abonentlər olub. Biz onlara da rəsmi olaraq hüquq-mühafizə orqanlarına bu barədə məlumat vermələrini tövsiyə etmişik. Vətəndaşlar əməkdaşlarımızdan sənəd tələb edə bilərlər. Saxta sənəd həmin dəqiqə hiss olunur. Eyni zamanda sakinlər ərazi üzrə xidmət aparan qurum əməkdaşlarını da yaxşı tanıyırlar. Bu kimi hallarda diqqətli olmaqda hər zaman fayda var”.

C.Səfərov onu da qeyd edib ki, “Azəriqaz” İB-nin nümayəndələrinin abonentdən ödəniş almaq hüququ yoxdur:

“Heç vaxt bizim qurumun əməkdaşlarına pul vəsaiti verməyin. Əməkdaşlarımızın abonentlərə ödənişli xidmət göstərmək kimi səlahiyyəti yoxdur. “Azəriqaz” İB-i abonentlərlə müqavilə əsasında yalnız qazın alqı-satqısını həyata keçirir. Bu həm əhali, həm də qeyri-əhali qrupuna aiddir. Təkrar edirəm ki, bənzər hallarla rastlaşan abonentlər bu barədə polisə, hətta Baş Prokuror yanında Korrupsiyaya qarşı Mübarizə Baş İdarəsinin də qaynar xəttinə müraciət etsinlər”.

Azərbaycandan bu il Həcc ziyarəti baş tutmayacaq.

APA-nın əldə etdiyi məlumata görə, pandemiya səbəbindən ziyarət bu il də həyata keçirilməyəcək.

Məsələ ilə bağlı Qafqaz Müsəlmanları İdarəsindən (QMİ) APA-nın sorğusuna cavab olaraq bildirilib ki, Həcc ziyarəti ilə bağlı Səudiyyə Ərəbistanından Azərbaycana məktub daxil olmayıb.

Qeyd edək ki, COVİD-19 pandemiyası səbəbindən ötən il də Azərbaycandan Həcc ziyarəti təxirə salınmışdı.