Month: January 2024

Rusiyanın ən zəngin iş adamlarının sərvəti 2023-cü ildə 50,012 milyard ABŞ dolları artıb.

“Report” xəbər verir ki, bunu “Bloomberg” agentliyinin dərc etdiyi “Milyarderlər İndeksi” göstərir.

Hesabata əsasən, ilin əvvəlindən “Lukoyl”un təsisçisi Vahid Ələkbərov 9,29 milyard ABŞ dolları qazanıb və onun sərvəti 24,7 milyard ABŞ dollarına yüksəlib. “Eurochem”in həmtəsisçisi Andrey Melniçenkonun sərvəti isə 5,67 milyard ABŞ dolları artaraq 17,2 milyard ABŞ dollarına yüksəlib. NLMK Direktorlar Şurasının sədri Vladimir Lisin sərvəti isə 23,9 milyard ABŞ dolları təşkil edib.

Qeyd edilib ki, “Akron”un əsas səhmdarı Vyaçeslav Kantor ən çox itkiyə məruz qalıb, onun sərvəti 0,149 milyard ABŞ dolları azalaraq 6,21 milyard ABŞ dolları təşkil edib

Ölkəmizdə cəmi 1 şagirdi olan 7 məktəb fəaliyyət göstərir. Həmin məktəblər İsmayıllı, Quba, Lerik (hərəsində 2 məktəb) və Ağsudadır (1 məktəb).

Median.Az AZƏRTAC-a istinadən xəbər verir ki, Ağsu rayon Axunlu kəndində yaşayan Zəhra Babayevanın 6 yaşı var. O, kənd məktəbinin yeganə şagirdidir. Hazırda birinci sinifdə oxuyan Zəhranı digər məktəblilərdən fərqləndirən, onun sinif yoldaşlarının olmamasıdır. Hər gün məktəbə tək gedir, partada tək oturur. Amma bütün bunlar onu dərslərindən geridə qoymur.

Məktəbin kollektivi cəmi 4 nəfərdən – direktor-müəllim, iki texniki işçi və bir şagirddən ibarətdir.

Otuz ildən çoxdur pedaqoji fəaliyyətlə məşğul olan Zəhranın müəllimi Bədurə Babayeva deyir ki, əslində, onun üçün sinifdə uşaq sayının fərqi yoxdur. Şagird sayından asılı olmayaraq, tədris təyin olunmuş proqram üzrə aparılır: “Əvvəllər məktəbimizdə şagird sayı çox olub, indi isə bir nəfərdir. Bu da kənddə əhalinin sayının az olması ilə əlaqədardır. Amma gələn il 4-5 şagirdin qəbulu gözlənilir. Ötən tədris ilində məktəbdə bir neçə şagird təhsil alıb, onlar ibtidai təhsillərini başa vurublar və hazırda qonşu kənddəki ümumi orta məktəbində təhsillərini davam etdirirlər”.

Kənd sakini Səməd Qəmbərov isə bildirib ki, kənddə cəmi 20 ev var. Qonşu kənddə tam orta məktəb olsa da, oraya xeyli məsafə var. “Bizim kəndlə o məktəb arasında 3 kilometr məsafə var. Ona görə də bu məktəbin olması bizim üçün yaxşıdır. Çünki azyaşlı uşaqların o qədər yolu piyada getməsi çətin məsələdir. Ona görə də kəndimizdə dərs keçirilməsi bizə daha uyğundur”, – deyə o əlavə edib.

Xatırladaq ki, ölkəmizdə cəmi 1 şagirdin təhsil aldığı 7 məktəb olsa da, şagird sayı 4000-dən çox olan 10 məktəb də var. Bunlardan 3-ü Abşeron rayonunda, 7-si isə Bakı şəhərindədir. Eyni zamanda, şagird sayı 5000-dən çox olan 3 məktəbin 1-i Bakı şəhərində, 2-si isə Abşeron rayonunda fəaliyyət göstərir.

Xəbər verdiyimiz kimi, 2023-cü ilin 26 dekabrında Boztəpə kanalının İmişli rayonunun Qaragüvəndikli kəndi ərazisindən keçən hissəsində batdığı ehtimal olunan azyaşlının axtarışları davam etdirilir.

Bu barədə Fövqəladə Hallar Nazirliyi (FHN) məlumat yayıb.

Bildirilib ki, Nazirliyin Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-axtarış qrupu tərəfindən azyaşlının axtarışları aparılır.

Müvafiq qurum tərəfindən kanalda suyun səviyyəsi aşağı salınmaqla, hazırda FHN-in dalğıc-xilasediciləri kanalda batması ehtimal edilən 2013-cü il təvəllüdlü Xankişiyev Rasim Vasif oğlunun axtarış-xilasetmə əməliyyatını davam etdirirlər.

Narkotik vasitələrin qanunsuz dövriyyəsində təqsirləndirilən İsmayıl Əliyevə hökm oxunub.

“Report”un əldə etdiyi məlumata görə, bu barədə hökm Bakı Ağır Cinayətlər Məhkəməsinin hakimi Faiq Qəniyevin sədrliyi ilə keçirilən prosesdə elan edilib.

Hökmə əsasən, İ.Əliyev 11 il müddətinə azadlıqdan məhrum edilib.

İstintaq zamanı müəyyən edilib ki, 1995-ci il təvəllüdlü İsmayıl Əliyev əvvəllər Cinayət Məcəlləsinin bir neçə maddəsi ilə məhkum olunub. O, “Instagram” sosial şəbəkəsi vasitəsilə narkotik vasitələrin internet üzərindən satışını həyata keçirən İran vətəndaşı, adını “İlyas” kimi təqdim edən şəxslə tanış olub.

Narkotik vasitələrin istifadəçisi olduğunu bildiyi üçün İlyas ona “işləmək” təklif edib. Həmin “İlyas” adlı şəxs onunla əlaqə saxlayıb külli miqdarda narkotik vasitə olan heroin göndərəcəyini, həmin narkotik vasitələri götürüb özündə saxlamasını və sonradan deyəcəyi vaxtda narkotik vasitələri nişan verəcəyi ərazidə yerləşdirərək həmin yerin şəkillərini çəkib göndərməsini, bunun müqabilində isə ona 500 manat pul verəcəyini bildirib.

Beləliklə, o, bu ilin yanvarında axşam saatlarında Qaradağ rayonu, Bakı-Qazax avtomobil yolunun 28-ci kilometrliyinə gedib, orada İran İslam Respublikasının vətəndaşı “İlyas” adlı şəxsin və qeyrilərinin göndərdiyi külli miqdarda – 13 kq 68,8 qram çəkidə narkotik vasitə olan heroini bir ədəd sintetik kisədə gizlədildiyi yerdən götürüb qanunsuz olaraq üzərində saxlayaraq daşıyıb.

İ.Əliyev Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşları tərəfindən keçirilmiş əməliyyat-axtarış tədbirləri nəticəsində o, elə həmin gün saxlanılıb. Onun üzərinə baxış keçirilərkən satış məqsədilə qanunsuz olaraq əldə edib üzərində saxlamaqla daşıdığı 13 kq 68,8 qram çəkidə narkotik vasitə heroin aşkar edilərək götürülüb.

Ona qarşı Cinayət Məcəlləsinin 234.4.1 və 234.4.3-cü (qanunsuz olaraq narkotik vasitələri, psixotrop maddələri əldə etmə, saxlama, daşıma, göndərmə və ya satma) maddələri ilə ittiham irəli sürülüb.