Month: May 2024

Türkiyədə toyuq ətinin qiyməti 200 faiz bahalaşıb. Bunun qarşısını almaq üçün hökumət müəyyən addımlar atmağa başlayıb.

Belə ki, Türkiyə Ticarət Nazirliyi quş ətinin ixracına müvəqqəti qadağanı nəzərdə tutan yeni qanun layihəsi hazırlayıb.

Maraqlıdır, bu hal ölkəmizdə quş ətinin qiymətinin artması ilə nəticələnə bilər?

Məsələ ilə bağlı ARB TV-nin efirində yayımlanan verilişlərin birində Azərbaycan Quş əti, Yumurta İstehsalçıları və İxracatçıları Assosiasiyası İctimai Birliyinin sədri Mürvət Həsənli, ölkəmizin Türkiyədən quş əti idxalının çox az olduğuna görə qardaş ölkədə son baş verənlərin Azərbaycana təsiri olmayacağını deyib.

O, ölkəmizdə quş ətinə illik hesabatın 160-170 min ton civarında olduğunu bildirib.

“Ölkəmizə quş ətinin idxalı, əsasən Ukrayna, Belarus və Rusiya kimi MDB ölkələrindəndir”, – deyə Mürvət Həsənli qeyd edib.

Ətraflı videosüjetdə:

32 il əvvəl həyat yoldaşı tərəfindən tərk edilən Şəki rayonun Aşağı Kəldək sakini Aybəniz Məsimova sosial müavinət ala bilmir.

Onun sözlərinə görə, həyat yoldaşından geri qalan nikah müqaviləsi sosial müavinət almaqda problem yaradır. “Ünvanlı sosial yardım üçün müraciət edəndə məndən sənədlərin qəbuluna görə boşanma haqqında və ya həyat yoldaşımın ölümünü təsdiqləyən sənəd tələb edirlər”.

Məsələ ilə bağlı vəkil Emil Aslanov bildirib ki, vətəndaş nikahın qüvvədən düşməsini istəyirsə, qarşı tərəf olmadığı halda da məhkəməyə müraciət edə bilər:

“Ancaq bu halda bir qədər gözləməli olacaq”.

Qeyd edək ki, Dövlət Sosial Müdafiə Fondu qısa müddət ərzində Aybəniz Məsimova ilə əlaqə saxlayaraq problemin həlli üçün işlər görüləcəyini bildirib.

Ətraflı “Xəzər Xəbər”in videomaterialında:

Son günlər yağan yağışlar Kür çayında sululuğun artmasına səbəb olub.

AZƏRTAC xəbər verir ki, çayın Qazax rayonu ərazisindən keçən hissəsində Kürün öz məcrasından çıxması və ətrafa yayılması nəticəsində əkin sahələri və təsərrüfatlara ziyan dəyib.

Təbii fəlakət əsasən rayonun Aşağı və Orta Salahlı kəndlərinin əkin torpaqlarında fəsadlar törədib.

Kənd sakinlərinin çay kənarında yerləşən təsərrüfatlarını sonuncu dəfə iki il öncə də sel suları altında qalmışdı. Kür çayı kənarındakı heyvandarlıq təsərrüfatları sahibləri vaxtında heyvanlarını təxliyə edə biliblər.

Kənd sakini Ağaəli Muradov deyir ki, heyvandarlıqla məşğuldurlar. Ferma Kür çayının kənarında olduğundan heyvanları təsərrüfatdan çıxarmalı olublar.

“Fermadan başqa taxıl və qarğıdalı sahəm var. Həmçinin biçənək sahəmiz də var. Kürün daşması nəticəsində sahələrimiz su altında qalıb. Heyvanlar arasında tələfat yoxdur. Kürün qalxdığını bilib vaxtında hamısını təxliyə etmişik”, – deyə Aşağı Salahlı kənd sakini Ağəli Muradov bildirib.

Sel suları əsasən Kür çayına yaxın yerləşən şəxsi təsərrüfatlara zərər vurub. Ərazidəki su ötən gündən çəkilib. Kürün səviyyəsi hazırda stabilləşib.

Qazax Rayon İcra Hakimiyyətinin fövqəladə hallar komissiyasından bildirilib ki, təbii fəlakətin vurduğu ziyanın həcmi müəyyənləşdirilir. Hazırda qərb bölgəsində qeyri-sabit, dəyişkən hava şəraiti müşahidə edilir.

Bakıda iaşə obyektlərindəki təhlükəsizlik boşluğu ifşa edilib.

Belə ki, Baku TV-nin əməkdaşı paytaxtda yerləşən hotellərdən birinə heç bir yoxlama olmadan soyuq silahla (balta ilə) daxil olub.

Hotel işçisi “Mühafizəni necə təşkil edirsiniz?” sualına, insanların xarici görünüşündən psixologiyasını müəyyən edib, içəri buraxdıqlarını bildirib.

Məsələ ilə bağlı Dövlət Turizm Agentliyindən isə bildirilib ki, hotellərin təhlükəsizlik məsələlərinə Turizm Agentliyi nəzarət etmir.

Beləliklə, məlum olub ki, turizm və xidmət sahəsinin vacib subyektlərindən biri olan hotellərdə təhlükəsizliyin təminatı məsələsi qorunmur.

Ətraflı süjetdə:

Tovuzda məktəbli qız evlənmək məqsədilə qoşulub qaçıb.

Hadisə Vahidli kəndində qeydə alınıb. Orta məktəbin 10-cu sinfində təhsil alan 16 yaşlı Ə.G. kursdan qayıdarkən 26 yaşlı M.Mustafayev tərəfindən qaçırılıb.

Ailə hadisə ilə bağlı polisə müraciət edib.

Daxili İşlər Nazirliyinin Mətbuat Xidmətinin Gəncə regional qrupunun baş inspektoru polis kapitanı Eşqin Qasımov lent.az-a bildirib ki, müraciətlə əlaqədar Tovuz rayon Polis Şöbəsinin əməkdaşları tərəfindən tədbirlər görülüb:

“Tədbirlər nəticəsində qızın yeri müəyyən edilib. O, polisə verdiyi ifadəsində öz istəyi ilə qoşulub qaçdığını deyib. Bundan əlavə, həm rayon polis şöbəsinin rəisinin iştirakı ilə, həm də rayon prokurorluğunda valideynləri ilə görüşdürülüb. Hər iki görüşdə öz istəyi ilə qaçdığını bildirib”.