Median.Az

Month: Yanvar 2026

  • Tarixdəki ən çox gəlir gətirən filmlər

    Kinematoqrafiya sənayesi üçün “ən gəlirli” ifadəsi yalnız bilet satışından əldə olunan ümumi məbləği nəzərdə tutmur — bu həm də investisiyanın geri dönüş nisbətini (ROI) göstərir. Aşağıdakı siyahı, dünya miqyasında bilet satışları baxımından əldə edilmiş rekord gəlirlərə görə seçilmiş ən çox gəlir gətirən filmləri əks etdirir.

    1. Avatar (2009) — 2,9 milyard $

    James Cameron‑un epik elmi-fantastik filmi kino tarixində ən çox gəlir gətirən film olaraq qalır. 3D vizualları və geniş dünyası ilə qlobal auditoriyanı cəlb etdi və kino texnologiyalarında dönüş nöqtəsi oldu. Büdcəyə nisbətdə qazancı 12‑yə yaxın çoxaldı.

    2. Avengers: Endgame (2019) — 2,8 milyard $

    Marvel‑in qlobal fenomeni olan bu film, çoxsaylı super qəhrəmanın birləşdiyi “Infinity Saga” dövrünü bağladı. Güclü fan bazası və strateji qlobal buraxılış, rekordlar qırmasına səbəb oldu.

    3. Titanic (1997) — 2,2 milyard $

    James Cameron‑un romantik dram və tarixi faciəni birləşdirən filmi, həm kinoteatrlarda, həm də sonrakı yayım formatlarında böyük gəlirlər gətirdi.

    4. Star Wars: The Force Awakens (2015) — 2,1 milyard $

    Əfsanəvi Star Wars franşizasının yenidən doğuşu, qlobal miqyasda böyük maraq doğurdu və Disney‑in kommersiya baxımından ən uğurlu nümunələrindən oldu.

    5. Avengers: Infinity War (2018) — 2,0 milyard $

    Böyük qəhrəmanlar komandasının birlikdə Thanos ilə mübarizəsini əks etdirən film post‑Endgame dövrünün başlanğıc nöqtəsi oldu.

    6. Spider-Man: No Way Home (2021) — 1,9 milyard $

    Sony və Marvel birgə istehsalı, multivers konseptini təqdim edərək, həm nostalji sevərləri, həm də yeniyetmə auditoriyanı cəlb etdi. Pandemiya sonrası kassa uğurlarından biri oldu.

    7. Jurassic World (2015) — 1,6 milyard $

    Dinozavrlar dünyasının qayıdışı, klassik Jurassic Park atmosferi və müasir effektlərlə birlikdə böyük maraq doğurdu və franşizanı yenidən zirvəyə qaldırdı.

    8. The Lion King (2019) — 1,6 milyard $

    Disney‑in canlı vizual versiyası, həm uşaqlar, həm də böyüklər üçün sevilən klassikaya çevrildi. Beynəlxalq səviyyədə nəsilləri birləşdirən bir fenomen oldu.

    9. Fast & Furious 7 (2015) — 1,5 milyard $

    Franşizanının bu epizodu, aktyor Paul Walker‑ın xatirəsinə həsr edilmiş emosional ton və sürətli temp ilə tamaşaçıları kino salonlarına cəlb etdi.

    10. Avatar: The Way of Water (2022) — 1,5 milyard $

    Avatar kinosunun davamı olaraq, James Cameron yenə də texnoloji yenilik və geniş vizual dünyası ilə böyük gəlir topladı. Filmin gəlirləri hələ də artmaqda davam edir.

  • Polkovnik Mahir Şirvanovdan XƏBƏR VAR

    Müdafiə Nazirliyindəki 143 milyonluq yeyinti ittihamı ilə məhkum edilmiş polkovnik Mahir Şirvanov vaxtından əvvəl azadlığa çıxmaq istəyir.
     
    Sfera.az-ın məlumatına görə, məhkum 5 illik cəza müddətinin yarıdan çoxunu çəkib deyə, cəzaçəkmə müəssisəsinin müsbət rəyini nəzərə alaraq məhkəməyə müraciət edib.
     
    Yerli məhkəmə M. Şirvanovun ərizəsini düzgün hesab etməyərək geri qaytarıb. Polkovnikin qalan 1 il 2 ay həbs müddətinin davamına qərar verilib.
     
    Qeyd edək ki, 143 milyonluq mənimsəmə ilə bağlı çoxsaylı zabit məhkum edilib.

  • Tibbi sığorta ödənişləri 6 milyondan çox azalıb

    Cari ilin yanvar-noyabr aylarında tibbi sığorta yığımlarında artım, ödənişlərdə isə azalma müşahidə olunub.

    Valyuta.az xəbər verir ki, cari ilin ilk 11 ayında bu sığorta növü üzrə 121 milyon 901 min manat yığım həyata keçirilib.

    Rəsmi statistikaya əsasən demək olar ki, sığorta yığımlarında 8 milyon 236 min manat və ya 7,2% artım olub.

    Ötən ilin eyni dövründə isə tibbi sığorta yığımları 113 milyon 665 min manat olub.

    Tibbi sığorta üzrə ödənişlərə gəldikdə isə cari ilin ilk 11 ayı üzrə ödənişlər 81 milyon 312 min manat təşkil edib. Ötən ilin eyni dövründə isə 88 milyon 95 min manatlıq ödəniş həyata keçirilib.

    Nəticə etibarı ilə tibbi sığorta ödənişlərində 6 milyon 783 min manat və ya 7,6% azalma olub.

  • Futbol üzrə Qabon millisinin fəaliyyəti dayandırıldı

    Futbol üzrə Qabon millisinin texniki heyətinin bütün üzvləri ilə müqavilələrə xitam verilib, yığmanın fəaliyyəti müddətsiz dayandırılıb.

    Buna komandanın Mərakeşin ev sahibliyi etdiyi Afrika Millətlər Kubokundakı uğursuz çıxışı səbəb olub.

    Bütün oyunlarda məğlub olan Qabon yığması turnirlə vidalaşıb. Bununla bağlı Qabon hökuməti sərt qərarlar qəbul edib. Rəsmi məlumata görə, hökumət qərarı ilə futbolçular Bruno Ekuele Manqa və Pyer-Emerik Obameyanqın milli komandada çıxış etməsi qadağan olunub.

  • Moskva yenidən PUA hücumuna məruz qalıb

    Moskva yeni ilin ilk günü kütləvi PUA hücumuna məruz qalıb.

    Bu barədə Moskva meri Sergey Sobyanin məlumat verib.

    Onun sözlərinə görə, dünən gecə saatlarından paytaxt Moskvaya dron hücumu başlayıb və bu gün axşama qədər davam edib.

    Mer bildirib ki, Rusiya Hava Hücumundan Müdafiə sistemləri Moskva istiqamətində uçan 28 PUA-nı vurub.

    Sobyanin Ukrayna PUA-larının 20-nin son bir neçə saat ərzində məhv edildiyini söyləyib.

    Moskvaya kütləvi dron hücumu ilə əlaqədar paytaxt hava limanlarının işi məhdudlaşdırılıb.

    Domodedovo, Vnukovo və Jukovski aeroportlarında təyyarələrin uçuşu və enişinə icazə vermir.

    Şeremetyevo hava limanında isə uçuş və enişlər müvafiq orqanlarla razılaşdırılır.
    //APA

  • Lənkəranda evdə yanğın olub – Video

    Lənkəranda fərdi yaşayış evində yanğın baş verib.

    Yanğın hadisəsi Lənkəran rayonunun Şıxakəran kəndində bir evdə qeydə alınıb.

    İlkin məlumata görə Samir adlı kənd sakininə məxsus olan ev əşyaları ilə birlikdə tamamilə yanıb.

    Əraziyə FHN-nin yanğından mühafizə hissəsinin texnikası və canlı qüvvəsi cəlb olunub. Alovun digər tikililərə keçməsinin qarşısı alınıb.

    Əldə etdiyimiz məlumata görə ev sahibləri Rusiya Federasiyasında yaşayır. Evdə yaşayış olmayıb.

    Faktla bağlı araşdırma aparılır.
    //apa.az

  • Rusiya-Gürcüstan quru sərhədi qar uçqunu təhlükəsi səbəbindən bağlandı

    Rusiya-Gürcüstan quru sərhədi əlverişsiz hava şəraiti ilə əlaqədar bağlanıb.

    APA xəbər verir ki, Rusiya-Gürcüstan sərhədində yerləşən
    Lars sərhəd keçid məntəqəsi qar uçqunu təhlükəsi səbəbindən bütün növ nəqliyyat vasitələri üçün bağlanıb.

  • 32 yaşlı kişi bayram gecəsi klubun qarşısında öldürüldü

    Səbail rayonunun Bayıl qəsəbəsində yerləşən “Purple Karaoke & Live Bar” gecə klubunun qarşısında qətl törədilib.

    Median.Az “Qafqazinfo”ya istinadən xəbər verir ki, müştərilər arasında baş verən mübahisə qanla bitib.

    Yanvarın 1-i gecə 2 radələrində 36 yaşlı H.Məcidovla 32 yaşlı E.Rəcəbli arasında klubda mübahisə yaranıb. Daha sonra obyektin qarşısında H.Məcidov E.Rəcəblini bıçaqlayıb. Ağır xəsarət alan sonuncunun həyatını xilas etmək mümkün olmayıb. O, xəstəxanaya aparılarkən yolda ölüb.

    Hadisəni törətməkdə şübhəli bilinən H.Məcidov polis əməkdaşları tərəfindən saxlanılaraq istintaqa təhvil verilib.

    Faktla bağlı Səbail Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb. Hazırda ilkin istintaq hərəkətləri aparılır.

  • Bakıda bayram günü əkizlər doğuldu – Biri evdə, biri xəstəxanada

    Yeni ilin ilk günündə Nizami rayonu ərazisində çağırışa gedən təcili tibbi yardım briqadası ev şəraitində doğuş prosesini uğurla həyata keçirib.

    Bu barədə Respublika Təcili və Təxirəsalınmaz Tibbi Yardım Mərkəzi məlumat yayıb.

    Bildirilib ki, çağırış ünvanında təcili tibbi yardım briqadası tərəfindən 37 həftəlik əkiz hamiləliyi olan qadının doğuş prosesi idarə olunub. Doğuşun ilkin mərhələsi birbaşa yaşayış ünvanında baş verib, daha sonra proses təcili tibbi yardım avtomobilində nəzarət altında davam etdirilib.

    Briqada tərəfindən ana və yenidoğulmuş körpəyə (oğlan) zəruri ilkin tibbi yardım göstərildikdən sonra onlar müvafiq tibb müəssisəsinə təxliyə olunub. Digər körpənin sağrı gəlişi müşahidə edildiyindən doğuş prosesi tibb müəssisəsində davam etdirilib və ikinci körpə qız dünyaya gəlib.

    Yenidoğulmuş oğlan körpənin çəkisi 2 kq 450 qram, boyu 54 sm-dir. Ana və hər iki körpənin vəziyyəti qənaətbəxş qiymətləndirilir.

  • Naxçıvanda məsciddə yanğın baş verib

    Naxçıvanda məsciddə yanğın baş verib.

    Bu barədə Fövqəladə Hallar Nazirliyi (FHN) məlumat yayıb.

    Bildirilib ki, Naxçıvan Muxtar Respublikasının Kəngərli rayonunun Qıvraq qəsəbəsində məscid binasının dam örtüyünün yanar konstruksiyaları 70 kvadratmetr sahədə yanıb, qalan hissəsi yanğından mühafizə olunub.

    Yanğın yanğından mühafizə bölmələri tərəfindən söndürülüb.