Azərbaycanda son günlər avaralıqla məşğul olmağa görə cərimə növünün mövcudluğu barədə müzakirələr başlayıb.
Bəs qanunvericilik nə deyir? Kimlərə avara deyilir?
Bizim.Media xəbər verir ki, İnzibati Xətalar Məcəlləsinin 523-cü maddəsi avaralıqla məşğul olma maddəsidir.
Həmin maddədə qeyd edilib ki, “avaralıqla məşğul olan” dedikdə – müəyyən yaşayış yeri və yaşamağa vəsaiti olmayan, hər hansı ictimai faydalı işlə və ya peşə fəaliyyəti ilə məşğul olmayan, mütəmadi olaraq xırda oğurluq və ya dilənçilik yolu ilə dolanan şəxslər başa düşülür. Burada “Məşğulluq haqqında” Azərbaycan Respublikasının Qanunu ilə müəyyən edilmiş qaydada işaxtaran və ya işsiz kimi qeydiyyata alınmış şəxslər istisna olunurlar.
Avaralıqla məşğul olmağa görə – vətəndaşlar xəbərdarlıq edilir və ya işin hallarına görə, xətanı törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda on günədək müddətə inzibati həbs tətbiq edilir, əcnəbilər və vətəndaşlığı olmayan şəxslərə xəbərdarlıq edilir və ya iyirmi manatdan iyirmi beş manatadək məbləğdə cərimə edilməklə və ya edilməməklə Azərbaycan Respublikasının hüdudlarından kənara inzibati qaydada çıxarılır.
Həmin maddənin digər bəndinə görə, yetkinlik yaşına çatmayanın yetkinlik yaşına çatmış şəxs tərəfindən avaralığa cəlb edilməsinə görə – əlli manatdan doxsan manatadək məbləğdə cərimə edilir və ya işin hallarına görə, xətanı törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda beş gündən on beş günədək müddətə inzibati həbs tətbiq edilir.
Yəni avaralıqla məşğul olan azərbaycanlılara öncə xəbərdarlıq edilir, bu kifayət etmədikdə 10 günədək inzibati həbs tətbiq edilir, əcnəbilərə isə xəbərdarlıq və ya 20 manatdan 25 manatadək cərimə və ya ölkədən kənarda inzibati qaydada çıxarılır.
