Category: Cəmiyyət

O, Bakının Novxanı kəndində anadan olub.

Bu gün Azərbaycan Demokratik Cümhuriyyətinin qurucularından olan Məhəmməd Əmin Rəsulzadənin anadan olmasının 134-cü ildönümüdür.

M. Ə. Rəsulzadə 1884-cü il yanvarın 31-də Bakının Novxanı kəndində anadan olub.

Gənc yaşlarında sosial demokratlarla birgə “Hümmət” təşkilatının yaranmasında iştirak edib. Çarizmin təqiblərinə məruz qalaraq 1909-cu ildə İrana mühacirət edib. Bir müddət orada “İrane-nou” qəzetinin baş redaktoru kimi çalışıb, məşrutə inqilabı yatırıldıqdan sonra Türkiyəyə mühacirət edib.

O, 1911-ci ildə Müsavat Partiyasına üzv qəbul edilib və 4 il sonra Müsavat Partiyası Mərkəzi Komitəsinin sədri seçilib.

1918-ci ildə Fətəli Xan Xoyski ilə birgə Şərqdə ilk respublikanın yaradılmasını rəsmi şəkildə elan edib. 1920-ci il aprelin 28-də bolşevik işğalından sonra həbs edilib. Az sonra Stalinin göstərişi ilə M.Ə.Rəsulzadə həbsdən azad edilərək Moskvaya aparılıb. Stalinin təkidlərinə baxmayaraq, sovet hakimiyyəti ilə əməkdaşlıqdan imtina edərək SSRİ-ni tərk edib.

M.Ə.Rəsulzadə 1955-ci ilin martın 6-da Ankarada dünyasını dəyişib.

1992-ci il dekabrın 24-də Azərbaycan prezidenti Əbülfəz Elçibəy “Görkəmli ictimai-siyasi xadim Məhəmməd Əmin Rəsulzadənin totalitar sovet rejimi dövründə repressiyaya məruz qalmış ailə üzvlərinin Azərbaycana qaytarılması və onların sosial-məişət məsələlərinin həlli haqqında” sərəncam imzalayıb.

29 dekabr 1993-cü ildə Azərbaycan prezidenti Heydər Əliyev “Azərbaycanın görkəmli ictimai-siyasi xadimi Məhəmməd Əmin Rəsulzadənin anadan olmasının 110 illik yubileyinin keçirilməsi haqqında” sərəncam imzalayıb.

22 noyabr 2013-cü ildə isə Azərbaycan prezidenti İlham Əliyev Məhəmməd Əmin Rəsulzadənin 130 illik yubileyinin keçirilməsi haqqında sərəncam verib.

Sərəncama əsasən, respublikada və respublikadan kənarda silsilə yubiley tədbirləri keçirilib.//oxu.az

Azərbaycanda imkanların yaxşılaşması insanların öz vətənlərində istirahət etməsinə gətirib-çıxarıb.

Bunu mədəniyyət və turizm nazirir Əbülfəs Qarayev xaricə gedən azərbaycanlıların sayında dörd faiz azalma baş verməsinə münasibət bildirərkən deyib.

O bildirib ki, ölkədə istirahət mərkəzlərində boş yerlər azdır:

“Fərdi evlərin turistlərə istifadəyə verilməsi istiqamətində işlər gedir. Kənd sakinləri üçün Mədəniyyət Nazirliyi, Azərbaycan Turizm Assosasiyası tərəfindən xüsusi təlimlər keçirilir. O cümlədən, rayonlarda üçulduzlu hotellərin yaradılması istiqamətində fəaliyyətlər aparılır”.

Nazir hazırda paytaxtda hostellərin yaradılmasının geniş yayıldığını deyib:

“Ölkədə 100-ə qədər hostel var. Onların yerləşdirilmə xidmətləri, qiymətləri müxtəlifdir. Bütün hallarda hostellər hotellərdən ucuzdur”.//oxu.az

Mədəniyyət və Turizm Nazirliyi beynəlxalq tenderin nəticəsi olaraq üç şirkətlə yeni üç turizm zonasının yaradılması üzərində işləyir.

Bunu mədəniyyət və turizm naziri Əbülfəs Qarayev jurnalistlərə açıqlamasında bildirib.

Nazirin sözlərinə görə, o turizm zonalarında bütün imtiyazlar təşviq olunacaq:

“Həmin zonaların layihələndirilməsi ilin sonuna qədər nəzərdə tutulub. Bu zonalar Xızı-Nabran, Quba və Qusarda layihələndiriləcək”.

Bakıda “Alov qüllələri”nin (“Flame towers”) yerləşdiyi ərazinin sürüşmə təhlükəsi yoxdur.

Bunu Oxu.Az-a Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin Geoloji planlama ekspedisiyasının rəisi Əziz Qaralov deyib.

Onun sözlərinə görə, “Alov qüllələri” binalar kompleksi yerləşən ərazidə vəziyyət stabildir:

“Həmin ərazi Bayıl yamacındakı sürüşmə sahəsindən kənardadır”.

Qeyd edək ki, bir sıra KİV-də “Alov qüllələri” binalar kompleksinin Bayıl yamacındakı sürüşmə sahəsi yaxınlığında yerləşdiyi üçün sürüşə biləcəyi ilə bağlı informasiya yayılıb.

Ümumtəhsil məktəblərində tətildən sonra ilk dərslər fevralın 1-də olacaq.

Bu barədə Oxu.Az-a Təhsil Nazirliyindən məlumat veriblər.

Məlumatda qeyd olunur ki, “Ümumtəhsil məktəbinin Nümunəvi Nizamnaməsi”nə əsasən, dərs ili ərzində aşağıdakı tətillər müəyyən edilib:

– 5 gün payız tətili (16-20 noyabr);

– 5 gün qış tətili (27-31 yanvar).

– İbtidai siniflər üçün 5 günlük (1-5 may) əlavə yaz tətili.

Qeyd edək ki, şagirdlərin növbəti istirahəti 8 Mart – Beynəlxalq Qadınlar Günü və Novruz bayramı günlərində olacaq. 20, 21, 22, 23, 24 mart tarixləri Novruz bayramı hesab olunduğundan, 24 mart isə şənbə, yəni həftələrarası istirahət günü iş günü hesab olunmayan bayram gününə düşdüyündən 26 mart qeyri-iş günü olacaq.

Buna görə də bu il Novruz bayramında bir həftə qeyri-iş günü olacaq və bununla əlaqədar şagirdlər ardıcıl olaraq həftənin yeddi günü istirahət edə biləcəklər.

“Bakı Metropoliteni”ndə qatarların hərəkətində ləngimə baş verib.

Bu barədə oxu.az-a “Bakı Metropoliteni”nin mətbuat xidmətinin rəhbəri Nəsimi Paşayev məlumat verib.

Ləngiməyə səbəb 13 saylı marşrut üzrə hərəkət edən qatarda nasazlığın yaranmasıdır:

“Həmin qatarın əvəzinə xəttə qatar buraxılıb və qatarlararası inyerval artıb. Həmçinin pik saat olduğundan stansiyalarda sərnişin sıxlığı yaranıb. “Bakı Metropoliteni” yaranmış narahatlığa görə sərnişinlərdən üzr istəyir. Hazırda intervalın bərpa edilməsinə çalışırıq”, – deyə N. Paşayev bildirib.

Onların qayda pozmaları digər sürücülərin etirazına səbəb olub

Bakıda Süleyman Əhmədov küçəsində yaranan problemə görə hərəkətin təşkilində dəyişiklik olunub. Lakin bəzi sürücülər həmin küçədəki dəyişikliyə əhəmiyyət verməyərək qaydaları pozmaqda davam edirlər.

Median.Az Avtosfer-ə istinadən xəbər verir ki, yanvarın 23-də Nobel prospektindən sağa — Süleyman Əhmədov küçəsinə dönən 57 nömrəli xətt üzrə fəaliyyət göstərən 90-RB-788 qeydiyyat nişanlı “İsuzu” markalı avtobusun sürücüsü və 10-ZO-802 qeydiyyat nişanlı “Mercedes” markalı minik avtomobilinin sürücüsü 1.1 bütöv xəttinin tələbini pozaraq geriyə dönüblər. Onların qayda pozmaları digər sürücülərin etirazına səbəb olub.

Havaların şaxtalı keçməsi mənzillərdə də problemlər yaradır. Bir çox hallarda su xətlərinin donması sakinlərin susuz qalmasına səbəb olur. Hətta bu cür problemlər su sayğaclarının sıradan çıxması ilə nəticələnir.

Median.Az xəbər verir ki, ARB TV-nin “Günə Doğru” proqramı mövzu ilə bağlı süjet hazırlayıb.

Lənkəran Sukanal idarəsinin rəisi: “Hündürmərtəbəli binalarda qoyulmuş pilləkən qəfəsində qoyulmuş sayğaclar qış və şaxta vaxtlarında əgər sıradan çıxarsa buna məsuliyyəti yerli idarə daşıyır. Ancaq həyət evlərində sayğaclar şaxta nəticəsində sıradan çıxarsa bu birbaşa vətəndaşın abonentin öz üzərində qalacaqdır.

Bununla yanaşı sərt şaxtalı havalarda digər qabaqlayıcı tədbirlər də görmək mümkündür. İlk növbədə su boruları və sayğac daxilində izolyasiya işləri aparılmalıdır. Həmçinin sayğacın üst hissəsi açılır və sayğacın ekranına qədər ağac yonqarı ilə doldurulur.

Rövşən Təhməzov Lənkəran Sukanal idarəsinin rəisi: “Qış aylarında sayğacların qutuların açıq saxlamasınlar. Sərt hava olduqda sayğacların qutuların ağzı açıq qalmasın. Ən yaxşısı o olarki, isti əşyalarla onun üstünü örtə bilsinlər”.

Sakinlər su sayğaclarını qarşıdan gələn şaxtalı havalardan qorumaq üçün gah üstünü bərk-bərk basdırırlar,gah da ətrafını sarıyırlar. Əsasən həyət evlərində yaşayanlar sayğacların donma təhlükəsindən daha çox narahatdırlar.

Rükəxan Salayeva – sakin: “Qış aylarında donmasın deyə üstün örtürük ki, donarsa məsuliyyət qalır bizim boynumuzda. Ona görə də həmişə özümüz bağlayırıq ki, suyumuz donmasın”.

Ağababa Abbasov – sakin: Onun üstünü əskiylə bağlayıram,şoçikin üstünü.Sonra əlavə ona sellofanla üstünü bağlayıram.

Rəhimə Zamanova – sakin: “Biz onun qabağını alırıq yun bir əski səririk üstünə ki,o donmasın,qapağı örtəndən sonra üstünə perfol da səririk bağlayırıq ki,o xarab olmasın”.

Akşin Əliyev – sakin: “Bizdə bina evidi yəni su sayğacı donma söhbəti problemi olmayıb. Padezin içindədi. Özü də yığ karopkanın içində”.

Nemət Səlimova – sakin: “Şaxtalı havalarda olar,bağlayırıq partlamsın deyə,su buraxmasın”.

İdris Ağayev – sakin: “Biz tədbir görmüşük ona.Bükmüşük onu bağlamışıq,müəyyən lentlər ki,zalentləmişik onu yəni ki donmasın”.

Sorğudan da məlum oldu ki,əksər sakinlər su sayğaclarında müəyyən izolyasiya işləri görməklə donmanın qarşısını almağa çalışırlar. Əgər su sayğacı donub sıradan çıxarsa bəs sayğacın təmiri hansı qaydalar əsasında həyata keçirilir.

Rövşən Təhməzov – Lənkəran Sukanal idarəsinin rəisi: “Hər hansı problem olduqda sayğacadək bütün problemləri yerli idarə özü həll etməlidir. Ancaq sayğacdan abonentə tərəf gedən hissəsi vətəndaşın öz hesabına təmir olunmalıdır”.

Rəhimə Zamanova – sakin: “Biz oan yaxşı baxmamışıqsa yəqin ki,bizim məsuliyyətimiz üstündə olar da”.

Ağababa Abbasov – sakin: “Təbii hadisədi, mən sındırmamışam, ya da ki, ona bir xətər yetirməmişəm. Təbii hadisədir. Əgər qanun qayda ilə onu izoliyasiyaya vermişiksə o formada şaxta güclü olub partladıbsa mənim nə günahım”.

İdris Ağayev – sakin: “Yox heç kəsə müraciət eləməmişəm.Ancaq öz hesabımıza. Bilirik ki, suyu bağlayırıq, opşidən bağlayırıq özümüz tədbir görürük.

Rövşən Təhməzov – Lənkəran Sukanal idarəsinin rəisi: “Əgər hər hansı problem yaranacaqsa. Problemlərdən ən çoxu budur ki,25-6 düşür.Vətəndaş sayğacdan az istifadə edəndə klapanlar bağlanır. Onunla bağlı vətəndaşlar yerli idarələrə müraciət edə bilərlər”.

Qeyd edək ki, su sayğacları sıradan çıxdığı zaman sayğac təmir olunanadək vətəndaş su ilə təmin edilir. Lakin ödəniş nağd yolla həyata keçirilir. Bu isə bir çox hallarda sakinlərə sərf etmir.

“Bayıl yamacındakı sürüşmə ilə əlaqədar Teleqüllənin yerinin dəyişdirilməsi ehtimalı yoxdur”.

Median.Az xəbər verir ki, bunu “Report”a açıqlamasında Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin Geoloji planlama ekspedisiyasının rəisi Əziz Qaralov deyib.

O bildirib ki, Teleqüllənin inşa olunduğu yer tamamilə başqa strukturun üzərindədir: “Həmin ərazidə Teleqüllə üçün heç bir qorxu yoxdur. O monolit əhəng daşlarının üzərində inşa olunub. Lazımi qaydada layihələşdirilib, tikilib. Heç bir qorxu yoxdur”.

Qeyd edək ki, yanvar ayının 24-də Səbail rayonunun Bayıl yamacında (Teleqüllə yaxınlığında) sürüşmə hadisəsi qeydə alınıb. Mütəxəssislərin apardıqları yoxlamalar nəticəsində sürüşmə təhlükəsi olan ərazidə 103 ev müəyyənləşdirilib. Sürüşmə zonasından 80 ailə, yəni 390 nəfər çıxarılıb. Onlara bu aydan etibarən müvəqqəti olaraq kirayə haqqı ödəniləcək.

Bu gün bir çox restoranlarda, uşaq müəssisələrində açıq formalı vərəm xəstələri işləyirlər və onlara nəzarət edilmir.

Azxeber.com-un məlumatına görə, bunu Ədliyyə Nazirliyinin Tibb Baş İdarəsinin rəisi Rafael Mehdiyev “Qlobal çağırışlar və öhdəliklər: Azərbaycanda vərəmlə mübarizə” adlı dinləmələrdə çıxış edərkən deyib.

O bildirib ki, sovet dövründə müəyyən obliqat qrupu var idi, həmin qrupa daxil olanlar mütəmadi olaraq, müayinələrdən keçirilirdi, bu işə xüsusi nəzarət edilirdi: “Bu gün bu, unudulub. Bir çox restoranlarda, uşaq müəssisələrində açıq formalı vərəm xəstələri işləyir və onlara nəzarət də edilmir. Əvvəllər belə obyektlərdə işləyənlər 3-4 aydan bir məcburi müayinədən keçirdilər. Bunu bərpa etmək və çox ciddi nəzarət etmək lazımdır”.
 
R.Mehdiyev qeyd edib ki, vərəm xəstəsi olan məhkumlar azadlığa çıxdıqdan sonra onlara nəzarət edilməlidir.

Son illərdə bu nəzarəti QHT-lərlə birgə təmin etdiklərini deyən R.Mehdiyevin sözlərinə görə, təcrübə göstərir ki, belə keçmiş məhkumlar yenidən cəzaçəkmə müəssisəsinə qayıtdığı zaman onlarda vərəmin daha kəskinləşmiş forması olur: “Bu isə onu göstərir ki, onlar azadlığa çıxdıqdan sonra vərəmi müalicə etdirmirlər və müəyyən müddətdən sonra daha kəskinləşmiş formada geri qayıdırlar. Buna görə də belə məhkumlara nəzarətin edilməsi çox vacibdir”.