Category: Dünya

İslam Respublikasının Xarici İşlər Nazirliyinin nümayəndəsi Esmail Baqai bildirib ki, bu məsələ danışıqlar zamanı heç vaxt müzakirə olunmayıb.

“Hazırkı və ya əvvəlki danışıqların heç bir mərhələsində İranın zənginləşdirilmiş uran ehtiyatlarının ABŞ-a və ya hər hansı başqa ölkəyə verilməsi məsələsi qaldırılmayıb. Ümumiyyətlə, bu variant gündəmdə deyil”, – deyə o, mətbuat konfransında vurğulayıb.

Aprelin 17-də ABŞ prezidenti Donald Trump bəyan etmişdi ki, ABŞ və İran nümayəndələri birlikdə zənginləşdirilmiş uranın ölkədən çıxarılması ilə məşğul olacaqlar və Tehran guya Vaşinqtondan dondurulmuş aktivlərini geri almadan nüvə proqramını qeyri-müəyyən müddətə dayandırmağa hazırdır.
Bundan əlavə, Tramp mümkün razılaşmanın şərtlərinin böyük hissəsinin artıq razılaşdırıldığını da iddia edib.

“Telegram”ın həmtəsisçisi Pavel Durova qarşı Fransada aparılan istintaq çərçivəsində irəli sürülən 10-dan çox ittihamın hər biri on ilə qədər həbs cəzası nəzərdə tutur.

Bu barədə Durov özünün “Telegram” kanalında məlumat paylaşıb.

“Makronun Fransası söz azadlığını və məxfiliyi boğmaq məqsədilə cinayət təqiblərindən istifadə etdiyi üçün öz legitimliyini itirir. Mən Fransada istintaq altındayam: hər birinə görə 10 ilə qədər həbs cəzası düşən ondan çox ittiham var”, – deyə o bildirib.

Bundan əvvəl də iş adamı vurğulayıb ki, onun fikrincə, istifadəçilərinə müəyyən dərəcədə azadlıq verən sosial platformaları cinayət məsuliyyətinə cəlb edən yeganə ölkə məhz Fransadır.

Xatırladaq ki, 2021-ci ildə Fransa vətəndaşlığını alan Pavel Durov 2024-cü ilin avqust ayının sonlarında Le-Burje hava limanında təyyarədən enərkən saxlanılıb. Ona mütəşəkkil cinayətkarlıqla əlaqəli bir sıra qanunpozmaları üzrə ittihamlar irəli sürülüb. Xüsusilə də, o, “Telegram”da kriminal xarakterli məzmunun yayılmasının qarşısını almaq üçün tədbir görməməkdə və fəaliyyətsizlikdə təqsirləndirilib.

Ötən ilin avqustunun sonundan etibarən Fransada olan Durova ölkədən çıxmaq qadağan edilib.

Kolumbiya dövlət başçısı Qustavo Petro narkokartellə ehtimal olunan əlaqələri barədə böhtan atdığı üçün ekvadorlu həmkarı Daniel Noboanı məhkəməyə verəcəyini açıqlayıb.

Bu barədə Petro özünün “X” sosial şəbəkə hesabında paylaşım edib.

“Mənə qarşı səsləndirdiyi böhtana görə prezident Noboanı məhkəməyə vermək qərarına gəldim”, – deyə qeyd edib.

Xatırladaq ki, bir müddət əvvəl Noboa Kolumbiyanın “Semana” jurnalına müsahibəsində bildirib ki, Petro 2025-ci ilin mayında Ekvadorun Manta şəhərinə səfəri zamanı yerli “Vətəndaş inqilabı” müxalifət partiyasının nümayəndələri ilə görüşüb. İddiaya görə, bu şəxslərin bəziləri 2024-cü ilin yanvarında həbsxanadan qaçan və 2025-ci ilin iyununda yaxalanan “Los-Çoneros” narkokartelinin başçısı, “Fito” ləqəbli Adolfo Masiasla əlaqəlidir. “Onların Fito ilə təkbətək görüşüb-görüşmədiyini indi iddia edə bilmərəm. Amma, belə deyək, o, eyni mühitdə və eyni məkanda olub”, – deyə Noboa vurğulayıb.

Petro isə Mantada olduğu müddətdə Ekvador hərbçiləri və şəxsi mühafizəsi tərəfindən müşayiət olunduğunu bildirib.

Rusiyada 666 rəqəminin sosial şəbəkələrdə paylaşılması qanun baxımından satanizmin təbliği kimi qiymətləndirilə bilər. Sözügedən hərəkat Rusiyada ekstremist kimi tanınıb və qadağan edilib.

Median.Az “RİA Novosti” agentliyinə istinadən xəbər verir ki, bu barədə məhkəmə qərarlarında qeyd olunur.

“Satanistlərin səciyyəvi vizual rəmzlərinə tək və ya cüt dairə daxilində yerləşdirilmiş pentaqram, yeddişaxəli işarə, o cümlədən kompozisiyada Bafomet təsvirinin və 666 rəqəminin yer alması daxildir”, – deyə sənəddə bildirilir.

Qeyd olunur ki, Bafomet keçi başlı fiqur kimi təsvir olunur və alnında pentaqram yerləşir.

Məsələn, agentliyin məlumatına görə, Tümen şəhərində yerli sakin sosial şəbəkədə Bafometin şəkillərini, 666 rəqəmini, həmçinin çevrilmiş pentaqramı və qurbanvermə mərasimini paylaşdığına görə min rubl (təxminən 23 manat) cərimə olunub.

Tomsk şəhərində isə inzibati həbs edilmiş şəxsin döymələri arasında, xüsusilə, sol əlinin baş barmağında 666 rəqəminin təsviri aşkarlanıb. Bundan sonra həmin şəxsə əlavə 14 sutka inzibati həbs cəzası verilib.

Sakit okeanda, Samoa sahillərində 6.2 bal gücündə zəlzələ qeydə alınıb.

Bu barədə Avropa-Aralıq dənizi Seysmoloji Mərkəzi məlumat yayıb.

Məlumata görə, yeraltı təkanların episentri Samoanın paytaxtı Apia şəhərindən 201 km cənub-qərbdə yerləşib. Zəlzələ ocağı 10 km dərinlikdə qeydə alınıb.

Dağıntı və ya xəsarət alanlar barədə məlumat yoxdur. Sunami təhlükəsi elan edilməyib.

“Telega” (“Telegram”ın alternativi) tətbiqi quraşdırılmış “iPhone” sahibləri proqram təminatının yenilənməsi zamanı ciddi nasazlıqla üzləşiblər.

Bu barədə “Kod Durova” məlumat yayıb.

İstifadəçilər bildirirlər ki, smartfon gecə avtomatik yenilənməyə cəhd edib, proses yarımçıq qalıb və cihaz tamamilə bloklanıb. Bir neçə servis mərkəzi nəşrə bildirib ki, təmirə gətirilən bütün “iPhone”larda “Telega” tətbiqi quraşdırılıb.

Texnobloqer Sergey Romantsev bu nəzəriyyəni yoxlamaq üçün eksperiment aparıb. O, eyni vaxtda üç fərqli “iPhone”u (“Air”, “17 Pro Max” və “16 Pro Max”) ən son iOS 26.4.1 versiyasına yeniləyib. “Telega” yalnız “16 Pro Max”da quraşdırılmışdı. Nəticədə məhz bu cihaz işə düşməyib – digərləri problemsiz işləyib. Romantsev əlavə edib ki, hər üç cihaz heç vaxt təmir olunmayıb, yaddaşları kifayət qədər boş olub (900 GB) və yeniləmələr mütəmadi quraşdırılıb.

Bloqerin versiyasına görə, Apple “Telega”nı zərərli kod kimi qiymətləndirdiyi üçün bu tətbiq olan cihazları qəsdən bloklayır.

Avstriyada məşhur “Hipp” markalı uşaq qidası bankalarında siçan zəhəri tapılıb.

Bu barədə “CBC News” Avstriya polisinə istinadən məlumat yayıb.

Polisin məlumatına görə, Burgenland federal torpağında yerləşən yaşayış məntəqəsində bir alıcı mağazadan şübhəli keyfiyyətə malik tərəvəz püresi alıb. Onun sözlərinə görə, banka artıq açılmış vəziyyətdə olub. Aparılan laborator analizlər nəticəsində bankaların tərkibində siçan zəhəri aşkarlanıb.

Bildirilir ki, həmin bankaların alt hissəsində qırmızı dairə şəklində nişan olub və qapaqlarının qoruyucu plombu zədələnib.

Market rəhbərliyi dərhal bu markaya məxsus məhsulları təkcə Avstriyada deyil, həm də Sloveniya, Macarıstan, Xorvatiya və İtaliyadakı 1 500 supermarketdən geri çağırıb.

“Hipp” şirkəti də uşaq qidası bankalarında zəhərli maddənin izlərinin aşkarlandığını təsdiqləyib. İstehsalçı bildirib ki, hadisə Avstriyada “kənar cinayət müdaxiləsi” nəticəsində baş vermiş ola bilər və bu məhsuldan istifadə etməməyə çağırıb.

Val Kilmer 2025-ci ildə həyatını itirib. Amma yeni “As Deep as the Grave” filminin treylerini izləyənlər bunu dərhal anlamaya bilər. Çünki aktyor ölümündən sonra süni intellekt vasitəsilə filmdə yer alıb.

Qaynarinfo xəbər verir ki, treyler 15 aprel tarixində “CinemaCon” tədbirində təqdim edilib. Kilmer filmdə Father Fintan adlı bir keşiş obrazını canlandırır. Bu obraz katolik inancları ilə yerli amerikalı inanclar arasında körpü yaradır.

Treylerdə səsləndirdiyi “Ölülərdən qorxma, məndən də qorxma” cümləsi diqqət çəkir. Bu ifadənin xüsusi seçim olduğu və həm də ekran arxasındakı vəziyyətə dolayı göndəriş daşıdığı düşünülür.

Film 1920-ci illərdə ABŞ-ın cənub-qərbində çalışan arxeoloq Ann və Earl Morris cütlüyünün fəaliyyətinə fokuslanır. Onlar Ancestral Puebloan xalqına aid qədim qalıqları aşkar edirlər.

Kilmer bu hekayə ilə sağlığında da maraqlanır. Lakin səhhətindəki problemlər çəkilişlərə tam qatılmasına imkan verməyib. Qırtlaq xərçəngi səbəbilə danışmaq və performans göstərmək çətinləşib.

Buna baxmayaraq, yaradıcı heyət onun rolu üçün xüsusi ssenari hazırlayıb. Rejissor Koerte Vurhees, Kilmer vəfat etdikdən sonra rolu başqa aktyorla əvəz etmək istəmədi və ssenaridə dəyişiklik etməyib. Layihə aktyorun ailəsinin, xüsusilə də qızı Mercedes Kilmerin razılığı ilə davam etdirildi. Nəticədə ekranlarda rəqəmsal Val Kilmer performansı ortaya çıxıb.

Komanda aktyorun əvvəlki görüntülərindən istifadə edib. Üz hərəkətləri və mimikalar bu materiallar əsasında yenidən qurulub. Səs üçün də əvvəlki yazılar və qeydlərdən istifadə olunub. Süni intellekt Kilmerin danışıq ritmini və səs tonunu təqlid edib. Daha sonra bu elementlər birləşdirilərək səhnələrə yerləşdirilib. Məqsəd sadəcə köhnə performansı kopyalamaq deyil, aktyorun üslubuna uyğun yeni bir ifa yaratmaq olub.

Qeyd olunur ki, Kilmer sağlığında da süni intellekt dəstəkli texnologiyalarla səsini bərpa etməyə çalışmışdı. Bu film həmin prosesin daha inkişaf etmiş bir mərhələsi kimi qiymətləndirilir.

Proses ailənin iştirakı ilə həyata keçirilib. Bu detal sənaye üçün vacib sayılır, çünki rəqəmsal aktyorların istifadəsi ciddi mübahisələr doğurur. “SAG-AFTRA” kimi təşkilatlar bu mövzuda xəbərdarlıqlar edir. Əsas sual isə budur: aktyorun üzünün və səsinin istifadəsinə kim və hansı şərtlərlə icazə verməlidir?

Bəzi prodüserlər bu texnologiyanı yarımçıq qalan layihələri tamamlamaq üçün fürsət kimi görür. Digərləri isə bunun sənətdə yeni risklər yaratdığını düşünür. Sərhədlər isə hələ tam müəyyən edilməyib.

Treylerdə Kilmeri tanımaq çətin deyil. Üz cizgiləri və səs oxşardır, lakin kiçik uyğunsuzluqlar hiss olunur. Hərəkətlər və emosional ifadə arasında müəyyən boşluq izləyicidə qəribə hiss yaradır. Süni intellekt olduğunu bilməsən belə, tam təbii olmayan bir detal sezilə bilər. Bu da “real aktyorluq” və “rəqəmsal performans” arasındakı fərqi daha görünən edir.

Bu film tək nümunə deyil. Süni intellektlə yaradılan performanslar getdikcə artır, lakin sənaye hələ bu texnologiyanın sərhədlərini müəyyənləşdirməyib. Texnologiya aktyorluq anlayışını dəyişdirir: performans artıq yalnız çəkiliş meydançasında deyil, sonradan rəqəmsal şəkildə də formalaşdırıla bilir. Bu dəyişikliklərin nəticəsi hələ tam aydın deyil, lakin bir reallıq artıq görünür: tamaşaçılar kino sənətində yeni bir aktyorluq formasına uyğunlaşmalı olacaq.

Türkiyə Prezidenti Rəcəb Tayyib Ərdoğan Antalya Diplomatiya Forumu çərçivəsində İraq Kürdüstan Regional Administrasiyasının rəhbəri Neçirvan Bərzani ilə görüşüb.

Türkiyə Prezident Administrasiyasının yaydığı məlumata görə, görüş zamanı regiondakı son hadisələr ətraflı müzakirə olunub.

Ərdoğan bildirib ki, İrana qarşı həyata keçirilən hüquqazidd hücumların yaratdığı qarşıdurma regiona ciddi təsir göstərir. O, müharibənin tam dayandırılması və davamlı sülh mühitinin yaradılması üçün Türkiyənin diplomatik səylərini artırdığını vurğulayıb.

Türkiyə prezidenti, həmçinin qeyd edib ki, İranla bağlı gündəmə gətirilən separatçı ssenarilər heç bir tərəfə fayda verməyəcək. O, İraqda sabitliyin və təhlükəsizliyin qorunmasının əsas prioritet olduğunu diqqətə çatdırıb.

Bundan əlavə, Hörmüz boğazı ətrafında baş verən hadisələrin neft tədarükündə marşrutların şaxələndirilməsinin əhəmiyyətini bir daha göstərdiyini deyən Ərdoğan “Kalkınma Yolu” layihəsinin strateji önəmini vurğulayıb və layihənin sürətləndirilməsinin vacibliyini qeyd edib.

Türkiyənin Diyarbakır şəhərinin Ergani rayonunda məktəblərin birində faciə baş verib.

Median.Az “Haber Global”a istinadən xəbər verir ki, hadisə səhər saatlarında olub.

Belə ki, məktəbin həyətindəki ağaca ildırım düşüb və ağacın altında olan 13 yaşlı Serkan Yıldırım, 14 yaşlı Kasım Yıldırım həyatını itirib.

Hadisə zamanı yaralanan M.Y isə “Diyarbakır Gazi Yaşargil Eğitim ve Araştırma” xəstəxanasına aparılıb, vəziyyətinin ağır olduğu bildirilir.

Qeyd edək ki, həyatını itirən uşaqlar əmioğludur.