Category: Dünya

İsrail ordusu İranın paytaxtı Tehranda Mehrabad hava limanında silah daşıyan 16 təyyarənin məhv edildiyini bildirib.

Median.Az xəbər verir ki, bu barədə İsrail Müdafiə Ordusu (SAXAL) özünün “Telegram” kanalında məlumat yayıb.

Məlumata görə, məhv edilən təyyarələr İslam İnqilabı Keşikçiləri Korpusunun (SEPAH) “Qüds” qüvvələrinə məxsus olub və onların vasitəsilə silahların “Hizbullah” təşkilatına çatdırıldığı iddia edilir.

SAXAL bildirib ki, Mehrabad hava limanı “Qüds” qüvvələri tərəfindən istifadə olunub və Yaxın Şərqdə rejimin silahlandırdığı və maliyyələşdirdiyi qruplaşmalar üçün əsas logistika mərkəzlərindən biri sayılıb.

İsrail ordusunun məlumatına görə, hücum zamanı İsrail Hərbi Hava Qüvvələrinin təyyarələri üçün təhlükə yaradan bir neçə İran qırıcısı da vurulub.

“Serbiya aprel ayında xarici tərəfdaşla birlikdə öz ərazisində pilotsuz uçuş aparatı (PUA) istehsalına başlayacaq.”

Median.Az-ın TASS-a istinadən xəbərinə görə, bu barədə Serbiya Prezidenti Aleksandar Vuçiç “Serbiya 2030” milli strategiyasının təqdimatı zamanı məlumat verib.

“Biz əvvəllər də bununla məşğul olmuşuq, müxtəlif versiyalar hazırlamışıq, amma indi, aprelin sonundan başlayaraq, bir xarici tərəfdaşla birlikdə Serbiya ərazisində tammiqyaslı dron istehsalına başlayacağıq”, – deyə o bildirib.

Bundan əlavə, Serbiya lideri Silahlı Qüvvələrin “İsrail modelinə uyğun olaraq” texnoloji modernizasiyası planlarını açıqlayıb. Aleksandar Vuçiç, həmçinin Çinin “Mint” şirkətinin iştirakı ilə ölkədə ilk humanoid robotları istehsalı fabrikinin bu payızdan gec olmayaraq yaradılacağını elan edib.

“Serbiyada müxtəlif tapşırıqlar üçün 1 000 belə robot və müxtəlif funksiyalara malik 10 000 robot it istehsal ediləcək. Mən süni intellekti gələcək üçün çox əhəmiyyətli hesab edirəm”, – deyə Vuçiç vurğulayıb.

İraq kürdləri İran ətrafında baş verən müharibədə neytral qalmaq qərarına gəlib.
 
Median.Az xəbər verir ki, bu barədə “Axios” nəşri Kürdüstan Regional Hökumətinin nümayəndələrinə istinadən məlumat yayıb.  
 
Mənbələrin sözlərinə görə, bu qərarın əsas səbəblərindən biri ABŞ-yə olan etimadsızlıq və Vaşinqtonun müəyyən mərhələdə dəstəkdən imtina edə biləcəyi ilə bağlı narahatlıqdır.  “Köhnə təcrübələrdən qaynaqlanan etimad problemlərimiz var və bu münaqişəyə qarışmaq istəmirik. Əgər İran rejimi sonda ayaqda qalarsa, bizi kim qoruyacaq?” – deyə kürd rəsmilərindən biri bildirib.  
 
Region rəhbərliyi eyni zamanda İranda mümkün hakimiyyət dəyişikliyinin perspektivlərinə də şübhə ilə yanaşır.  Digər yüksək vəzifəli məmur isə qeyd edib ki, “kürdlər bu münaqişədə ön cəbhəyə sürülən qüvvə olmamalıdır”.  İraq kürdləri bildirirlər ki, onların bölgəsi İran tərəfindən mümkün hücumlar qarşısında faktiki olaraq müdafiəsiz vəziyyətdədir.  musavat.com

“İran ərazisində həyata keçirilən hərbi əməliyyatlar zamanı ölkənin hərbi potensialına ciddi zərbələr endirilib”.

Median.Az “RİA Novosti”yə istinadən xəbər verir ki, bu sözləri ABŞ Prezidenti Donald Tramp bildirib.

“Biz İranda çox yaxşı işlədik. Nəticəni görürsünüz və bu, heyrətamiz idi. Üç gün ərzində biz 42 hərbi gəmini məhv etdik, onların bəziləri çox böyük idi. Bu, onların hərbi-dəniz qüvvələrinin sonu oldu. Biz onların hərbi hava qüvvələrini məhv etdik. Onların rabitə sistemlərini sıradan çıxardıq və bütün telekommunikasiya əlaqələri kəsildi. Onların necə əlaqə saxlayacağını bilmirəm, amma yəqin ki, bir yol tapacaqlar. Bu isə çox da yaxşı alınmır”, – deyə ABŞ prezidenti bildirib.

Dubay beynəlxalq hava limanında bəzi təyyarələrin eniş və qalxışı bərpa olunub.

Median.Az BBC-yə istinadla xəbər verir ki, bu gün aeroport ərazisi yaxınlığında partlayışla bağlı mediada görüntülər yayılıb. Dubay hökumətinin media ofisinin rəsmi “X” hesabında yayılan açıqlamada isə şənbə günü hava limanında ciddi hadisə baş vermədiyi bildirilib.

Dubay rəsmiləri bildirib ki, hava hücumunun qarşısı alındıqdan sonra qalıqların düşməsi nəticəsində baş verən kiçik insident nəzarət altına alınıb. Xəsarət alan yoxdur. Həmçinin sosial şəbəkələrdə Dubay beynəlxalq hava limanı ilə bağlı yayılan məlumatlar təkzib edilib.

İsrail Müdafiə Qüvvələri (SAXAL-IDF) Livanın cənubunda və Bekaa rayonunda “Hizbullah”ın silah anbarlarına və hərbi obyektlərinə, eləcə də bu təşkilatın “Radvan” xüsusi təyinatlı qüvvələrinin iki komandirinə endirilən zərbələr seriyasını bəyan edib.

Median.Az-ın TASS-a istinadən xəbərinə görə, bu barədə ordunun mətbuat xidmətindən məlumat verilib.

“SAXAL Livanın cənubunda və Bekaa vadisində “Hizbullah”ın raket qurğularına, silah anbarlarına və digər hərbi obyektlərinə növbəti zərbələr dalğasını başa çatdırıb. Bundan əlavə, Livanın cənubundakı iki “Hizbullah” komandanlıq mərkəzində “Radvan” xüsusi təyinatlı qüvvələrinin iki komandirinə zərbələr endirilib”, – deyə məlumatda bildirilib.

İran İslam İnqilabı Keşikçiləri Korpusunun (SEPAH) Hərbi Dəniz Qüvvələri BƏƏ-də yerləşən ABŞ-nin “Əl-Dafra” hərbi bazasına pilotsuz uçuş aparatları (PUA) ilə zərbə endirib.

Bu barədə SEPAH-ın mətbuat xidməti məlumat yayıb.

İran tərəfinin məlumatına görə, hücum nəticəsində ABŞ-nin peyk rabitə mərkəzi, eləcə də erkən xəbərdarlıq və atəşin idarə olunması üçün radiolokasiya stansiyaları vurulub.

“Pis vəziyyətdə olan İran Yaxın Şərq qonşularından üzr istəyib və artıq onlara atəş açmayacağına söz verib. Bu vəd yalnız ABŞ və İsrailin amansız hücumu səbəbindən verilib”.

Bu sözləri ABŞ Prezidenti Donald Tramp “Truth” sosial mediasında yazıb. O bildirib ki, İran Yaxın Şərqi ələ keçirmək və idarə etmək istəyir.

“İlk dəfədir İran min illər ərzində ətraf Yaxın Şərq ölkələrinə uduzur. İran artıq Yaxın Şərqin əzazili deyil, əksinə, məğlubudur və təslim olana və ya daha çox ehtimal ki, tamamilə dağılana qədər onilliklər boyu belə qalacaq. Bu gün İrana çox ağır zərbə vurulacaq. İranın pis davranışı səbəbindən indiyə qədər hədəfə alınmayan ərazilər və insan qruplarının tam dağıntı və ölümü ciddi şəkildə nəzərdən keçirilir”,-deyə Tramp bildirib.

“Region ölkələrindən hücumlar edilmədiyi təqdirdə onlara qarşı əlavə hücumlar olmayacaq”.

Bunu İran Prezidenti Məsud Pezeşkian deyib.

Onun sözlərinə görə, bu qərar ölkənin Müvəqqəti İdarəetmə Şurası tərəfindən qəbul edilib.

Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.

İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.

Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.

İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.

Səudiyyə Ərəbistanının hava hücumundan müdafiə sistemləri Səudiyyə hava məkanında iki İran ballistik raketini zərərsizləşdirib.

Bu barədə Səudiyyə Ərəbistanının Müdafiə Nazirliyi məlumat verib.

Bildirilib ki, “Şahzadə Sultan” aviabazasına zərbə endirmək üçün nəzərdə tutulan iki ballistik raket məhv edilib. Xəbərdə zərərsizləşdirilən raketlərin dəqiq yeri göstərilməyib.

Bundan başqa İordaniya səmasında da İran dronu məhv edilib. “Al Jazeera”nin məlumatına görə, dörd ədəd İran PUA-sı İrbid şəhəri üzərində vurulub.