Category: Siyasət

Martın 5-də Latviya Respublikasının Prezidenti Edqars Rinkeviçs Azərbaycan Respublikasının Prezidenti İlham Əliyevə zəng edib.

APA xəbər verir ki, telefon danışığı zamanı Latviya Prezidenti İran İslam Respublikasının pilotsuz uçuş aparatları ilə Azərbaycan ərazisinə törətdiyi hücumu qətiyyətlə pislədiyini bildirib. Edqars Rinkeviçs baş vermiş hadisə ilə bağlı Azərbaycan dövləti və xalqı ilə həmrəy olduğunu vurğulayıb, hücum nəticəsində yaralananların tezliklə şəfa tapmalarını diləyib.

Prezident İlham Əliyev telefon zənginə və nümayiş etdirilən mövqeyə görə Latviyanın dövlət başçısına təşəkkürünü bildirib.

Söhbət zamanı dövlət başçıları Azərbaycan ilə Latviya arasında ikitərəfli münasibətlərin cari vəziyyəti, gələcək təmaslar və əməkdaşlığın perspektivləri barədə fikir mübadiləsi aparıblar.

Martın 5-də Türkiyə milli müdafiə naziri Yaşar Gülerin təşəbbüsü ilə Azərbaycan Respublikasının müdafiə naziri general-polkovnik Zakir Həsənov arasında telefon danışığı olub.

Bu barədə Müdafiə Nazirliyi məlumat yayıb.

Bildirilib ki, tərəflər arasında İran İslam Respublikasının silahlı qüvvələri tərəfindən İran ərazisindən pilotsuz uçuş aparatları (PUA) vasitəsilə Azərbaycan Respublikasının Naxçıvan Muxtar Respublikasının Naxçıvan beynəlxalq hava limanına və digər mülki infrastruktura hücum aktları müzakirə olunub.

Nazirlər həmçinin, ölkələrimiz arasında əlaqələr, regiondakı vəziyyət və təhlükəsizlik məsələləri ilə bağlı ətraflı fikir mübadiləsi aparıblar.

Martın 5-də İranın xarici işlər naziri Seyid Abbas Əraqçı azərbaycanlı həmkarı Ceyhun Bayramova zəng vurub.

Bu barədə Xarici İşlər Nazirliyi (XİN) məlumat yayıb.

Telefon danışığı zamanı, nazir Ceyhun Bayramov İran İslam Respublikası tərəfindən Azərbaycanın Naxçıvan Muxtar Respublikası ərazisinə edilmiş dron hücumlarını qətiyyətlə pisləyib, bu hücumlarla bağlı qəti etirazını bildirib. Azərbaycan ərazisinə bu hücumların beynəlxalq hüququn norma və prinsiplərinə zidd olduğu, regionda gərginliyin artmasına xidmət etdiyini vurğulayıb.

İranlı Naxçıvan Muxtar Respublikası ərazisinə dron hücumları ilə bağlı narahatlığını ifadə edib. İran tərəfinin və hərbçilərin bu hadisə ilə bağlı araşdırma başladığını bildirib. A.Əraqçı yaralanan mülki şəxslərə şəfa diləyib.

İran tərəfindən hücumla bağlı üzr istənilməsini, araşdırmaların nəticələrinə dair qısa müddət ərzində izahat verilməsini, bu kimi halların gələcəkdə təkrarlanmaması üçün zəruri tədbirlər görülməsini gözlədiyimiz diqqətə çatdırılıb.

Moldova Naxçıvana İran tərəfindən edilən hücumları sərt şəkildə pisləyib.

Bu barədə sözügedən ölkənin xarici işlər naziri Mihai Popşoy açıqlama verib.

“Moldova tərəfi Azərbaycanın Naxçıvan Muxtar Respublikasında mülki infrastrukturu hədəfə alan və dinc sakinlərin xəsarət alması ilə nəticələnən hücumları qətiyyətlə pisləyir” – deyə, nazir qeyd edib.

Popşoy həmçinin vurğulayıb ki, Moldova Azərbaycanla həmrəy olduğunu bəyan edir, ölkənin suverenliyi və ərazi bütövlüyünü hər zaman dəstəkləyir.

“İranın pilotsuz uçuş aparatlarının Naxçıvan Muxtar Respublikasının ərazisinə endirdiyi zərbələr nəticəsində hava limanının zərər görməsi və dinc sakinlərin xəsarət alması beynəlxalq hüququn və dövlətlərin suverenliyinin kobud şəkildə pozulmasıdır”.

Bu barədə Estoniyanın xarici işlər naziri Marqus Tsaxna “X” sosial şəbəkəsindəki hesabında paylaşım edib.

O bildirib ki, region ölkələrinə qarşı bu cür düşünülməmiş addımlar qəbuledilməzdir və dərhal dayandırılmalıdır.

“Estoniya Azərbaycanla həmrəyliyini ifadə edir və regionda sülhün və təhlükəsizliyin təmin olunmasını dəstəkləyir”, – deyə o qeyd edib.

Gürcüstan Xarici İşlər Nazirliyi Azərbaycanın Naxçıvan Muxtar Respublikası ərazisində baş verən pilotsuz təyyarə hücumunu kəskin şəkildə pisləyib.

Median.Az “Report”a istinadən xəbər verir ki, bəyanatda qeyd olunub:

“Hücum nəticəsində bir neçə vətəndaş xəsarət alıb. Beynəlxalq hüququn prinsip və normalarını kobud şəkildə pozan və regionda gərginliyi artıran istənilən hərəkətlər qəbuledilməzdir”.

Bəyanatda vurğulanıb ki, Gürcüstanla Azərbaycan arasında mövcud olan strateji tərəfdaşlıq və dostluq münasibətləri nəzərə alınaraq, Gürcüstan çətin vəziyyətdə Azərbaycan xalqı ilə həmrəyliyini ifadə edir.

Qeyd olunub ki, Gürcüstan regionda sülhün və sabitliyin qorunmasını vacib hesab edir və gərginliyin azaldılması üçün diplomatik dialoqu dəstəkləyir.

Türkiyə Xarici İşlər Nazirliyi (XİN) İranın Naxçıvana PUA hücumlarını qətiyyətlə pisləyib.

Bu barədə qardaş ölkənin XİN-in sosial şəbəkə hesabında paylaşım edilib.

Nazirliyin bəyanatında Naxçıvana bu gün edilən hücumların qəbuledilməz olduğu vurğulanıb.

Bildirilib ki, regiondakı üçüncü ölkələri hədəf alan və müharibənin yayılma riskini artıran hücumlar dərhal dayandırılmalıdır.

Bəyanatda həmçinin Türkiyənin Azərbaycana dəstəyinin davam edəcəyi qeyd olunub:

“Türkiyə həmişə olduğu kimi, Azərbaycanın yanında olmağa davam edəcək”.

Qazaxıstan xarici işlər naziri Yermek Koşerbayev Azərbaycan xarici işlər naziri Ceyhun Bayramova zəng vurub.

Bu barədə Xarici İşlər Nazirliyi məlumat yayıb.

Qeyd olunub ki, nazir Ceyhun Bayramov 5 mart tarixində mülki infrastruktur və şəxslərə zərərlə müşayiət olunan İran İslam Respublikası tərəfindən Naxçıvan Muxtar Respublikası ərazisinə qarşı dronla həyata keçirilmiş hücumların suverenliyimizə və ərazi bütövlüyümüzə zidd olduğunu vurğulayıb.

İran İslam Respublikasından qeyd olunan məsələyə aydınlıq gətirilməsini, izahat verilməsini, üzrxahlıq edilməsini, bu kimi halların təkrarlanmaması üçün zəruri təxirəsalınmaz tədbirlər görülməsini tələb etdiyimiz Qazaxıstan tərəfinin diqqətinə çatdırıb.

Qazaxıstan naziri bu hücumlardan dərin narahatlıq ifadə edib, vəziyyətin daha da gərginləşməyəcəyinə ümidvar olduğunu bildirib.