Month: May 2020

Cəfər Cabbarlı adına İrəvan Dövlət Azərbaycan Dram Teatrının baş rejissoru, əməkdar artist Sərvər Əliyevdə koronavirusun əlamətləri müşahidə olunduğundan o, xəstəxanaya yerləşdirilib.

Hazırda xəstəxanada müalicə olunan sənətçi Oxu.Az-ın əməkdaşı ilə söhbətində koronavirusdan verdiyi test nəticələrinin neqativ çıxdığını açıqlayıb:

“Ötən gün özümü çox pis hiss edirdim. Həkimlər məni reanimasiyaya yerləşdirdilər. Yaxma nümunələrin nəticələri mənfi çıxdı. Ürəyimdə problem var. Şəkərim və təzyiqim yüksəkdir. Bütün xəstəliklərim sanki baş qaldırıb. Ağciyərlərimdə sətəlcəm aşkarlanıb. M.Ə.Əfəndiyev adına 2 saylı Şəhər Kliniki Xəstəxanasında həkimlərin ciddi nəzarəti altında müalicəmi davam etdirirəm”.

S.Əliyev ölkədə karantin rejiminin yumşaldılmasından sonra xəstələndiyini bildirib:

“Ölkədə karantin rejimi tətbiq olunandan bəri küçəyə çıxmırdım. Karantin rejiminin yumşaldılmasından sonra insanlar küçələrə axın etdi. Bir neçə saatlıq banka getdim. Qoruyucu maskadan istifadə etsəm də, işə yaramadı. Düşünürəm ki, elə bankda sətəlcəmə yoluxmuşam”.

S.Əliyevin ailə üzvlərindən koronavirusla bağlı test nümunələri götürülüb. Testlərin nəticələri neqativ çıxıb.

İctimai Televiziyada (İTV) eksklüziv yayım hüququ ilə “Əli və Nino” filmi izləyicilərə təqdim olunacaq.

Böyük tarixlərin yazıldığı dövrün təsvirini verən məhəbbət dastanı bu gün saat 23:00-da yayımlanacaq.

“Mədəniyyət” və “ARB Günəş” telekanallarında yayımlanan “Dərs vaxtı” verilişinin mayın 29-nq nəzərdə tutulan cədvəli müəyyənləşdirilib.

Təhsil Nazirliyindən verilən məlumata görə, nazirlik dərs cədvəlinə diqqət etməyi, dərsi “Dərs vaxtı”nda öyrənməyi tövsiyə edir.

Qeyd edək ki, martın 11-dən Təhsil Nazirliyinin təşkilatçılığı ilə “Mədəniyyət” və “ARB Günəş” telekanallarında “Dərs vaxtı” proqramının yayımına start verilib.

Proqram çərçivəsində həftənin beş günü teledərslər keçirilir. Teledərslər bütün sinifləri əhatə edir, dərs mövzularına dair qısa izah və təlimatlar təqdim olunur.

Özünü Xüsusi Dövlət Mühafizə Xidmətinin əməkdaşı kimi təqdim edən şəxsi polislər ifşa etdi.

Mayın 28-də gecə saat 03:00 radələrində Yasamal rayonu ərazisində xidmət aparan Daxili İşlər Nazirliyinin (DİN) Əlahiddə Çevik Polis Alayının əməkdaşları hərbi geyimdə olan bir nəfəri baş nahiyəsindən xəsarət almış halda yolun kənarındakı səkidə oturmuş vəziyyətdə görərək, ona yaxınlaşıblar.

DİN-dən verilən məlumata görə, həmin şəxs özünü polis əməkdaşlarına Xüsusi Dövlət Mühafizə Xidmətinin bölük komandiri kimi təqdim edib.

O, sərxoş və yaralı vəziyyətdə olduğuna görə asayiş keşikçiləri tibbi yardım göstərilməsi məqsədi ilə dərhal hadisə yerinə təcili tibbi yardım stansiyasının həkimlərini dəvət ediblər.

İlkin tibbi yardım göstərildikdən sonra həmin şəxsin üzərində xidməti vəsiqənin olmaması polis əməkdaşlarında əsaslı şübhələr yaradıb və o, müvafiq araşdırmaların aparılması məqsədilə Yasamal RPİ-nin 29-cu Polis Şöbəsinə gətirilib.

Araşdırmalarla onun Ağdaş rayon Korarx kənd sakini Elmir Əhmədov olması və XDMX-nın əməkdaşı olması barədə verdiyi məlumatın tamamilə yalan olduğu müəyyən edilib.

E.Əhmədov izahatında xüsusi karantin rejimi dövründə nəzarət postlarından sərbəst və maneəsiz keçmək üçün bu formadan istifadə etdiyini etiraf edib.

Araşdırmalar zamanı o da müəyyən edilib ki, E.Əhmədov mülki hüquqi öhdəliklərin icrasından yayındığına görə, Ağdaş RPŞ tərəfindən də axtarışdadır.

Faktla bağlı Polis Şöbəsində müvafiq araşdırmalar aparılır, nəticəsindən asılı olaraq məsələyə hüquqi qiymət veriləcək.

Salyanda yaşı 200-dən yuxarı olan bina var.

Baku.Tv xəbər verir ki, bina dam örtüyü istisna olmaqla necə tikilibsə, elə də qalıb.

Yaşlı sakinlərin dediyinə görə, Salyanda bir əsrdən çox yaşı olan binalar qalsa da, 200 ildən çox yaşı olan belə nadir bina yoxdur. Bu qədim ev rayonun Babazənan yaşayış massivində, Kür çayının yaxınlığında tikilib.

Vaxtilə bu yaşayış binasını salyanlı bəylərdən biri tikdirib. Sovet hakimiyyəti qurulana kimi evdə yaşayış olub.

Binanın hündürlüyü 3,5 metr, qırmızı kərpicdən hörülmüş divarın qalınlığı isə bir metrdir.

Yaşayış evindən ötən əsrin 90-cı illərinə kimi idarə, müəssisə və məktəb kimi istifadə edilib. O vaxtdan indiyə kimi sahibsiz qaldığından, binanı dağılmamaq üçün yerli sakinlər qoruyub.

Sakinlər deyirlər ki, gələcək nəsillərin keçmişimizi bilməsi baxımından belə binaların qorunması olduqca vacibdir. Əgər bu bina dövlət tərəfindən qorunub saxlanılmazsa, gələcəkdə məhv olub gedəcək.

Yay gələn kimi Şəkidə insanların içməli su problemi bitib-tükənmək bilmir.

Lakin bu kənddə artıq su problemi elə bir həddə çatıb ki, insanlara, onların təsərrüfatlarına ziyan vurmağa başlayıb. Söhbət Şəkinin Qoxmuq kəndindən gedir.

Susuzluq kənd sakinlərinin təsərrüfat fəaliyyətini pozub. Min əziyyətlə əkib-becərilən bitkilər bu səbəbdən quruyur.

Mövzu ilə bağlı ARB TV-nin “Günə Doğru” proqramında süjet yayımlanıb.