Category: Avto

“Volkswagen” yolsuzluq seqmentində populyar yeni model olan Tayronu təqdim etməyə hazırlaşır.

Bu yeni model daha əvvəl Çin bazarında təqdim edilən və böyük diqqət çəkən Tayronun Avropa versiyası kimi görünəcək.

“Volkswagen”in dizayn meneceri Andreas Mindt “İnstagram” hesabında paylaşdığı qısa video ilə Tayronun 10 oktyabrda rəsmi olaraq təqdim ediləcəyini açıqlayıb.

Yeni modelin hazırda mövcud olan “Tiguan” və “Touareg” arasında qərarlaşacağı bildirilir.

Mühərrik variantları haqqında hələ dəqiq məlumat olmasa da, Tayronun benzin, dizel, hibrid və plug-in hibrid versiyalarında satışa çıxacağı gözlənilir.

Xüsusilə plug-in hibrid versiyalarının 204 və 272 at gücü variantları ilə gələcəyi təxmin edilir.

“Williams” komandasının pilotu Aleks Albon “Formula-1” Azərbaycan Qran-prisindəki iştirakı ilə bağlı fikirlərini bölüşüb.

Bu barədə f1news.ru məlumat yayıb.

“Bakıda biz bir çox stasionar treklərdən sonra ilk küçə səhnəsini gözləyirik. Bakıdakı trekdə yaxşı ritm var, mən onunla yaxşı tanışam və yarışa hazırlaşmağa şadam.

Mən yenilənmiş avtomobili başqa tipli trekdə sınaqdan keçirmək və onun müxtəlif şəraitlərdə performansını qiymətləndirmək fürsətini səbirsizliklə gözləyirəm. Adətən bu yarış maraqlı və gözlənilməz olur, yaxşı ötmə imkanları var ki, biz bu həftə sonu bundan istifadə etməyə ümid edirik”, – Aleks Albon bildirib.

“Bakıda ilk dəfə yarışacağam və mənim öyrənməli olduğum çox şey var. Bu həftə sonu üçün ciddi hazırlaşmışam və treki başa düşmək, avtomobil haqqında daha çox məlumat əldə etmək üçün onu sakit şəkildə idarə etməyə çalışacağam. Ümid edək ki, mənim və komandam üçün daha bir pozitiv həftəsonu olacaq”, – “Williams” komandasının digər pilotu Franko Kolapinto bildirib.

“Formula-1″də ən çox qazanan pilotların adları açıqlanıb.

Median.Az İngiltərə mətbuatına istinadən xəbər verir ki, ümumilikdə 20 sürücü, bonuslar istisna olmaqla, ildə təxminən 205 milyon funt-sterlinq qazanır.

Siyahıya isə hazırkı dünya çempionu Maks Ferstappen başçılıq edir. Onun illik qazancı 58 milyon dollardan artıqdır.

İlk onluq isə aşağıdakı kimidir:

1. Maks Verstappen (Niderland) – 58,859,503 milyon dollar

2. Lüis Hemilton (Böyük Britaniya) – 44,471,625

3. Çarlz Lekler (Monako) – 34,003,831

4. Lando Noris (Böyük Britaniya) – 19,616,498

5. Fernando Alonso (İspaniya) – 18,309,197

6. Corc Rassel (Böyük Britaniya) – 18,309,197

7. Serxio Peres (Meksika) – 14,387,194

8. Karlos Sans (İspaniya) – 11,771,877

9. Valteri Bottas (Finlandiya) – 9,155,717

10. Daniel Rikkardo (Avstraliya) – 6,539,174

Qeyd edək ki, “Formula-1″in növbəti mərhələsi sentyabrın 13-15-də Azərbaycanda keçiriləcək.

Şimali Amerika bazarında 2019-cu ildən bu yana istehsal olunan 1 227 808 “Ram 1500” pikapı geri çağırılıb.

Bu barədə Median.Az Auto.ru-ya istinadən xəbər verir.

Bildirilir ki, proqram təminatının nasazlığı səbəbindən bu maşınlarda istiqamət stabilləşdirmə sistemi qəfildən sönə bilər.

Məlumata görə, ABS və ESP idarəetmə blokunda proqram təminatı xətası aşkar edilib. Sonuncu istənilən vaxt fəaliyyətini dayandıra bilər. Sürücü bunu alətlər panelindəki xəbərdaredici lampalar yandıqda görəcək. Bu qüsurla bağlı hər hansı insident barədə məlumat verilmir.

Sentyabrın 12-dən etibarən ABŞ dilerləri nöqsanlı avtomobil sahiblərini xəbərdar etməyə başlayacaqlar. Servisi ziyarət etdikləri zaman onların proqram təminatı yenilənəcək. Proqram təminatının ən son versiyasında nasazlıqlar istisnadır. Ümumilikdə, 2019-cu il buraxılışından başlayaraq, təqribən 1.23 milyon pikap yoxlanılmalıdır.

“Rusiya istehsalı olan avtomobillərin Rusiya-Ukrayna müharibəsi ilə əlaqədar ehtiyat hissələri tapılmır. Orjinal Rusiya ehtiyat hissələri tapmaq çətindir”.

Bunu Qaynarinfo-ya açıqlamasında nəqliyat eksperti Aslan Əsədov maşın bazarında Rusiya istehsalı olan avtomobillərə tələbatın az olması ilə bağlı məlumata aydınlıq gətirərkən deyib.

Onun sözlərinə görə, bu gün əsasən bazarda Çin istehsalı olan avtomobillər üstünlük təşkil edir:

“Vətəndaş fikirləşir ki, əgər Rusiya istehsalı olan avtomobil alsa, problem yarananda onun ehtiyat hissələrini tapa bilməyəcək. Ona görə də bir az da xərc çəkib normal avtomobil alırlar. Bu, əsas səbəblərdən biridir. Avtomobillərin ehtiyat hissələrinin əksəriyyəti keyfiyyətsizdir, alınan hissələr heç bir il də davamlı olmur. İkinci səbəb Rusiya istehsalı olan avtomobillərin yanacaq fərqidir. Rusiya avtomobillərinə ancaq bölgələrdə maraq qalıb. Bu avtomobilləri ancaq büdcəsi kiçik olan şəxslər alır”.

Aslan Əsədov əlavə edib ki, ehtiyat hissələri ilə bağlı yaranan problemlər insanları Rusiya istehsalı olan avtomobillərdən uzaqlaşdırır:

“Əvvəl alınan detal bir il işləyirdisə, bu gün onlar üç ay da davam gətirmir. Maşın ehtiyat hissələri çox keyfiyyətsizdir. Azərbaycana əsasən Çin istehsalı olan keyfiyyətsiz hissələr gətirilir. Düzdür, Çinin də keyfiyyətli məhsulları var, amma onları bizə gətirən azdır”.

Aslan Əsədov bu gün maşın bazarında ən ucuz avtomobillərin qiymətini açıqlayıb:

“Bazarda 4-5 minə Rusiya istehsalı olan avtomobil almaq olar”.

Qeyd edək ki, avtomobil bazarlarında aylardır durğunluq yaşanır. Ən əsası bazarda Rusiya istehsalı olan avtomobillərə maraq da azalıb.

“Göz qiymətləndirməsi” ilə həmişə maşının qəzaya düşüb-düşmədiyini bilmək olmur. Yalnız mütəxəssis diqqətli diaqnostikadan sonra avtomobilin yol-nəqliyyat hadisəsinə düşüb-düşmədiyini və bunun istismarına necə təsir edəcəyini dəqiq müəyyən edə bilər. Bununla belə, alıcını narahat etməli olan bir neçə əlamət var.

Avtomobil təmiri şirkətlərindən birinin mexaniki təmir departamentinin direktoru Vadim Strelbitski “Rossiyskaya Qazeta”ya bu barədə danışıb.

“Belə əlamətlər arasında, məsələn, kuzov panelləri arasındakı boşluqları göstərmək olar. Əgər onlar qeyri-bərabərdirsə və ya həddindən artıq böyükdürsə, bu, qəzadan sonra keyfiyyətsiz təmirin nəticəsi ola bilər. Baxış zamanı kuzovun qüsurlarına xüsusi diqqət yetirməyi tövsiyə edirəm. Kuzovda müxtəlif əziklər, cızıqlar və çatlar qəzadan xəbər verə bilər”, – deyə mütəxəssis deyib.

“Kuzovun qeyri-bərabər rəngi də narahatlıq doğurmalıdır: məsələn, müxtəlif panellərdə çalar fərqlidirsə və ya yenidən rənglənmə izləri varsa, bu, qəzadan sonra təmirin əlamətidir. Həmçinin salonun vəziyyətinə xüsusi diqqət yetirməyi tövsiyə edirəm. Əgər zərbə və ya zədələnmə izləri görünürsə (məsələn, təhlükəsizlik yastıqlarının cırılması, panellərin deformasiyası və ya tavanın cırılması), bu da qəzaya işarə edə bilər”, – deyə Strelbitski qeyd edib.

Azərbaycanın “Azərmaş” şirkəti və Özbəkistan CKD (Complete Knock Down) texnologiyasından istifadə etməklə “Chevrolet Cobalt” avtomobillərinin yığılmasının təşkili üzərində işləyir.

Bu barədə “Trend” agentliyi məlumat yayıb.

Məlumatda qeyd olunur ki, “Cobalt” modelinin istehsal həcmi ildə 15 min avtomobil istehsal etmək üçün nəzərdə tutulub və onun buraxılışı 2025-ci ilə planlaşdırılır.

Əməkdaşlıq çərçivəsində Hacıqabul şəhərindəki zavodda “Chevrolet Tracker” və “Chevrolet Onix” avtomobillərinin istehsalı da davam etdirilir.

Qeyd edək ki, Özbəkistanda minik avtomobilləri, yük avtomobilləri, kommersiya və xüsusi texnika, həmçinin avtobusların istehsal gücü ildə 500 min ədəddən çoxdur.

Özbəkistanda iri avtomobil istehsalı müəssisələri “UzAuto Motors”, “MAN Auto Uzbekistan”, “SamAuto”, “ADM Jizzax”dır. Ölkə, həmçinin BYD (Build Your Dreams) elektrikli avtomobillərinin istehsalına başlayıb.

Öz növbəsində Azərbaycanda da maşınqayırma sənayesi inkişaf edir. İri müəssisələr olan “Azərmaş”, “AzSamand”, Gəncə və Naxçıvan şəhərlərində kommersiya və yük avtomobilləri istehsalı zavodlarıdır.

Xatırladaq ki, avqustun 22-də Daşkənddə Özbəkistan-Azərbaycan biznes forumu keçirilib. Danışıqlar nəticəsində 2 milyard dollar dəyərində layihələr portfeli formalaşdırılıb.

“Aston Martin” 835 at gücü və 1000 Nm gücündə ikiqat turbolu tarixdə ən güclü və sürətli mühərrikli avtomobilini təqdim edib (müqayisə üçün – “Ferrari 12Cilindri”də yalnız 830 at gücü var).

Median.Az bu barədə auto.ru-ya istinadən məlumat verir.

Bildirilib ki, mühərrik səkkizdiapazonlu avtomatik ötürmə qutusu və yüksək sürtünməli diferensial ilə işləyir və təkər bazası daxilində, yəni ön oxun arxasında quraşdırılıb. Yeni arxa təkərli flaqman 60 mil/saat (96 km/saat) sürətə yalnız 3,2 saniyəyə çatacaq.

Yeni “Vanquish”in şassisi brendin digər modellərindən gücləndirilmiş stabilizatorları, yeni adaptiv “Bilstein DTX” amortizatorları, həmçinin yenidən kalibrlənmiş sükan gücləndirici və stabilləşdirici sistemləri ilə fərqlənir.
Bundan əlavə, “Vanquish” DBS ilə müqayisədə sərtliyi 75% artırılmış yeni gövdə alıb. Öndə 410 millimetr və arxada 360 millimetr diskləri olan xüsusi davamlı karbon-keramik əyləclər nəzərdə tutulub. Təkərlər 21 düym (53 santimetr) diametrindədir.

“Aston Martin Vanquish”, inteqrasiya edilmiş spoyler, böyük diffuzor və hər biri yeddi üfüqi zolaqdan ibarət olan arxa işıqlarla fərqlənən arxa hissə istisna olmaqla, ümumiyyətlə ənənəvi dizayna malikdir. İki növ xaric sistemi təklif olunur – paslanmayan polad və ya titan.
Məlumata görə, bu avtomobilin qiyməti 420 000 dollardan başlayacaq.

“Volkswagen” şirkəti “AirConsole” oyun platformasına dəstəyin tezliklə bəzi elektrik avtomobillərinin media sistemlərində görünəcəyini açıqlayıb.

Median.Az bu barədə auto.ru-ya istinadən xəbər verir.

Vəd edilib ki, nəticədə “Volkswagen” istifadəçiləri yarışlar və viktorinalar da daxil olmaqla 130-dan çox müxtəlif növ oyuna çıxış əldə edəcəklər. Sentyabr ayında yeniliyin tədricən paylanmasına başlanmalıdır.

Oyun platformasına daxil olmaq üçün aktiv internet bağlantısı tələb olunacaq və kontrollerlər əvəzinə istifadəçilər QR kodu skanerdən keçirməklə sinxronlaşdırılmış öz smartfonlarından istifadə edə biləcəklər. Siz yalnız stasionar avtomobillərdə – məsələn, dayanacaqda və ya batareya doldurularkən oynaya bilərsiniz.

Yeni variant “Volkswagen ID.7″də 15 düymlük displeyli “Pro S” komplektasiyasında debüt edəcək. Daha sonra oyunlar digər elektrikli avtomobillərdə də peyda olacaq və 2025-ci ildə “Volkswagen”in bu yeniliyi ənənəvi modellərə, o cümlədən “Golf”, “Passat” və “Tiguan”a tətbiq etməyi gözlənilir.

Cənubi Koreyanın elektrikli avtomobil bazarında satışlar kəskin şəkildə azalıb. Səbəb “Mercedes-Benz EQE” markalı elektrik avtomobilinin yeraltı qarajında baş verən yanğın olub ki, bu da əhalinin elektriklə işləyən avtomobillərin təhlükəsizliyi ilə bağlı narahatlığına səbəb olub.

Oxu.az ixbt.com-a istinadən xəbər verir ki, bu vəziyyətə cavab olaraq Cənubi Koreya hökuməti dərhal reaksiya verib və elektriklə işləyən avtomobillərin təhlükəsizliyini müzakirə etmək üçün təcili iclas çağırıb.

Cənubi Koreya hökuməti fövqəladə iclasda elektrik avtomobilləri istehsal edən şirkətləri akkumulyator təchizatçıları haqqında məlumatı açıqlamağa dəvət edib. Eyni zamanda, avtomobil şirkətləri də istehlakçı tələbatını stimullaşdırmaq üçün proaktiv tədbirlər görüb və qiymətlərin aşağı salınması kampaniyalarına başlayıblar.

“Getcha”nın məlumatına görə, bir çox avtomobil dilerləri elektrikli avtomobil alıcılarına pərakəndə satış qiymətindən 30 %-ə qədər endirimlər təklif ediblər. 30-a yaxın model ən azı 20 % endirim əldə edib. Aksiyada “Volkswagen”, “Mercedes-Benz”, “BMW” və “Audi” iştirak edir. “Audi” “e-tron” modellərinə 29,5 %-ə qədər endirimlər təqdim edəcək. “BMW iX” və “i7″nin qiyməti 12 %, “Mercedes-Benz EQE” 10 % enib, “Volkswagen ID.4″də endirimlər isə 23 %-ə çatıb.

Bazarda “elektromobil panikası”nın olduğunu təsdiqləyən dilerlər normal şəraitdə yayda belə endirimlərin heç vaxt olmayacağını da əlavə edirlər.