Category: Cəmiyyət

İçərişəhər ərazisində Qala divarının bir hissəsində baş vermiş qismən dağılma ilə bağlı “İçərişəhər” Dövlət Tarix-Memarlıq Qoruğu İdarəsi (DTMQİ) tərəfindən dərhal operativ tədbirlər görülüb.

Bu barədə “İçərişəhər” DTMQİ-nin Mətbuat xidmətindən məlumat verilib.

Qeyd edilib ki, hazırda əraziyə yüksək ixtisaslı mütəxəssislər cəlb olunub: “Mövcud fəaliyyət planına uyğun olaraq, ilkin mərhələdə təcili konservasiya və sabitləşdirmə tədbirləri həyata keçiriləcək. Bu tədbirlər zədələnmiş sahənin daha da deformasiyaya uğramasının qarşısını almağa və konstruksiyanın dayanıqlığını təmin etməyə yönəlib.

Növbəti mərhələdə ərazidə ətraflı texniki və mühəndis-ekspertiza qiymətləndirilməsi aparılacaq. Qiymətləndirmənin nəticələrinə əsasən, Qala divarının zədələnmiş hissəsinin elmi əsaslandırılmış bərpası həyata keçiriləcək”.

Bu yanaşmanın daha əvvəl İçərişəhər ərazisində həyata keçirilmiş digər bərpa layihələrində uğurla tətbiq olunduğu vurğulanıb.

“İçərişəhər” Dövlət Tarix-Memarlıq Qoruğu İdarəsi bildirib ki, Qala divarlarında son illər ərzində hissəvi bərpa və konservasiya tədbirləri sistemli şəkildə həyata keçirilib: “Hazırda bu tədbirlər mərhələli plan çərçivəsində davam etdirilir və İsmailiyyə Sarayına bitişik hissəni əhatə edir. Aşınma hadisəsinin baş verdiyi 13 və 14 saylı bürclərin kəsişmə hissəsində indiyədək hər hansı bərpa və ya restavrasiya müdaxiləsi həyata keçirilməyib. Aşınmaya əsas səbəb son günlər müşahidə olunan aramsız atmosfer yağıntıları nəticəsində yaranan rütubət və təbii erroziya prosesləridir.

Aparılacaq bütün bərpa işləri yüksək dəqiqlik, xüsusi həssaslıq və beynəlxalq standartlara uyğun şəkildə həyata keçiriləcək. Məqsədimiz abidənin tarixi autentikliyini qorumaqla onun uzunmüddətli dayanıqlığını təmin etməkdir”.

9 mart tarixində keçirilən buraxılış imtahanlarının nəticələri aprelin 25-dən sonra açıqlanacaq.

Bunu jurnalistlərə açqılamasında Dövlət İmtahan Mərkəzinin İdarə Heyətinin sədri Məleykə Abbaszadə deyib.

İvanovodan olan rusiyalı fotoqraf Svetlana Perşina iyirmi illik axtarışdan sonra, ölü hesab etdiyi atasını tapıb.

Qızın atasının sağ olduğu, Azərbaycanda cərrah işlədiyi məlum olub.

Qadın əri və azyaşlı uşaqları ilə Bakıya səyahət edərkən təsadüfən atasını tapıb.

“O, həm insan, həm də cərrah kimi güclü, ədalətli və dözümlüdür. Xüsusən də Qarabağ haqqında hekayələri məni heyrətləndirir.

Onu çaşdırmaq çətindir. Qızının olması xəbərindən başqa”, – deyə o qeyd edib.
//unikal.az

Azərbaycan Dövlət Rəssamlıq Akademiyasında 2 aydır tələbələrin təqaüdü ödənilmir.

Median.Az Xəzər Tv-yə istinadən xəbər verir ki, tələbələr sosial şəbəkələrdə etdikləri paylaşımlarda belə ediblər.

Tələbələr bildirir ki, bununla bağlı rəhbərliyə müraciət etsələr də, məsələyə aydınlıq gətirən olmayıb.

Rəssamlıq Akademiyasından bildirilib ki, məsələ rəhbərlik tərəfindən ciddi nəzarətə götürülüb. Hazırda müvafiq sənədləşmə işlərinin qısa müddət ərzində tamamlanması və gecikmiş təqaüdlərin tam şəkildə ödənilməsi istiqamətində işlər intensiv şəkildə davam etdirilir. Gecikmənin səbəbləri aradan qaldırılaraq, ödənişlərin yaxın zamanda tam şəkildə həyata keçirilməsi nəzərdə tutulur”, – deyə təhsil müəssisəsindən bildirildi.

Bakı şəhərinin Suraxanı rayonunda yerləşən 101 nömrəli Əmi Məmmədov adına orta məktəbdə valideyn narazılığı yaranıb.

Bu barədə Oxu.Az-a şikayət daxil olub.

Valideynin sözlərinə görə, övladı məktəbə başladığı zaman birinci sinfə daimi müəllim təyin olunmayıb. Dərslər başlayan gün, yəni sentyabrın 15-də valideynlər sinfə müqavilə əsasında çalışan müəllimin təyin olunduğunu öyrəniblər.

Şikayətçi qeyd edir ki, valideynlər həmin müəllimdən razı qalıblar və onun daimi əsaslarla məktəbdə saxlanılması üçün direktorun adına ərizə ilə müraciət ediblər. Lakin məktəb rəhbərliyi bu məsələnin onların səlahiyyətində olmadığını, müəllimin imtahan nəticələrinin aşağı olduğunu və daha yüksək bal toplayan müəllimlərin olduğunu əsas gətirib.

Valideyn iddia edir ki, məktəbdə eyni statusla – müqavilə əsasında çalışan başqa müəllimlərin daimi işə qəbul edilməsi halları mövcuddur.

“Bizim uşaqların müəllimini saxlaya bilmirlər, amma digərini saxlayırlar. Bu, suallar yaradır. Uşaqların təhsili və psixologiyası ilə oynayırlar”, – deyə şikayətdə bildirilir.

Oxu.Az-ın sorğusuna cavab olaraq Bakı Şəhəri üzrə Təhsil İdarəsindən bildirilib ki, ümumi təhsil müəssisələrinə müddətsiz müqavilə ilə ixtisaslı müəllim kadrlarının işə qəbulu mərkəzləşdirilmiş müsabiqə yolu ilə həyata keçirilir.

“Müsabiqə başa çatdıqdan sonra tutulmayan və ya yeni yaranan vakant yerlərə müvafiq keçid balını toplayan namizədlərin müddətli müqavilə ilə işə qəbulu proqram təminatı tətbiq edilməklə mərkəzləşdirilmiş qaydada müsabiqə yolu ilə həyata keçirilir.

Bakı Şəhəri üzrə Təhsil İdarəsi tərəfindən 2025-26-cı tədris ili üçün müəllimlərin işə qəbulu müsabiqəsinin əsas mərhələsi yekunlaşdıqdan sonra tutulmayan və yeni yaranan vakant yerlərə müvafiq rayon (şəhər) üzrə qeydiyyatda olan namizədlərin bal ardıcıllığına əsasən əlavə yerləşdirilməsi prosesi aparılıb. Qeyd olunanlara əsasən, müvafiq vakansiyanın olduğu, müəllimin işə qəbulu üzrə müsabiqə nəticəsi nəzərə alınaraq, Bakı Şəhəri üzrə Təhsil İdarəsinin müvafiq məktubu ilə qeyd olunan müəllimin müddətli əmək müqaviləsi əsasında 2025-26-cı dərs ilinin sonunadək 101 nömrəli tam orta ümumtəhsil məktəbinə ibtidai sinif müəllimi vəzifəsinə təyin olunmasına razılıq verilib.

Həmin müəllim elan olunacaq növbəti müsabiqədə iştirak edərək, müvafiq keçid balını toplayacağı təqdirdə müddətsiz əmək müqaviləsi ilə işlə təmin olunma hüququ qazana bilər”, deyə məlumatda vurğulanıb.

Bu gün “Nikosayağı” kimi tanınan bloqer Nicat Şakirlinin ailəsində xoş gündür.

Bloqerin qardaşı Nihat Mütəllimovun toyudur.

Oğuz rayonunun Xaçmazqışlaq kəndi ərazisində 30 ədəd qızılağac ağacının kəsilməsi və təbiətə 6400 manata yaxın maddi ziyan vurulması ilə bağlı istintaq araşdırmaları aparılır.

DİN-in Mətbuat Xidmətindən verilən məlumata görə, polis əməkdaşları tərəfindən həyata keçirilən tədbirlərlə ağacları kəsməkdə şübhəli bilinən 34 yaşlı Cəsur Məmmədli saxlanılıb.

Faktla bağlı Oğuz Rayon Polis Şöbəsində Cinayət Məcəlləsinin müvafiq maddəsi ilə cinayət işi başlanılıb, araşdırmalar davam etdirilir.

Bakı Beynəlxalq Avtovağzal Kompleksinin yaxınlığında, Rəşid İsmayılov və Şirvan küçələrinin kəsişməsində təhlükəsizliyi artırmaq və nizamlılığı təmin etmək məqsədilə 1.25 – “sarı tor” nişanlanma xətləri təşkil edilib.

Bu barədə Azərbaycan Yerüstü Nəqliyyat Agentliyi (AYNA) məlumat yayıb.

Bildirilib ki, “Yol hərəkəti haqqında” Qanunun 75-ci maddəsinin 2-ci hissəsinin tələbinə əsasən, əgər yolayrıcında, o cümlədən yolun hərəkət hissələrinin kəsişmə yerində, yaxud yolayrıcından və ya kəsişmə yerindən bilavasitə sonra tıxac yaranıbsa və bu, sürücünü dayanmağa məcbur edərək digər istiqamətlərdən nəqliyyat vasitələrinin hərəkəti üçün maneə yaradacaqsa, belə yolayrıcına və ya “sarı tor”la işarələnmiş kəsişmə yerinə daxil olmaq qadağandır. “Sarı tor” yolun hərəkət hissələrinin kəsişmə yerini göstərir.

Beləliklə, qeyd edilən xətlər yol kəsişməsində nəqliyyatın tıxanmasının qarşısını alır və oranı hər zaman nəqliyyat üçün təmiz saxlayır.

Qeyd edək ki, son dövrlər Bakıda bir çox ərazilərdə bu cür nişanlanma xətləri tətbiq edilib.

Naxçıvanda Ombudsman haqqında qanun ləğv edilib.

Bununla bağlı məsələ Ali Məclisin bugünkü plenar iclasında müzakirəyə çıxarılıb.

Ali Məclis sədrinin birinci müavini Bəxtiyar Məmmədov “Naxçıvan Muxtar Respublikasının İnsan Hüquqları üzrə Müvəkkili (Ombudsman) haqqında” Naxçıvan Muxtar Respublikası Qanununun ləğv edilməsi barədə” Qanunun müzakirəsi zamanı qeyd edib ki, “Naxçıvan Muxtar Respublikası Konstitusiyasında dəyişikliklərin təsdiq edilməsi haqqında” Azərbaycanın Konstitusiya Qanunu ilə Naxçıvan Konstitusiyasının müvafiq maddələrindən Naxçıvanın İnsan hüquqları üzrə müvəkkili ilə bağlı müddəalar çıxarılıb.

Bu səbəbdən “Naxçıvan Muxtar Respublikasının İnsan Hüquqları üzrə Müvəkkili (Ombudsman) haqqında” Naxçıvan Muxtar Respublikası Qanununun ləğv edilməsi zərurəti yaranıb.

Hüquq siyasəti komitəsinin sədri Əjdər Əliyev qanun layihəsi barədə məlumat verdikdən sonra qanun səsə qoyularaq qəbul edilib.
//oxu.az

Aprelin 11-i axşam və 12-də Azərbaycanın əsasən dağlıq və dağətəyi rayonlarında, 13-dən 14-ü gündüzədək isə digər yerlərdə də hava şəraitinin fasilələrlə yağıntılı olacağı gözlənilir.

Bu barədə Milli Hidrometeorologiya Xidməti məlumat yayıb.

Bildirilib ki, ölkədə ayrı-ayrı ərazilərdə yağıntının intensivləşəcəyi, şimşək çaxacağı, dolu düşəcəyi, bəzi dağlıq ərazilərdə qar yağacağı ehtimal olunur.

Çaylarda sululuğun artacağı, bəzi dağ çaylarından qısamüddətli sel keçəcəyi ehtimalı var.