Category: İqtisadiyyat

Bu gün Kənd Təsərrüfatı Nazirliyi və Qida Təhlükəsizliyi Agentliyi birlikdə 24-cü Azərbaycan Beynəlxalq Qida Sənayesi “WorldFood Azerbaijan 2018” sərgisi və 12-ci Azərbaycan Beynəlxalq Kənd Təsərrüfatı “Caspian Agro-2018” sərgisinin açılışını həyata keçirdi.

Bunu Qida Təhlükəsizliyi Agentliyinin rəhbəri Qoşqar Təhməzli bildirib.

O qeyd edib ki, sərgidə iştirak edən şirkətlərin 70 faizinin xarici şirkətlər olması sevindirici haldır:

“İştirakçıların sayı hər il artır. Bunun da səbəbi münbit rəqabət mühitidir. Budəfəki sərginin əhatəsi ötənilkindən 12 faiz artıb”.

Ölkədə qida istehsal edən subyektlərin sayının getdikcə artdığını vurğulayan Q.Təhməzli qeyd edib ki, sərgilər kənd təsərrüfatı və qida təhlükəsizliyi sahəsində şirkətlərin fəaliyyətinin inkişafına səbəb olacaq.

Agentlik sədri Türkiyənin Qida, Əkinçilik və Heyvandarlıq Nazirliyi tərəfindən təhlükəli elan edilən məhsulların Azərbaycan bazarına gətirilib-gətirilməməsi yönündə suala cavabında dedi:

“Bu məhsulların satışı yoxdur. Biz müvafiq qurumlarla əlaqə saxladıq, məlum oldu ki, həmin məhsulların Azərbaycana idxalı aparılmayıb. Ticarət şəbəkələrində də monitorinq apardıq, həmin məhsullara rast gəlmədik”.

Azərbaycanda İpoteka krediti ilə ev almaq istəyənlərin işi asanlaşıb.

Azərbaycan İpoteka Fondu” Açıq Səhmdar Cəmiyyətinin vəsaiti hesabına verilən ipoteka krediti, o cümlədən güzəştli ipoteka krediti üzrə borcalanın aylıq məcmu gəlirinin hesablanması Qaydası”na dəyişikliklər edilib.

Bu barədə qərarı Baş nazir Novruz Məmmədov imzalayıb.

Dəyişikliyə əsasən, Nazirlər Kabinetinin 2016-cı il 16 noyabr tarixli 464 nömrəli qərarında “Azərbaycan İpoteka Fondu” Açıq Səhmdar Cəmiyyətinin” sözləri “Azərbaycan Respublikası İpoteka və Kredit Zəmanət Fondunun” sözləri ilə əvəz edilir.

Azərbaycanın sərhəd keçid məntəqələrində nəqliyyat vasitələrinin çox qalması məsələsinə aydınlıq gətirilib.

Dövlət Gömrük Komitəsinin (DGK) Fəaliyyətinin Qiymətləndirilməsi və İnkişaf Proqramları Baş İdarəsinin rəisi İqbal Babayev Azərbaycanın Gürcüstandan fərqli olaraq, sərhəd-keçid məntəqələrində təhlükəsizliyə daha çox önəm verdiyini deyib.

O qeyd edib ki, Gürcüstan sərhəd-keçid məntəqələrində fiskal siyasət həyata keçirir:

“Bəzən deyirlər ki, niyə Gürcüstan sərhəddindən bir dəqiqəyə keçmək olur, amma bizdə yubanmalar olur?! Səbəb budur – biz təhlükəsizliyə üstünlük veririk və bu da müəyyən vaxt alır”.

İ.Babayev qeyd edib ki, DGK qeydiyyat jurnalında hansısa avtomobil barədə məlumatı ləğv etmək üçün dörd nazirlikdən icazə alır və bu proses 3-4 ay çəkir:

“Biz bir gecədə 27 jurnal, 18 sənəd ləğv etmişik. Əgər əvvəl sərhəd-keçid məntəqəsindən 283 min maşın keçirdisə, bu gün bu rəqəm 1356 minə qalxıb.

Əgər avtomobil 60 dəqiqədən çox sərhəd keçid məntəqəsində qalırsa, avtomatik olaraq buna reaksiya verilir və izahat tələb olunur”.

Əmlak Məsələləri Dövlət Komitəsi ölkədə fəaliyyət göstərən daş və qum çınqıl karxanalarının monitorinqini aparıb.

Komitədən verilən məlumata görə, araşdırma zamanı ölkədə 585 daş və qum-çınqıl karxanalarının fəaliyyət göstərdiyi müəyyənləşib.

Onların elektron məlumat bazası yaradılıb. Eyni zamanda, bəlli olub ki, 250 karxana torpaq qanunvericiliyinin tələblərini pozaraq fəaliyyət göstərir. Nəticədə qanunsuz fəaliyyət göstərən bu karxanaların fəaliyyəti dayandırılıb.

Qeyd edək ki, hazırda 238 daş və qum-çınqıl karxanaları fəaliyyət göstərir ki, ondan 23-ü qanuni sənədləşmə aparılmaqla işləyir.

Monitorinqlər nəticəsində 127 karxanada baş verən qanun pozuntusu hallarına görə inzibati protokollar yazılıb, 46 karxananın fəaliyyətində torpaq sahəsinin özbaşına zəbt olunması halları olduğundan tərtib olunmuş sənədlər tədbir görülməsi üçün hüquq-mühafizə orqanlarına göndərilib.

Komitədən bildirilir ki, 42 karxanada araşdırmalar davam etdirilir. Ən çox belə hallar paytaxtın Xəzər, Qaradağ, eləcə də, Abşeron, İmişli, Quba, Şəki, Qazax rayonlarında müşahidə edilib.

Bu il iyunun 12-da Trans-Anadolu Təbii Qaz Kəməri (TANAP) istismara veriləcək.

Median.Az Türkiyə KİV-inə istinadən xəbər verir ki, bu barədə Türkiyənin enerji və təbii ehtiyatlar naziri Berat Albayrak bildirib.

Onun sözlərinə görə, açılış mərasimində Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğan iştirak edəcək.

Qeyd edək ki, açılış mərasimi iyunun 19-na planlaşdırılmışdı.

Dövlət Statistika Komitəsinin məlumatına görə ötən ay Azərbaycanda ərzaq məhsullarının qiymətləri 3,7% bahalaşıb.

Belə ki, aparılan statistikaya görə, ay ərzində, kərə yağı, yuyucu tozlar və xüsusən də çayın qiyməti əvvəlki aylarla müqayisədə yüksəlib.

Vəziyyətlə daha yaxından tanış olmaq üçün paytaxtda fəaliyyət göstərən marketlərə baş çəkdik.

Yenicag.az-a danışan alıcı Lalə Əliyeva qiymətlərin süni şəkildə qaldırıldığını deyib:

“Mən anlaya bilmirəm, bu ərzağı günü-gündən niyə qaldırırlar. Əvvəl qəpik-qəpik qaldırırdılar, hiss olunmurdu. İndi aldığım ərzaqda iki-üç manat fərq var. Bir ay əvvəl bir kiloqramlıq çayı növünə uyğun 14 manata alırdımsa, indi 16 manat 10 qəpiyə alıram. Bütün növ çayların qiyməti kəskin şəkildə artıb. Satıcıdan səbəbini soruşursan, ağız-burun əyir, deyir ki, “olan budur alırsan al, almırsan get başqa mağazaya”.

Yuyucu tozların da qiyməti artıb. Bir ay əvvəl 5 manat 40 qəpiyə aldığım 1,5 kiloluq yuyucu tozunu dünən 6 manat 50 qəpiyə aldım. Yağ da həmçinin. Bütün marketlərdə eyni qiymətdir. Bu süni qiymət artımından başqa bir şey deyil”.

Satıcı Azər Abdullayev bizimlə söhbətində bəzi ərzaq məsullarını qiymətlərində artım olduğunu təsdiqlədi:

“Son ayda çay və bəzi növ yuyucu tozlarının qiymətində artım müşahidə olunur. Vallah, bunun səbəbini heç özümüz də bilmirik. Alıcılar da bundan şikayətlənirlər. Acıqlarını bizim üstümüzə tökürlər. Son vaxtlar dolların nisbətən bahalaşmasından sonra, bu qiymət artımı başladı. Amma ərzaqların çoxu yerli məhsullardır. Xaricdən istehlak olunan yağların, yuyucu tozlarının qiymətinin bahalaşmasını hardasa başa düşmək olar. Amma yerli məhsulların qiymət artımı bizə də qaranlıqdır”.

Artım müşahidə olunan ərzaqlardan bəzilərinin (növünə görə qiymətlər dəyişir) qiymətlərini təqdim edirik:

Çay- (bir kiloluq) 19 manat 40 qəpik

Kərə yağı- 17 manat 90 qəpik

Yuyucu tozu- 6 manat 40 qəpik.

Bəzi insanlar, sahibkarlar, iş adamları hələ də icarəyə götürdüyü torpaqlardan təyinatı üzrə istifadə etmirlər. Hektarlarla torpaqları çəpərləyib başqa məqsədlər üçün istifadə etməyi nəzərdə tuturlar.

Bunu Milli Məclisin Aqrar siyasət komitəsinin sədr müavini Eldar Quliyev deyib.

O bildirib ki, “Torpaq icarəsi haqqında”, o cümlədən Torpaq Məcəlləsinə təklif olunan dəyişikliklər bu baxımdan çox önəmlidir:

“Ümumiyyətlə, kənd təsərrüfatı deyəndə ilk növbədə, torpaqlar göz önünə gəlir. Ancaq təəssüf ki, bir çoxları hələ də qanunlara əməl etmirlər. Hektarlarla torpaqları icarəyə götürüb, çəpərləyib, təyinatı üzrə istifadə etmirlər.

Sadəcə, ilin sonunda cüzi miqdarda ödəmə ilə işlərini bitmiş sayırlar. Odur ki, belələrinə qarşı qanunun dili ilə ciddi danışmaq lazımdır. Onlardan icarə müqaviləsinə əsasən, daha böyük məbləğdə ödəmə tələb olunsun və rəsmiləşdirilsin”.

Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinə yeni rəis təyin edilib.

Bu barədə oxu.az-a Nazirliyin mətbuat xidmətinin rəhbəri Anar Hüseynov məlumat verib.

O bildirib ki, bu vəzifəyə Mirzə Əliyev təyin olunub.

M.Əliyev bundan əvvəl “Azərbaycan Dəmir Yolları” QSC-də, “Kapital Bank” ASC-də, BTM-nin Cenevrədəki (İsveçrə) ofisində çalışıb.

Xatırladaq ki, indiyə qədər Dövlət Xidmətinə rəhbərlik etmiş Rüfət Rüstəmzadə bu ilin fevral ayında Qida Təhlükəzliyi Agentliyinin sədr müavini təyin edilib. Bu təyinatdan sonra onun səlahiyyətlərini müvəqqəti olaraq müavini Zaur Əliyev icra edib.

Heydər Əliyev adına Neft Emalı Zavodunda modernizasiya işləri çərçivəsində ilkin emal, katalitik krekinq kimi mövcud qurğular əsaslı təmir edilərək, yenidən qurulacaq, bir sıra yeni qurğular inşa olunacaq, zavodun istehsal gücü artırılacaq.

Bunu bunu Azərbaycan Respublikası Dövlət Neft Şirkətinin (SOCAR) prezidenti Rövnəq Abdullayev “Azərbaycan” qəzetində dərc olunan “Ulu öndər Heydər Əliyevin yeni neft strategiyası Azərbaycanın davamlı inkişafının təməlini qoymuşdur” başlıqlı məqaləsində yazıb.

“Modernləşdirmə prosesi istehsal olunan dizel yanacağının və avtomobil benzinlərinin Avro-5 standartı səviyyəsinə çatdırılması, yeni bitum istehsalatının yaradılması, reaktiv mühərrik yanacağı həcminin kəmiyyət və keyfiyyətcə yüksəldilməsi, istismar xərclərinin azaldılması və s. vəzifələrlə yanaşı, “Azərikimya”nın qaz xammalı – propan-propilen, butan-butilen fraksiyaları kimi quru qazlarla daha etibarlı təminatını nəzərdə tutur. Artıq NEZ-in modernizasiyası üzrə ilkin detallı layihələndirmə işləri başa çatdırılıb və keçirilən tenderin nəticələrinə uyğun olaraq, növbəti mərhələnin – Layihələndirmə, Satınalma və Tikinti mərhələsi çərçivəsində yeni qurğuların tikintisi ilə bağlı bu ilin fevralında Maire Tecnimont şirkəti ilə müqavilə imzalanıb.

Müqaviləyə əsasən, 10-dan çox istehsal qurğusunun tikintisi nəzərdə tutulur. Mövcud qurğuların və ümumzavod təsərrüfatı obyektlərinin yenidən qurulması isə ötən ilin dekabr ayında keçirdiyimiz digər tenderin qalibi olan Tecnicas Reunidas şirkətinə həvalə olunub. Layihənin 2021-ci ildə başa çatdırılması nəzərdə tutulur.

İlk mərhələdə 2018-ci ildə yeni bitum qurğusu və müvafiq ümumzavod təsərrüfatı qurğuları, eləcə də yeni maye qazdoldurma məntəqəsi tikilib istismara veriləcək.

Sonrakı mərhələ üzrə 2020-ci ilin sonunadək “Avro-5” keyfiyyət standartına cavab verən dizel yanacağının alınması üçün yeni qurğuların inşası və müvafiq yenidənqurma işləri başa çatdırılacaqdır.

III mərhələdə isə 2021-ci ilin əvvəlinədək “Avro-5” keyfiyyət standartına cavab verən A-92/95/98 benzin məhsullarının istehsalı üçün müvafiq yeni qurğuların inşası həyata keçiriləcəkdir. Modernizasiya nəticəsində zavodda istehsal həcmini ildə 7,5-8 milyon tona çatdırmaq mümkün olacaqdır. Beləliklə, aparılan rekonstruksiya ölkəmizin ixrac potensialını və NEZ-in gəlirliliyini artıracaq, həmçinin “Azərikimya” İB-nin sabit xammal təchizatını təmin edəcəkdir. Layihə nəticəsində NEZ-in əməliyyat xərclərinin optimallaşdırılması, habelə Bakı və Sumqayıt şəhərində ekoloji vəziyyətin daha da yaxşılaşdırılması gözlənilir”.

Məhsullarını təxminən 40 ölkəyə ixrac edən “Petkim” 2008-ci ildə SOCAR-ın idarəçiliyinə keçdikdən sonra xalis mənfəətini 9,2 dəfə artırıb.

Bunu Dövlət Neft Şirkətinin (SOCAR) prezidenti Rövnəq Abdullayev “Azərbaycan” qəzetində dərc olunan məqaləsində bildirib:

“Holdinqin səhmlərinin dəyəri 8,7 dəfə yüksəlib. “Petkim”i xammal ilə təmin edəcək STAR neft emalı zavodunun tikintisi 99% tamamlanıb. Cari ilin sentyabrında zavodda ilk məhsulun satışı, dekabrda isə şərti qəbulu həyata keçiriləcək.

Zavodun istehsal gücü 10 milyon ton həcmində nəzərdə tutulur. Zavodda istehsal olunacaq məhsulların bir qismi, o cümlədən nafta “Petkim” kompleksində xammal kimi istifadə ediləcək ki, bu da ümumi xərclərin aşağı salınmasında böyük rol oynayacaq”.

R.Abdullayev qeyd edib ki, zavodda istehsal ediləcək məhsulların əsas hissəsi Türkiyənin daxili bazarı, qalan hissəsi isə ixrac üçün nəzərdə tutulur:

“Azərbaycan dünya bazarında təkcə xam neft və qaz ixracatçısı kimi deyil, həm də neft və neft-kimya məhsullarının istehsalçısı kimi tanınır. SOCAR emal və kimya məhsullarını hazırda ABŞ, İtaliya, Misir, Çin də daxil olmaqla onlarca ölkəyə ixrac edir. Xam neftin qiyməti aşağı düşdüyü halda, neft-qaz və neft-kimya məhsullarının gəlirliliyi yüksəlib”.

Məlum olub ki, cari ildə STAR üzrə aparılacaq işlərin əsas hədəfi istehsalat proseslərinin rəqəmsallaşdırılması olacaq.