Median.Az xəbər verir ki, Sabunçu RPİ 12-ci polis şöbəsinin əməkdaşları keçirdikləri əməliyyat-axtarış tədbirləri nəticəsində rayon ərazisindəki evlərin birindən 3400 manat, 5000 dollar, 90000 Pakistan rupisi və 10000 manat dəyərində qızıl əşyalar oğurlayan Bakı şəhər sakini, əvvəllər məhkum olunmuş Qurban Məhərrəmovu saxlayıblar.
Bundan başqa, Nəsimi RPİ 19-cu polis şöbəsi əməkdaşlarının əməliyyat tədbirləri nəticəsində, avqustun 17-də rayon ərazisindəki evlərin birindən televizor oğurlayan Bakı şəhər sakini, əvvəllər məhkum olunmuş Anar Rəşidzadə saxlanılıb, avqustun 18-də Lökbatan qəsəbəsi ərazisində Bərdə rayon sakini A.Abduləzimova məxsus “Mercedes” markalı avtomobildən mobil telefon oğurlayan yeniyetmə Rayon Mühafizə İdarəsinin əməkdaşları tərəfindən saxlanılaraq Qaradağ RPİ 10-cu polis bölməsinə təhvil verilib, Hacıqabul RPŞ-nin əməkdaşları əməliyyat tədbirləri nəticəsində, avqustun 19-na keçən gecə şəhərin A.Abdullayev küçəsində 20 ədəd kanalizasiya quyusunun qapağını oğurlayan şəhər sakinləri, əvvəllər məhkum olunmuş Fəxrəddin Məmmədov və Rahil İslamovu saxlayıblar, Qusar RPŞ əməkdaşlarının keçirdikləri əməliyyat-axtarış tədbirləri nəticəsində, avqustun 11-də Yeni Həyat kəndindəki evlərin birindən 2250 manat pul oğurlayan kənd sakinləri Alim Balabəyov və Marat Əlirzayev saxlanılıblar.
Faktlarla bağlı CM-nin 177-ci (oğurluq) maddəsi ilə cinayət işləri başlanılıb.
