Category: Avto

Rusiyalı ekspert Roman Timaşov avtomobil akkumulyatorunun sıradan çıxmasının əsas səbəblərini açıqlayıb.

Bu barədə mütəxəssis “Motor” jurnalına müsahibəsində danışıb.

Onun sözlərinə görə, akkumulyatorun (AKB) sıradan çıxmasının əsas səbəbləri arasında uzunmüddətli saxlama zamanı enerjinin kritik həddə qədər itirilməsi və vibrasiya nəticəsində daxili lövhələrin tökülməsi yer alır.

“Uzunmüddətli saxlama zamanı batareyanın tam boşalması lövhələri dağıdır və nəticədə o, enerji saxlama qabiliyyətini itirir. Həmçinin akkumulyator yerinə yaxşı bərkidilmədikdə, sarsıntılar və vibrasiya səbəbindən lövhələr tökülür”, – deyə Timaşov bildirib.

Ekspert qeyd edib ki, korpusun sürtülməsi və ya çatlaması kimi zədələr də təhlükəlidir. Sızan elektrolit avtomobilin kuzovunun boyasına və elektrik naqillərinə ciddi zərər verə bilər.

“Aşağı temperaturlar akkumulyator üçün xüsusilə risklidir. Şaxtalı havada enerjisi az olan batareyanın içindəki elektrolit dona bilər. Donan maye genişlənərək daxili lövhələri və korpusu parçalayır. Belə akkumulyatoru bərpa etmək mümkün deyil, o, yalnız utilizasiya edilməlidir”, – deyə mütəxəssis vurğulayıb.

Bundan əlavə, generatorun nasazlığı da akkumulyatoru sıradan çıxarır. Batareyanın həm az, həm də həddindən artıq doldurulması elektrolitin qaynayıb buxarlanmasına və lövhələrin dağılmasına səbəb olur. Elektrik şəbəkəsindəki cərəyan itkisi (köhnə naqillər və ya keyfiyyətsiz quraşdırılmış avadanlıqlar ucbatından) və cihazın özündəki daxili qısaqapanmalar da digər mühüm amillərdir.

“Akkumulyatorun zəmanət müddəti növündən asılı olaraq 1-3 ildir. Lakin düzgün qulluq və elektrik sisteminin saz vəziyyətdə olması şərtilə, batareyalar 5-8 il problemsiz işləyə bilər”, – deyə Timaşov fikrini tamamlayıb.

Son vaxtlar avtomobil sahibləri əyləc balatalarının (əyləc qəliblərinin) sürətlə yeyilməsindən daha çox şikayət edirlər. Belə ki, əvvəllər bir dəst əyləc balatası 40 000-50 000 kilometr məsafə üçün kifayət edirdisə, hazırda bu göstərici 30 000 kilometrə qədər enib.

Məsələ ilə bağlı “Rossiyskaya qazeta”ya açıqlama verən avtomobil eksperti Nikita Rodionov problemin kökünü izah edib.

Mütəxəssisin sözlərinə görə, əyləc balatalarının tez yeyilməsinin başlıca səbəbi çox vaxt detalın keyfiyyəti deyil, məhz avtomobilin istismar şərtləridir: “Bu problem tıxaclı şəhər yollarında hərəkət, ani sürətlənmə və sərt tormozlama, eləcə də fasiləli hərəkət rejimi kimi faktorların birləşməsindən qaynaqlanır”.

Ekspert qeyd edib ki, davamlı olaraq sərt tormoz vermək balataların həddən artıq isinməsinə, onların səthində mikroçatların və yanıq izlərinin yaranmasına gətirib çıxarır. Bu da materialın normaldan daha tez sıradan çıxması ilə nəticələnir. Xüsusilə dağlıq ərazilərdə və mühərriklə tormozlama tətbiq etmədən uzun enişlərdə hərəkət edərkən əyləc sisteminə düşən yük kəskin şəkildə artır, nəticədə həm disklərin, həm də balataların istismar müddəti təxminən iki dəfə azalır.

Bundan əlavə, düzgün ehtiyat hissəsinin seçimi də böyük əhəmiyyət kəsb edir. Müasir avtomobil bazarı keyfiyyətsiz, sertifikatı olmayan detallar və tanınmış markaların saxta nüsxələri ilə zəngindir. Ekspert onu da əlavə edib ki, bir çox sürücünün önəmsəmədiyi kaliperlərin və istiqamətləndirici elementlərin texniki sazlığı da əyləc sisteminin ömrünə ciddi təsir göstərən əsas amillərdəndir.
//oxu.az

Bir neçə qlobal avtomobil istehsalçısı öz büdcəli modellərinin ABŞ bazarında satışından imtina etməyi planlaşdırır.

Bu barədə “The Wall Street Journal” (WSJ) məlumat yayıb.

Nəşrin məlumatına əsasən, bəzi iri avtomobil şirkətləri ABŞ Administrasiyasına xəbərdarlıq ediblər ki, əgər rəsmi Vaşinqton Kanada, Meksika və Birləşmiş Ştatlar arasındakı üçtərəfli ticarət sazişini (USMCA) uzatmamaq qərarına gələrsə və ya üç ölkə arasında digər güzəştli ticarət şərtlərini razılaşdırmazsa, onlar ABŞ-də ən ucuz modellərinin satışını dayandıracaqlar.

WSJ qeyd edir ki, Yaponiyanın “Nissan”, “Toyota” və Cənubi Koreyanın “Hyundai” kimi şirkətləri ABŞ alıcılarına kiçik və münasib qiymətli avtomobillər təklif etdiyi halda, yerli avtonəhənglər son illərdə bu cür modellərdən imtina ediblər: “Xarici avtokonsernlər bəzi büdcəli maşınları ABŞ-də istehsal etsələr də, onların ehtiyat hissələri Meksika və Kanadadan tədarükündən asılıdırlar.

Əvvəllər bu detallar USMCA çərçivəsində rüsumlardan azad idi, lakin ABŞ Prezidenti Donald Trampın Administrasiyası tərəfindən tarif siyasətinin dəyişdirilməsindən sonra avtomobil hissələrinə rüsumlar 25% səviyyəsində müəyyən edilib. Xərclərin bu cür artması avtomobil istehsalçılarını ABŞ bazarında ucuz modellərin satışından imtina etməyi düşünməyə məcbur edir”.

Nəşrin bildirdiyinə görə, ABŞ-də ən əlçatan 10 avtomobil modelindən 8-i xarici şirkətlər tərəfindən buraxılır:

“Bu siyahıda qalan iki model isə ABŞ-nin “General Motors” şirkəti tərəfindən Cənubi Koreyada istehsal olunur. Qeyd edək ki, USMCA müqaviləsi 2018-ci ildə Vaşinqtonun təşəbbüsü ilə imzalanıb. Belə ki, ABŞ rəhbərliyi oxşar NAFTA (Şimali Amerika Azad Ticarət Assosiasiyası) ticarət sazişinin ölkənin maraqlarına cavab vermədiyini hesab edib. Yeni sənəd 2020-ci ildə qüvvəyə minib. Qaydalara əsasən, hər altı ildən bir müqavilənin planlı şəkildə nəzərdən keçirilməsi nəzərdə tutulur və bu proses 2026-cı il iyulun 1-dək yekunlaşmalıdır. Əgər razılaşma uzadılarsa, daha 16 il qüvvədə qalacaq. Razılıq əldə olunmasa, sənəd 2036-cı ildə müddəti başa çatana qədər hər il yenidən baxılmağa məruz qalacaq. Saziş ümumi dəyəri təxminən 2 trilyon dollar olan mal və xidmətləri əhatə edir. Xatırladaq ki, daha əvvəl Ağ Evdən bildirilib ki, indiki mərhələdə Kanada, Meksika və ABŞ arasında ticarət sazişinin mövcudluğu ABŞ tərəfi üçün əhəmiyyət kəsb etmir və heç bir real üstünlük qazandırmır. Vaşinqton vurğulayıb ki, Birləşmiş Ştatların Meksika və ya Kanada məhsullarına ehtiyacı yoxdur”.

2026-cı ilin mart ayında Çin avtomobil istehsalçıları Avropada rekord satış göstəricisinə çataraq 149 094 avtomobil satıblar.

Bu barədə “Automotive News” məlumat yayıb.

Qeyd olunan rəqəm ötən ilin eyni dövrü ilə müqayisədə 97% artım deməkdir. Çin brendlərinin Avropa bazarındakı payı isə 9,4%-ə yüksəlib.

Əvvəlki rekord 111 334 avtomobil səviyyəsində 2025-ci ilin dekabrında qeydə alınmışdı. Bu, Çin avtomobillərinin Avropada 100 min satış həddini keçdiyi nadir aylardan biridir.

Mart ayında artımı əsasən plug-in hibridlərə olan yüksək tələb təmin edib. Bu seqmentdə satışlar dörd dəfə artıb və Avropada satılan hər üç Çin avtomobilindən biri (32%) hibriddir.

Avropada ən populyar Çin avtomobil markaları:

* MG – 39 717 ədəd (+2,6%)
* BYD – 37 732 ədəd (+152%)
* Chery – 36 551 ədəd (+369%)

Eyni zamanda Avropa Avtomobil İstehsalçıları Assosiasiyasının (ACEA) məlumatına görə, 2026-cı ilin martında Avropa İttifaqında yeni minik avtomobillərinin satışları illik müqayisədə 12,5% artaraq 1 158 317 ədədə çatıb.

Avropada mühərrik növlərinə görə ən çox satılan yeni avtomobillər:

* Hibridlər (HEV) – 444 835 ədəd (+20%)
* Benzinli avtomobillər – 262 617 ədəd (-9%)
* Elektrik avtomobilləri (BEV) – 234 532 ədəd (+49%)
* Plug-in hibridlər – 105 414 ədəd (+28%)
* Dizel avtomobillər – 83 739 ədəd (-12%)
* Digər növlər – 27 180 ədəd (-20%)

Ümumilikdə 2026-cı ilin ilk rübündə Avropa İttifaqında 2 822 616 yeni avtomobil qeydiyyata alınıb ki, bu da ötən illə müqayisədə 4% artım deməkdir.
//qaynar.az

Azərbaycan Mərkəzi Bankı (AMB) avtonəqliyyat vasitəsi sahiblərinin mülki məsuliyyətinin icbari sığortası üzrə sığorta haqqının hesablanması qaydalarında dəyişikliklər edib.

Müvafiq qərar AMB İdarə Heyəti tərəfindən 1 aprel 2026-cı il tarixində qəbul olunub.

Qərara əsasən, əvvəl tətbiq olunan Bonus-Malus (BM) sistemi əvəzlənərək “sığorta tarixçəsi əmsalı” mexanizmi tətbiq edilir. Yeni yanaşmaya görə, sığorta haqqının hesablanması artıq sığortalının əvvəlki sığorta tarixçəsi və təqsirli hadisələri əsasında müəyyən olunacaq.

Dəyişikliklərə əsasən, sığorta tarixçəsi əmsalı minimum 0.60, maksimum isə 3 səviyyəsində müəyyən edilib. Əmsal hər bir şəxs üzrə ayrıca formalaşacaq və müxtəlif nəqliyyat vasitələri üzrə fərqli tətbiq oluna biləcək.

Yeni qaydalara görə, fiziki şəxslər üçün sığorta müqaviləsi bağlanarkən nəqliyyat vasitəsinin sahibləri arasında ən yüksək sığorta tarixçəsi əmsalına malik olan şəxsin göstəricisi əsas götürüləcək. Bununla yanaşı, son bir ay ərzində nəqliyyat vasitəsinə sahib olmuş şəxslər də hesablamada nəzərə alınacaq.

Qərarda həmçinin göstərilir ki, hüquqi şəxslər üçün (taksi fəaliyyəti istisna olmaqla) sığorta tarixçəsi əmsalı 1 səviyyəsində müəyyən edilir və bu əmsala əlavə və ya güzəşt tətbiq olunmur.

Sənədə əsasən, qəzasız sığorta tarixçəsi olan şəxslər üçün hər dəfə 5% güzəşt tətbiq ediləcək. Əksinə, təqsirli sığorta hadisəsi baş verdikdə hər hadisə üzrə sığorta tarixçəsi əmsalına 30% əlavə ediləcək.

Eyni zamanda, nəqliyyat vasitəsinin sahiblərinin sayından asılı olaraq tətbiq edilən əmsallar da yenilənib. Belə ki, sahiblərin sayı 4 və ya daha az olduqda əmsal 1, 5 və ya daha çox olduqda isə 1.15 müəyyən edilib.

Qərara əsasən, əvvəlki sistem üzrə formalaşmış Bonus-Malus göstəriciləri yeni mexanizmə inteqrasiya olunacaq və keçid dövründə sığorta tarixçəsi əmsalı kimi tətbiq ediləcək.

Qeyd edək ki, dəyişikliklər qərarın dərc edildiyi tarixdən 2 ay sonra qüvvəyə minəcək.
//apa.az

“Ford” şirkəti ABŞ-də transmissiyanın idarəetmə modulunun proqram təminatı ilə bağlı problemlər səbəbindən təxminən 1,4 milyon “F-150” markalı avtomobilini geri çağıracaq.

Median.Az “Reuters”ə istinadən xəbər verir ki, bu barədə ABŞ-nin Milli Yol Hərəkəti Təhlükəsizliyi İdarəsi (NHTSA) məlumat yayıb.

Qeyd olunur ki, proqram təminatındakı xəta hərəkət zamanı gözlənilmədən ikinci ötürməyə keçidə səbəb ola bilər. Bu, avtomobil üzərində nəzarətin itirilməsinə və qəza riskinin artmasına gətirib çıxarır.

Dünyanın aparıcı şin istehsalçılarından olan “Pirelli” şirkəti Yaxın Şərqdə yaranmış gərginlik fonunda riskləri azaltmaq üçün yeni fəaliyyət strategiyasını elan edib.

Bu barədə “İnterfaks” agentliyi xəbər yayıb.

Şirkət maliyyə sabitliyini qorumaq məqsədilə məhsullarının qiymətlərini artırmaq qərarına gəlib. Yeni strategiya çərçivəsində xərclərin ixtisar edilməsi, logistik marşrutların yenidən qurulması və istehsalın fasiləsizliyini təmin etmək üçün əlavə xammal bazasının yaradılması nəzərdə tutulur.

Şirkətin rəsmi açıqlamasında qeyd olunur ki, regiondakı münaqişənin müddəti və miqyası ilə bağlı qeyri-müəyyənlik hökm sürür. Rəhbərliyin fikrincə, prosesin uzanması inflyasiyanın artmasına və istehlakçıların alıcılıq qabiliyyətinə mənfi təsir göstərə bilər. Vurğulanıb ki, İtaliya brendinin ümumi gəlirlərində Yaxın Şərqin payı cəmi 1% təşkil edir.

Şirkətin xalis mənfəəti 5.9% artaraq 530.7 milyon avroya çatıb. Ümumi satış dövriyyəsi isə ötən illə müqayisədə ciddi dəyişməyərək 6.776 milyard avro səviyyəsində qalıb.

Digər maraqlı məqam isə Rusiya bazarında “Land Rover” krossoverlərinə və yolsuzluq maşınlarına tələbatın artmasıdır. 2026-cı ilin birinci rübü ərzində bu ölkədə 684 ədəd yeni “Land Rover” qeydiyyata alınıb ki, bu da ötən ilin eyni dövrü ilə müqayisədə 41% çoxdur.
//oxu.az

Cənubi Koreyanın avtomobil istehsalçısı “Hyundai Motor” təhlükəsizlik kəmərlərində yaşana biləcək qüsura görə ABŞ-də 294 mindən çox maşınını geri çağırır.

Bu barədə ABŞ Nəqliyyat Departamenti nəzdində fəaliyyət göstərən Milli Yol Hərəkəti Təhlükəsizliyi İdarəsi (NHTSA) məlumat yayıb.

Kampaniya “Hyundai Ioniq 6”, “Genesis G90”, eləcə də daxiliyanma mühərrikli və hibrid variantda olan “Hyundai Santa Fe” modellərini əhatə edir.

Məlumata görə, dilerlər yoxlama aparacaq və lazım gəldikdə təhlükəsizlik kəmərlərində bərkitmə avadanlıqlarını dəyişəcəklər.

Hörmüz boğazı ətrafında baş verən hadisələr artıq qlobal sənayeyə ciddi təsir göstərməyə başlayıb. Müharibənin nəticələri yalnız enerji və logistika sahələri ilə məhdudlaşmır, eyni zamanda dünya üzrə istehsal və təchizat zəncirlərinə də birbaşa təsir edir.

ABŞ-da fəaliyyət göstərən “Auto Care Association” bildirir ki, xüsusilə təkər, kabel sistemləri, plastik hissələr və yağlar kimi əsas komponentlərdə yaranan fasilələr istehsal xətlərinin dayanmasına qədər gətirib çıxara bilər.

Hörmüz boğazı ətrafında baş verən hadisələr Azərbaycan avtomobil bazarına və qiymətlərə necə təsir edə bilər?

Qaynarinfo-ya mövzunu şərh edən nəqliyyat məsələləri üzrə ekspert Eldəniz Cəfərov bildirib ki, Hörmüz boğazı ətrafında baş verən hadisələr Azərbaycan avtomobil bazarına o qədər də mənfi təsir etmir:

“Ümumiyyətlə, Azərbaycana avtomobillər müxtəlif ölkələrdən, müxtəlif marşurutlarla idxal olunur. Ona görə də biz bir marşrutdan asılı deyilik. Sadəcə həmin bölgədən gətirilən maşınların yol xərcləri bir qədər arta bilər, onların ehtiyat hissələrnin ölkəyə gətirilməsi üçün yubanmalar ola bilər. Amma alternativ marşrutlar mövcuddur”.

“Hansı avtomobillərin qiymətinə təsir edə bilər” sualını cavablandıran ekspertin fikrincə, bəzi model avtomobillər, xüsusi ilə yolsuzluq avtomobillərinin (daha çox Dubaydan gətirilən ikinci əl avtomobillər) ölkədə qıtlığı yaransa, həmin maşınlar ölkəyə gec gəlsə, daşınma xərcləri artsa, bu qiymətlərə cüzi də olsa, təsir edəcək:

“Bununla belə, Azərbaycan avtomobil bazarında tədarük fasiləsi yarana bilməz. Çünki ölkəmizin idxal marşruları artıq diferensiallaşdırılıb. Yəni, biz bir ölkədən, bir marşrutdan asılı deyilik”.

2026-cı ilin yanvar-fevral aylarında Azərbaycan xaricdən 5 milyon 091 min dollar dəyərində 204 ədəd elektromobil idxal edib.

Valyuta.az xəbər verir ki, 2025-ci ilin eyni dövrü ilə müqayisədə bu il idxal edilən elektromobillərin sayı 105 ədəd və ya 34%, dəyəri isə 6 milyon 992 min dollar və ya 57,9% azalıb.

Qeyd edək ki, 2025-ci ilin yanvar-fevral aylarında isə ölkəyə 12 milyon 083 min dollar dəyərində 309 ədəd elektromobil gətirilib.

2026-ci ilin yanvar-fevral aylarında bir elektromobilin orta idxal dəyəri 24 min 956 dollar (42 min 425 manat) təşkil edib. 2025-ci ildə isə bu rəqəm 39 min 102 dollar (66 min 473 manat) idi.