Ali Məhkəmədə Masallı rayon sakini Cavidan Seyfullayevin CM-nin 120.2.2-ci (xuliqanlıq niyyəti ilə qəsdən adam öldürmə) maddəsi ilə barəsində olan hökmdən verilən kassasiya şikayəti üzrə məhkəmə başa çatıb.
Median.Az xəbər verir ki, 2016-cı il mayın 8-i gecə saat 2 radələrində Xətai rayonunun M.Hadi küçəsi, 68A ünvanında, “Həzi Aslanov” metrostansiyasının yanında baş vermiş dava zamanı naməlum şəxs Masallı rayon sakini Musa Nurullayevi (1977-ci il təv.) bıçaqlayaraq qətlə yetirib və hadisə yerindən qaçıb. Səhərisi gün Xətai RPİ və rayon prokurorluğu əməkdaşlarının əməliyyat-axtarış və istintaq tədbirləri nəticəsində əvvəllər məhkum olunmuş Cavidan Seyfullayev tutulub. Məlum olub ki, öldürülən şəxs onun bibisi oğludur.
Həmin axşam Cavidan Seyfullayev Musa Nurullayevlə kafelərdən birində yeyib-içib, sonra isə oradan çıxaraq metronun qarşısında gəzişiblər. Sərxoş qardaşıların şit zarafatları biri-birlərinin xoşuna gəlməyib, mübahisə zamanı Cavidan bıçaqla Musanı döş qəfəsindən yaralayıb.
Bakı Ağır Cinayətlər Məhkəməsinin hökmü ilə təqsirləndirilən şəxs cəzasını ciddi rejimli cəza-çəkmə müəssisəsində çəkməklə 18 il müddətinə azadlıqdan məhrumetmə cəzasına məhkum olunub.
Bakı Apellyasiya Məhkəməsi C.Seyfullayevin apellyasiya şikayətini təmin etməyib.
Bundan sonra məhkum Ali Məhkəməyə kassasiya şikayəti verib.
Ali Məhkəmə kassasiya şikayətini araşdırıb qərara gəlib ki, onun şikayəti təmin edilməsin.
