“Kursk əməliyyatı başlayandan sonra Rusiya hakimiyyəti Ukrayna Silahlı Qüvvələri bu ərazidən çıxarılana qədər hər hansı sülh danışıqlarını istisna edir. Bununla belə, Zelenski hesab edir ki, münaqişənin sonu hamının düşündüyündən də yaxındır”.
Bu barədə RBC.ru nəşrində dərc olunan yazıda bildirilir.
Məlumata görə, ötən gün ABŞ-yə səfər edən Ukrayna Prezidenti Volodimir Zelenski “ABC News” telekanalına müsahibəsində Rusiya ilə Ukrayna arasındakı münaqişədən danışıb.
“Düşünürəm ki, biz sülhə düşündüyümüzdən də yaxınıq. Müharibənin sonuna yaxınlaşırıq. Sadəcə, çox güclü olmalıyıq”, – deyə Ukrayna prezidenti bildirib.
Onun fikrincə, Ukrayna yalnız güclü mövqedən Rusiya Prezidenti Vladimir Putini münaqişəni bitirməyə təşviq edə bilər.
Qeyd edək ki, Zelenski BMT Baş Assambleyası ərəfəsində ABŞ-yə səfər edib və burada onun çıxışı planlaşdırılıb. Ukrayna prezidentinin həmçinin Co Bayden, eyni zamanda ABŞ prezidentliyinə namizədlər Kamala Harris və Donald Trampla da görüşü planlaşdırılır. Zelenski onlara öz “Qələbə planı”nı təqdim etmək niyyətindədir.
