Yunanıstanın “Olimpiakos” klubunun futbolçuları UEFA Avropa Liqasının Liqa mərhələsinin VIII turunda Azərbaycanın “Qarabağ” komandası üzərində qələbə qazanacaqları təqdirdə böyük bonus alacaqlar.
Oxu.az-ın yerli SDNA nəşrinə istinadən məlumatına görə, bunu Pirey klubunun prezidenti Evangelos Marinakis Yunanıstan çempionatında “Panatinaikos”la (2:2) heç-heçə ilə başa çatan derbi oyunundan sonra komanda ilə söhbəti zamanı bildirib.
O qeyd edib ki, hakim qərarlarına görə derbidə qalib gələ bilməyiblər.
Marinakis “Qarabağ”la matçın həm onun özü, həm də “Olimpiakos” azarkeşləri üçün böyük əhəmiyyət daşıdığını vurğulayıb. Klub prezidenti “Panatinaikos”la gərgin matçdan sonra mümkün yorğunluğa baxmayaraq, qələbə qazanmaq üçün maksimum səy göstərməyə çağırıb.
“Biz, hətta 10 nəfərlə rəqibdən üstün idik. Bəlkə də çoxunuz yorulmusunuz. Cümə axşamı keçiriləcək matçın mənim və azarkeşlərimiz üçün nə qədər vacib olduğunu bilirsiniz. Əgər “Qarabağ”ı məğlub etsəniz, böyük bonus alacaqsınız. Var gücünüzlə çalışmalısınız”, – deyə Marinakis bildirib.
Qeyd edək ki, “Olimpiakos” – “Qarabağ” qarşılaşması yanvarın 30-dan 31-nə keçən gecə Bakı vaxtı ilə 00:00-da başlayacaq.
