İsrailin Veytsman Elm İnstitutunun alimləri xərçəng hüceyrələrinin immun sistemindən gizlənməsinin qarşısını almaq üçün yeni bir metod hazırlayıblar.
Bu barədə araşdırma “Cancer Cell” elmi jurnalında dərc olunub.
Alimlər zülal sintezi prosesini (translyasiya) hədəfə alıblar. Onlar aşkar ediblər ki, bu prosesi qəsdən pozduqda, xərçəng hüceyrələri anomaliya daşıyan yeni zülallar istehsal etməyə başlayır. Bu zülallar immun sisteminə tanış olmayan təhlükə kimi görünür və nəticədə immun hüceyrələr onları daha asanlıqla məhv edir.
Məlum olub ki, melanoma hüceyrələrində translyasiya prosesi pozulduqda, 34 yeni anormal zülal yaranır. Bu zülallar immun sisteminə “görünən” olur və o, xərçəng hüceyrələrini tanıyıb məhv edə bilir.
Yeni metod immunoterapiya ilə birlikdə tətbiq edildikdə, siçanların 40 %-də şişlərin ya tam yox olması, ya da əhəmiyyətli dərəcədə kiçilməsi müşahidə olunub. Alimlər süd vəzi, mədəaltı vəzi və yoğun bağırsaq xərçənginə qarşı bu üsulu test etməyə başlayıblar.
