“YouTube”un qısa videolarında baxış sayını artıracaq yeni dəyişiklik yaxın günlərdə qüvvəyə minir.
Bu barədə “Youtube” platforması açıqlama yayıb.
Yeniliyə əsasən, “YouTube”da yayımlanan qısa videolar artıq başladığı andan etibarən baxış sayı hesabına daxil ediləcək. Əvvəllər videonun müəyyən hissəsinə qədər baxılmadan sadəcə bir-iki saniyə içində keçildiyi halda, bu cür baxışlar statistikaya əlavə olunmurdu.
Xatırladaq ki, bu metod “TikTok” və “İnstagram Reels” platformalarında da uzun müddətdir tətbiq olunur. “Youtube”un bu qərarının 31 mart 2025-ci ildən qüvvəyə minməsi gözlənilir.
Şirkətin verdiyi açıqlamada qeyd olunur ki, bu yenilik məzmun istehsalçılarının strategiyalarını daha düzgün qurmasına, daha çox əməkdaşlıq fürsətləri əldə etməsinə və izləyici auditoriyasının miqyasını daha dəqiq təhlil etməsinə imkan yaradacaq. Bundan əlavə, baxış sayının artması ilə videoların platformada daha geniş yayılacağı vurğulanıb.
Qeyd edək ki, “YouTube” əvvəlki sistemi də tamamilə ləğv etməyəcək. Belə ki, platformanın analitik bölməsində “əlaqəli izləmələr” kateqoriyası yaradılacaq və burada yalnız videoya müəyyən müddətdən çox baxan istifadəçilər izləniləcək. Bu göstəricilər əsasında videonun gəlir potensialı və “Youtube iş ortaqlığı proqramı”na uyğunluğu da qiymətləndiriləcək.
//valyuta.az
