Bakı şəhərinin Səbail rayonunun Əziz Əliyev küçəsində (Kukla Teatrı ilə üzbəüz) avtomobil qanunsuz olaraq parklama edib.
Median.Az-in 1news.az-a istinadən məlumatına görə, “Facebook” sosial şəbəkəsində, “Parking Idiots in Baku” səhifəsində Fiat 500L markalı (99-MS-077 dövlət nömrə nişanlı) avtomobilin piyadalar üçün nəzərdə tutulan səkini zəbt etdiyini əks etdirən foto paylaşılıb. Belə ki, avtomobil uşaq arabası ilə yolu keçmək istəyən qadının yolunu kəsib. Səhifə administratoru paylaşımına “Yaxşı ki, səkini tam bağlamayıb” sözlərini əlavə edib.
Paylaşımdan bir müddət sonra isə özünü həmin avtomobilin sahibi kimi təqdim edən və etdiyi əməldən zərrə qədər də təəssüflənməyən Azərbaycan Dövlət Neft və Sənaye Universitetinin tələbəsi Mədinə Abdullayeva adlı istifadəçi şərhdə “Gələn dəfə mütləq tam bağlayaram” sözlərini yazıb. Buna sübut kimi o, şərhdə Fiat-ın səkini tam bağladığını əks etdirən foto yerləşdirib.
Qeyd edək ki, bir çoxları qayda pozuntusu edən sürücüyə dəstək olublar. Belə ki, Aytən Babayeva adlı istifadəçi “Belə balaca avtomobilə olar. Nə var səs-küy qaldırmısınız? Gedin ciplərə ilişin”. Cəmil Məmmədov isə “Səhv parklamaya görə 20 manat cərimə edəcəklər. Buyurun edin”.
Bakı Dövlət Yol Polisi İdarəsindən 1news.az-a avtomobil sürücüsünü qanun çərçivəsində 20 AZN civarında cərimə edəcəklərini bildiriblər.
