Bakı Ağır Cinayətlər Məhkəməsində Bakı şəhər sakini Sevinc Mirzəyevanın CM-nin 178.3.2-ci (dələduzluq, külli miqdarda ziyan vurmaqla törədildikdə) maddəsi ilə təqsirləndirilməsinə dair cinayət işi üzrə məhkəmə prosesi başa çatıb.
Median.Az xəbər verir ki, ötən il iyunun 7-də Nəsimi RPİ-nə müraciət edən İran vətəndaşı Asfari Alirezani bildirib ki, 2017-ci ilin fevral ayından 2018-ci ilin mart ayınadək olan müddətdə Sevinc adlı qadın paytaxt ərazisində ona ev tapacağına vəd verib və aldatma yolu ilə ondan 83.257 manat alaraq, mənimsəyib.
Polis əməkdaşlarının keçirdikləri əməliyyat-axtarış tədbirləri nəticəsində S.Mirzəyeva saxlanılıb. Araşdırma zamanı məlum olub ki, həmin qadın özünü hüquq-mühafizə orqanlarının əməkdaşı kimi təqdim edərək, daha 13 nəfərə qarşı dələduzluq əməli törədib və ümumilikdə onlara 232. 757 manat məbləğində maddi ziyan vurub.
Məhkəmənin hökmü ilə təqsirləndirilən şəxs 7 il müddətinə azadlıqdan məhrumetmə cəzasına məhkum olunub.
