“Belə bir problemi olan gəmi dünya sularında necə üzə bilər?”
Bu gün yerli mətbuatda Mübariz Mənsimovun Rəsulzadənin adını qara siyahıda olan 21 illik köhnə gəmiyə verməsi haqda xəbər yayımlanıb. Xəbərdə qeyd olunur ki, Mənsimov 1998-ci ildə istehsal olunmuş və hazırda 21 yaşı olan “ADRIATIC MARINER” adlı tanker gəmisinin adını “MAMMAD AMIN RASULZADEH” olaraq dəyişdirib.
Xəbər müəllifi Mənsimova belə bir sualla müraciət edib: Mübariz Mənsimov adı qara siyahıya salınmış 21 illik köhnə gəminin boyasını yeniləyərək, üstəlik, Rəsulzadənin adını verərək, Məmməd Əmin Rəsulzadənin adını əbədiləşdirir, yoxsa onun ruhuna və Azərbaycan xalqının dəyərlərinə hörmətsizlik edir?
Azxeber.com məsələylə bağlı “Palmali Şirkətlər Qrupu”na müraciət edib.
Şirkətdən verilən açıqlamanı təqdim edirik: “Yazılan xəbər başdan ayağa cəfəngiyyatdır. Məmməd Əmin Rəsulzadə gəmimiz başdan-ayağa yenilənmiş, loyddan alınan icazəyə görə bütün standartlara uyğun olaraq tankerdən quru yük gəmisinə dəyişdirilib. Və bu gəmi “Palmali” donanmasının həqiqətən də yeni gəmisidir.
Şirkətdən gəminin “qara siyahı”ya düşməsi iddasına isə belə reaksiya verilib:
“Xəbəri hazırlayan və ya sifariş verən bircə dəfə də olsun bu gəmini görsəydi belə cəfəngiyat yazdırmazdı. Qara siyahıda olmasına gəldikdə, bu belədirsə bu gəmi muzey ücün hazırlanır? Belə bir problemi olan gəmi dünya sularında necə üzə bilər? İstər gəmi 40 yaşında olsun, adı əbədiləşdirməklə gəminin texniki göstəricilərinin nə əlaqəsi var? Lap elə var olan gəminin adı dəyişilib və Rəsulzadə qoyulub, burda nə qəbahət var? Önəmli Azərbaycanı təmsil etmək deyil mi? Adı əbədiləşdirmək deyil ki? Dünya limanlarına yaxınlaşanda soruşacaqlar ay gəmi sənin neçə yaşın var?”
